ແຂວງເຊກອງ ຫາລືກ່ຽວກັບການຄຸ້ມຄອງລານເກັບຊື້ ມັນຕົ້ນ ຫຼຸດຜ່ອນການເອົາປຽບຊາວສວນ

    0
    24

    ໃນວັນທີ 12 ຕຸລາ 2021 ແຂວງເຊກອງ ຈັດກອງປະຊຸມສະຫຼຸບຕີລາຄາການເຄື່ອນໄຫວວຽກງານ ແລະ ປຶກສາຫາລືກ່ຽວກັບການອະນຸຍາດສ້າງຕັ້ງ ແລະ ການຄຸ້ມຄອງລານເກັບຊື້ມັນຕົ້ນໄດ້ຈັດຂຶ້ນ, ທີ່ພະແນກອຸດສາຫະກໍາ ແລະ ການຄ້າແຂວງ ໂດຍການເປັນປະທານຂອງທ່ານ ຂັນຕີ ສີລະວົງສາ ຮອງເຈົ້າແຂວງເຊກອງ, ພ້ອມມີທ່ານຮອງເຈົ້າເມືອງດາກຈຶງ, ທ່ານຮອງເຈົ້າເມືອງທ່າແຕງ, ຫົວໜ້າພະແນກອຸດສາຫະກໍາ ແລະ ການຄ້າແຂວງ-ເມືອງ ແລະພາກ ສ່ວນກ່ຽວຂ້ອງເຂົ້າຮ່ວມ.

    ທ່ານ ຄໍາໃບ ແກ້ວສັກສິດ ຫົວໜ້າຂະແໜງທະບຽນ ແລະ ຄຸ້ມຄອງວິສາຫະກິດໄດ້ຂຶ້ນຜ່ານບົດສະຫຼຸບການຈັດ ຕັ້ງປະຕິບັດ, ອອກອະນຸຍາດສ້າງຕັ້ງລານເກັບຊື້ມັນຕົ້ນ ໂດຍໄດ້ຕີລາຄາຍົກໃຫ້ເຫັນດ້ານດີ, ດ້ານອ່ອນ, ຜົນໄດ້ຜົນເສຍໃນການອອກອະນຸຍາດ-ບໍ່ອອກອະນຸຍາດ ແລະວາງແຜນການສືບຕໍ່ແກ້ໄຂໃນຕໍ່ໜ້າ.

    ເຊິ່ງໃນປີ (2019-2020) ທົ່ວແຂວງໄດ້ອອກອະນຸຍາດລານເກັບຊື້ມັນຕົ້ນທັງໝົດ 8 ຫົວໜ່ວຍ, ໃນນີ້ຂັ້ນແຂວງອະນຸຍາດ 6 ຫົວໜ່ວຍ, ເມືອງອະນຸ ຍາດ 2 ຫົວໜ່ວຍ ແລະໄດ້ຢັ້ງຢືນການເປັນສາຂາມີ 9 ສາຂາຄື: ຢູ່ເມືອງລະມາມມີ 4 ສາຂາ, ເມືອງທ່າແຕງ 3 ສາຂາ, ເມືອງດາກຈຶງມີ 1 ສາຂາ ແລະຢູ່ເມືອງກະລຶມ 1 ສາຂາ.

    ພ້ອມນີ້ ກອງປະຊຸມຍັງໄດ້ຮັບຟັງການປະກອບຄໍາເຫັນຂອງຂະແໜງການກ່ຽວຂ້ອງອ້ອມຂ້າງແຂວງ ແລະເມືອງກ່ຽວກັບການອອກອະນຸຍາດສ້າງຕັ້ງ, ການແບ່ງຂັ້ນຄຸ້ມຄອງລະ ຫວ່າງແຂວງ ກັບ ເມືອງ ແລະວຽກງານອື່ນໆ ເພື່ອສ້າງຄວາມເປັນເອກະພາບ ແນໃສ່ຍູ້ແຮງຂະບວນການຜະລິດຂອງປະຊາຊົນໃຫ້ນັບມື້ຫຼາຍຂຶ້ນ, ທັງເປັນການຊຸກຍູ້ຫົວໜ່ວຍທຸລະກິດ ກໍຄືຜູ້ປະກອບການເກັບຊື້ມັນຕົ້ນເຄື່ອນໄຫວຖືກຕ້ອງຕາມລະບຽບກົດໝາຍ.

    ໃນໂອກາດນີ້ ທ່ານ ຂັນຕີ ສີລະວົງສາ ກໍໄດ້ມີຄໍາເຫັນວ່າ: ວຽກງານດັ່ງກ່າວນີ້ມອບໃຫ້ພະແນກກະສິກໍາ-ປ່າໄມ້ ສົມທົບກັບພະແນກຊັບພະຍາກອນທໍາມະຊາດ-ສິ່ງແວດລ້ອມ ວາງມາດຕະການເດັດຂາດ, ເຂັ້ມງວດຕໍ່ຜູ້ບຸກລຸກປ່າສະຫງວນ ແລະ ປ່າປ້ອງກັນ ເພື່ອປູກມັນຕົ້ນ.

    ພະແນກອຸດສາຫະກໍາ-ການຄ້າ ສົມທົບກັບ ພະແນກກະສິກໍາ-ປ່າໄມ້ ເອົາໃຈໃສ່ຄຸ້ມຄອງລານເກັບຊື້ມັນຕົ້ນໃຫ້ເຄື່ອນໄຫວຖືກຕ້ອງຕາມລະບຽບກົດໝາຍ; ມອບໃຫ້ພະແນກອຸດສາຫະກໍາ-ການຄ້າ, ພະແນກກະສິກໍາ-ປ່າໄມ້ ແລະ ພະແນກການເງິນແຂວງຈັດກອງປະຊຸມຮ່ວມກັບໂຮງງານຜະລິດແປ້ງມັນຕົ້ນ ເພື່ອປຶກສາຫາລືກໍານົດລາຄາການເກັບຊື້ມັນຕົ້ນ, ແລ້ວແຈ້ງລາຄາທີ່ກໍານົດດັ່ງກ່າວໃຫ້ເມືອງ, ບ້ານ ກໍຄືປະຊາຊົນຜູ້ຜະລິດຮັບຮູ້ຢ່າງທົ່ວເຖິງ ເພື່ອຮັບປະກັນດ້ານລາຄາ, ຮັກສາຜົນປະໂຫຍດໃຫ້ປະຊາຊົນ ແລະ ສືບຕໍ່ປະເມີນຫົວໜ່ວຍທີ່ໄດ້ຮັບອະນຸຍາດເກັບຊື້ມັນຕົ້ນໃນໄລຍະຜ່ານມາ ວ່າຫົວໜ່ວຍໃດເຄື່ອນໄຫວຖືກຕ້ອງ, ເຄື່ອນໄຫວໄດ້ດີ ແລະຫົວໜ່ວຍໃດທີ່ບໍ່ມີການເຄື່ອນໄຫວ ກໍໃຫ້ມີການກ່າວເຕືອນ ຫຼື ລົບລ້າງໃບອະນຸຍາດດັ່ງກ່າວ, ທັງໝົດນີ້ ກໍເພື່ອເປັນການຊຸກຍູ້ສົ່ງເສີມຂະບວນການຜະລິດເປັນສິນຄ້າຂອງປະຊາຊົນໃຫ້ນັບມື້ຂະຫຍາຍຕົວ, ຄຽງຄູ່ກັບການຄຸ້ມຄອງການເຄື່ອນໄຫວຂອງຫົວໜ່ວຍທຸລະກິດໃຫ້ຖືກຕ້ອງຕາມລະບຽບກົດໝາຍ ແລະນິຕິກໍາຕ່າງໆທີ່ພັກ-ລັດຖະບານວາງອອກ.