ທໍາລາຍສິນຄ້າຫ້າມນໍາເຂົ້າບໍ່ຖືກຕ້ອງປະເພດໜັງຄວາຍ ລວມນໍ້າໜັກ 5,130 ກິໂລ

0
80

ໃນວັນທີ 25 ມິຖຸນາ 2021, ພະແນກຕໍາຫຼວດປ້ອງກັນເສດຖະກິດ ຫ້ອງຕໍາຫຼວດ ປກສ ນວ ໄດ້ສົມທົບກັບພະແນກອຸດສາຫະກຳການຄ້າ ນະຄອນຫຼວງວຽງຈັນ ແລະ ພາກສ່ວນກ່ຽວຂ້ອງ ທໍາລາຍສິນຄ້າຫ້າມນໍາເຂົ້າບໍ່ຖືກຕ້ອງປະເພດໜັງຄວາຍ ລວມມີ 99 ເປົ໋າ,ນໍ້າໜັກທັງໝົດ 5,130 ກິໂລກຣາມ, ຢູ່ສູນບໍາບັດຂີ້ເຫຍື້ອ

ຫຼັກ 32 ເມືອງໄຊທານີ ນະຄອນຫຼວງວຽງຈັນ, ໂດຍມີ ພັຕ ຄໍາເບົ້າ ປີວແກ້ວປະເສີດ ຮອງຫົວໜ້າພະແນກຕໍາຫຼວດປ້ອງກັນເສດຖະກິດ ຫ້ອງຕໍາຫຼວດ ປກສ ນວ ພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມ. ໃນການທໍາລາຍຄັ້ງນີ້, ພັຕ ຄໍາເບົ້າ ປີວແກ້ວປະເສີດ ໃຫ້ຮູ້ວ່າ: ພາຍຫລັງໄດ້ຮັບການລາຍງານຂໍ້ມູນຈາກ

ພົນລະເມືອງດີ ໃນວັນທີ 24 ມິຖຸນາ 2021 ວ່າ: ມີລົດບັນທຸກ ໝາຍເລກທະບຽນ ບກ 7813 ລັກລອບຂົນສົ່ງນໍາເຂົ້າໜັງຄວາຍມາຈາກປະເທດຫວຽດນາມ ໂດຍບໍ່ຖືກຕ້ອງມາທາງ ເຂດບ້ານດົງສ້າງຫີນ ເມືອງໄຊທານີ ນວ. ຈາກນັ້ນ, ເຈົ້າໜ້າທີ່ຕໍາຫຼວດປ້ອງກັນເສດຖະກິດ ຈຶ່ງໄດ້ອອກຕິດຕາມ, ກວດກາພົບເຫັນລົດຄັນດັ່ງ

ກ່າວ ແກ່ເຄື່ອງປະເພດໜັງຄວາຍແຫ້ງ ແລະ ໜັງຄວາຍດິບ ທີ່ລະເມີດລະບຽບການກ່ຽວກັບລະບອບພາສີອາກອນຂອງລັດ ທີ່ກຳນົດໄວ້ໃນປະມວນກົດໝາຍອາຍາມາດຕາ 294 ທີ່ກໍານົດໄວ້ວ່າ: ການລັກລອບນໍາເຂົ້າ, ສົ່ງອອກຫຼື ນໍາພືດ, ຜະລິດຕະພັນພືດ ຫຼື ວັດຖຸ ຕ້ອງຄວບຄຸມຜ່ານ ສປປ ລາວ ໂດຍບໍ່ໄດ້ຮັບອະນຸຍາດ

ແລະ ລະເມີດຕໍ່ແຈ້ງການຂອງກົມລ້ຽງສັດ ແລະ ການປະມົງ ວ່າດ້ວຍການຫ້າມນໍາເຂົ້າຊົ່ວຄາວສັດໃຫຍ່ ປະເພດງົວ-ຄວາຍ ແລະຜະລິດຕະພັນຈາກສັດໃຫຍ່ ສະບັບເລກທີ 1227/ກລປ ລົງວັນທີ 31 ພຶດສະພາ 2021.ສະນັ້ນ, ເພື່ອຮັບປະກັນບໍ່ໃຫ້ສິນຄ້າດັ່ງກ່າວຖືກຈໍາໜ່າຍໃນທ້ອງຕະຫຼາດ ແລະ ໃຫ້ຄົນລາວບໍລິໂພກ ດັ່ງນັ້ນ,

ເຈົ້າໜ້າທີ່ ຈຶ່ງໄດ້ຢຶດລົດ ແລະ ສິນຄ້າ ເພື່ອນຳໄປທໍາລາຍຖິ້ມ.ຕໍ່ກັບເຈົ້າຂອງລົດ ເຈົ້າໜ້າທີ່ຕໍາຫຼວດປ້ອງກັນເສດຖະກິດ ໄດ້ດໍາເນີນຄະດີ ແລະ ປັບໃໝຕາມລະບຽບກົດໝາຍ.