ແຂວງວຽງຈັນ ຍອດຕິດເຊື້ຶອພຸ່ງສູງ ມື້ນີ້ເຖິງ 13 ຄົນ ສ່ວນນະຄອນຫຼວງວຽງຈັນມີ 1 ຄົນ

0
705

ທ່ານ ດຣ. ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ຮ່ວມກັບ  ທ່ານ ນາງ ທິບພະກອນ ຈັນທະວົງສາ ຮອງລັດຖະມົນຕີ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ ໄດ້ຖະແຫຼງຂ່າວປະຈຳວັນທີ 29 ມິຖຸນາ 2021ທີ່ກະຊວງສາທາລະນະສຸກ.ທ່ານ ດຣ. ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ວ່າ: ວັນທີ 28 ມິຖຸນາ 2021 ໄດ້ກວດວິເຄາະທັງໝົດ 858 ຄົນ ກວດພົບຜູ້ຕິດເຊື້ອທັງໝົດ 25 ຄົນ, ຈາກ ນະຄອນຫຼວງ 1 ກໍລະນີ, ສະຫວັນນະເຂດ 1 ກໍລະນີ, ຈຳປາສັກ 9 ກໍລະນີ, ແຂວງ ວຽງຈັນ 13 ກໍລະນີ ແລະ ຄຳມ່ວນ 1ກໍລະນີ.

ສຳລັບ ນະຄອນຫຼວງວຽງຈັນ 1 ຄົນ ແລະ ແຂວງວຽງຈັນ 13 ຄົນ ແມ່ນກໍລະນີຕິດເຊື້ອໃນຊຸມຊົນ. ສ່ວນ ສະຫວັນນະເຂດ 1 ກໍລະນີ, ຈຳປາສັກ 9 ກໍລະນີ ແລະ ຄຳມ່ວນ 1ກໍລະນີ ແມ່ນກວດພົບຈາກແຮງງານລາວ ທີ່ກັບມາຈາກປະເທດເພື່ອນບ້ານ ໂດຍຖືກຕ້ອງຕາມກົດໝາຍ ເຊິ່ງຖືວ່າ ເປັນກໍລະນີນຳເຂົ້າ.ດັ່ງນັ້ນ, ມາຮອດມື້ນີ້ ພວກເຮົາມີຕົວເລກຜູ້ຕິດເຊື້ອສະສົມທັງໝົດ 2.101 ຄົນ, ບໍ່ມີການເສຍຊີວິດໃໝ່ ແລະ ກໍາລັງປິ່ນປົວ ທັງໝົດ 140 ຄົນ.
ຂໍ້ມູນກໍລະນີຜູ້ຕິດເຊື້ອໃໝ່ 1 ຄົນ ໃນນະຄອນຫຼວງວຽງຈັນ

ເພດຍິງ ອາຍຸ 5 ປີ, ສັນຊາດລາວ ບ້ານຫົວຊ້າງ ເມືອງນາຊາຍທອງ ,ຜູ້ກ່ຽວມີອາການໄອ,ມີປະຫວັດສຳຜັດໃກ້ຊິດກັບຜູ້ຕິດເຊື້ອ ເຂດ/ສະຖານທີ່ສ່ຽງຈາກການເດີນທາງໄປຂອງຜູ້ຕິດເຊື້ອມີດັ່ງນີ້:ວັນທີ 17/06/2021, ເວລາ 10:00-10:30 ໂມງ ໄດ້ໄປຊື້ນົມຢູ່ຮ້ານ ເຈມາກ ບ້ານໂພນຕ້ອງຈອມມະນີ, ເມືອງຈັນທະບູລີ; ເວລາ 11:00-12:00 ໂມງ ໄປຊື້ເຄື່ອງຢູ່ຕະຫລາດຂົວດິນ , ວັນທີ 21/06/2021 ເວລາ 09:00-11:30 ໂມງ ໄປເຮັດບົດ ຢູ່ເຮືອນອາຈານ (ບ້ານດອນກອຍ ເມືອງໄຊເສດຖາ) , ວັນທີ 24/06/2021 ໄປຕະຫລາດໂນນສະອາດ ,ວັນທີ 26/06/2021 ເວລາ 08:00-08:30 ໂມງ ໄດ້ໄປຕະຫລາດດົງໜາກຄາຍ,ເວລາ 14:00-16:30 ໂມງ ໄດ້ໄປນັ່ງກິນຕໍາ ຢູ່ທ່າງ່ອນ ທາງເຂົ້າວັດທ່າງ່ອນ, ເວລາ 10:00-17:00 ໂມງ ໄດ້ໄປບ້ານພີ່ນ້ອງ ຢູ່ບ້ານຫົວຊ້າງ ເມືອງນາຊາຍ

ຕໍ່ກັບສະພາບການດັ່ງກ່າວ, ຈຶ່ງຂໍຮຽກຮ້ອງມາຍັງທຸກພາກສ່ວນໃນສັງຄົມ ຍົກສູງສະຕິຄວາມຮັບຜິດຊອບຂອງຕົນ ໃນການປະຕິບັດມາດຕະການປ້ອງກັນການຕິດເຊື້ອ ຢ່າງຖືກຕ້ອງ ແລະ ເຄັ່ງຄັດ ເປັນຕົ້ນແມ່ນ ການຮັກສາໄລຍະຫ່າງທາງສັງຄົມ, ສວມໃສ່ຜ້າປິດ-ດັງ ເມື່ອອອກຈາກບ້ານ, ໝັ່ນລ້າງມືເລື້ອຍໆ ດ້ວຍນ້ຳສະອາດໃສ່ສະບູ ຫຼື ເຈວເຫຼົ້າ 70 % ຂຶ້ນໄປ, ຫຼີກລ່ຽງການເດີນທາງໄປສະຖານທີ່ ທີ່ມີຄວາມສ່ຽງ.

ຖ້າຫາກຮູ້ສຶກບໍ່ສະບາຍ ຫຼື ມີປະຫວັດສຳຜັດໃກ້ຊິດກັບຜູ້ຕິດເຊື້ອ ຫຼື ເດີນທາງໄປຍັງສະຖານທີ່ ທີ່ຜູ້ຕິດເຊື້ອເດີນທາງໄປ ໃຫ້ທ່ານຮີບຮ້ອນໄປພົບແພດ ເພື່ອເກັບຕົວຢ່າງກວດຊອກຫາເຊື້ອ ແລະ ຈຳກັດບໍລິເວນຕົນເອງ 14 ວັນ ເຊິ່ງການປະຕິບັດທັງໝົດນີ້ ກໍ່ແມ່ນເພື່ອປ້ອງກັນ ການແຜ່ລະບາດຂອງພະຍາດໂຄວິດ-19 ບໍ່ໃຫ້ຂະຫຍາຍເປັນວົງກວ້າງ ໃນ ສປປ ລາວເຮົາ.