ລົງກວດກາ ແລະ ຢຶດອຸປະກອນ ຮ້ານອິນເຕີເນັດ 2 ຮ້ານ ທີ່ຕິດພັນກັບການຫຼິ້ນການພະນັນຕ້ອງຫ້າມດ້ວຍວິທີການລັກເປີດບໍລິການ

0
184

ເຈົ້າໜ້າທີ່ພະແນກຕໍາຫຼວດປ້ອງກັນເສດຖະກິດ ຫ້ອງຕໍາຫຼວດ ປກສ ນວ ລົງກວດກາ ແລະ ຢຶດອຸປະກອນ ຮ້ານອິນເຕີເນັດກາເຟ ຈໍານວນ 2 ຮ້ານ ທີ່ຕິດພັນກັບການຫຼິ້ນການພະນັນຕ້ອງຫ້າມດ້ວຍວິທີການລັກເປີດບໍລິການ ໃຫ້ຫຼິ້ນເກມທາງອອນລາຍ ຢູ່ເຂດບ້ານສົມສະຫງ່າ ເມືອງໄຊເສດຖາ ແລະ ບ້ານດ່ານຄໍາ ເມືອງສີໂຄດຕະບອງ ນວ ເຫັນວ່າເປັນການລະເມີດຕໍ່ຄຳສັ່ງເລກທີ 15/ນຍ ແລະ ຂໍ້ຕົກລົງເລກທີ 828/ ປທສ ວ່າດ້ວຍການບໍລິການອິນເຕີເນັດກາເຟ, ຈຶ່ງໄດ້ຢຶດອຸປະກອນ

ປະກອບມີ ຄອມຟິວເຕີ 2 ຊຸດ ແລະ ເຄື່ອງພິມ 2 ໜ່ວຍ ມາໄວ້ທີ່ຫ້ອງຕໍາຫຼວດ.ເຈົ້າໜ້າທີ່ ພະແນກຕໍາຫຼວດປ້ອງກັນເສດຖະກິດ ຫ້ອງຕໍາຫຼວດ ປກສ ນວ ໃຫ້ຮູ້ວ່າ: ໃນວັນທີ 23 ມິຖຸນາ 2021 ໄດ້ຮັບການແຈ້ງຂໍ້ມູນຈາກພົນລະເມືອງດີວ່າ: ມີຮ້ານອິນເຕີເນັດກາເຟ ຍັງລັກລອບເປີດໃຫ້ບໍລິການຫຼິ້ນເກມທາງອອນລາຍ.

ເຈົ້າໜ້າທີ່ໄດ້ລົງກວດກາ ແລະ ພົບເຫັນຮ້ານອິນເຕີເນັດກາເຟ ຂອງທ້າວ ປ໋ອກກີ້ ຢູ່ບ້ານດ່ານຄໍາ ເມືອງສີໂຄດຕະບອງ ແລະ ຮ້ານຂອງ ທ້າວ ແບ້ ຢູ່ບ້ານສົມ
ສະຫງ່າ ເມືອງໄຊເສດຖາ ນວ ໄດ້ເຂົ້າໄປກວດກາພາຍໃນຮ້ານພົບເຫັນພະນັກງານຢູ່ໃນຮ້ານ ພ້ອມດ້ວຍຄອມຟິວເຕີ 2 ເຄື່ອງ, ເຄື່ອງພິມເຈ້ຍເຊີເກມ ທີ່ຄອຍໃຫ້

ບໍລິການ. ຜ່ານການສອບຖາມຮູ້ໄດ້ວ່າ ທັງ 2 ຮ້ານເຄື່ອນໄຫວດໍາເນີນທຸລະກິດ ໂດຍບໍ່ມີໃບອະນຸຍາດທະບຽນວິສະຫະກິດ, ໃບອະນຸຍາດຈາກພະແນກໂທລະຄົມ-ມະນາຄົມ ແລະ ການສື່ສານ ຈຶ່ງເຫັນວ່າ ການເຄື່ອນໄຫວດໍາເນີນທຸລະກິດ ໃຫ້ບໍລິການທາງດ້ານອິນເຕີເນັດກາເຟ ຂອງພວກກ່ຽວແມ່ນແຕະຕ້ອງເຖິງສາຍພົວພັນສັງຄົມ

ທີ່ປະມວນກົດໝາຍອາຍາກຳນົດໄວ້ໃນມາດຕາ 141, ຄໍາສັ່ງເລກທີ 15/ນຍ, ຂໍ້ຕົກລົງເລກທີ່ 828/ປທສ ແລະ ແຈ້ງການເລກທີ່02/ຈນວ.ກອງບັນຊາການ ປກສ ນວ, ຂໍຮຽກຮ້ອງມາຍັງຜູ້ປະກອບການດໍາເນີນທຸລະກິດ ເວົ້າສະເພາະການເຄື່ອນໄຫວທາງດ້ານໂທລະຄົມ-ມະນາຄົມ ແລະ ການສື່ສານ ໃຫ້ບໍລິການອິນເຕີເນັດກາເຟ ຂໍໃຫ້ປະຕິບັດຕາມກົດໝາຍ, ຄໍາສັ່ງ ແລະ ແຈ້ງການຢ່າງເຂັ້ມງວດ ເພາະຢູ່ໃນໄລຍະພະຍາດຍັງແຜ່ລະບາດ ຈິ່ງຂໍໃຫ້ທຸກຊັ້ນຄົນໃນສັງຄົມຈົ່ງປະຕິບັດພັນທະຂອງຕົນປະກອບສ່ວນເຂົ້າໃນວຽກປ້ອງກັນສະກັດກັ້ນຄວບຄຸມການແຜ່ລະບາດຂອງພະຍາດໂຄດວິດ 19.