ກອງພັນໃຫຍ່ 605 ປະກາດການແຕ່ງຕັ້ງປ່ຽນແທນກຳມະການປະຈໍາພັກ

    0
    90

    ວັນທີ 24 ມີຖຸນາ 2021 ນີ້, ກອງພັນໃຫຍ່ 605 ໄດ້ປະກາດການແຕ່ງຕັ້ງປ່ຽນແທນກໍາມະການປະຈໍາພັກ, ປະທານກວດກາພັກ ແລະ ກຳມະການຄະນະພັກກອງພັນໃຫຍ່ 605, ໂດຍການເຂົ້າຮ່ວມເປັນປະທານຂອງ ສະຫາຍ ພົນຕີ ສອນທອງ ພົມລາວົງ ກຳມະການຄະນະປະຈຳພັກກະຊວງປ້ອງກັນປະເທດ ຮອງຫົວໜ້າກົມໃຫຍ່ການເມືອງກອງທັບ, ມີສະຫາຍ ພັນເອກ ຈັນທາ ບຸນນະວົງ ຮອງກົມຈັດຕັ້ງພັກ ກົມໃຫຍ່ການເມືອງກອງທັບ, ມີສະຫາຍ ພັນໂທ ຄຳເອັ້ຍ ສຸກແສງເໜືອ ຮອງກົມພະນັກງານ, ສະຫາຍ ພັນເອກ ຈັນສະໝອນ ເພັດສະໝອນ ຮອງຫົວໜ້າກົມປືນໃຫຍ່ໜ້າດິນກົມໃຫຍ່ເສນາທິການກອງທັບ, ມີຄະນະພັກ-ຄະນະບັນຊາ, ຄະນະພັກຮາກຖານຕະຫຼອດຮອດຄະນະໜ່ວຍພັກກອງພັນໃຫຍ່ 605 ເຂົ້າຮ່ວມ.

    ສະຫາຍ ພັນເອກ ຈັນທາ ບຸນນະວົງ ໄດ້ຂຶ້ນຜ່ານມະຕິຕົກລົງຂອງຄະນະພັກກະຊວງປ້ອງກັນປະເທດ ວ່າດ້ວຍການແຕ່ງຕັ້ງປ່ຽນແທນກຳມະການປະຈຳພັກ, ປະທານກວດກາພັກ ແລະ ກຳມະການຄະນະພັກ ກອງພັນໃຫຍ່ 605 ອີງຕາມກົດລະບຽບຂອງພັກປະຊາຊົນປະຕິວັດລາວ ສະໄໝທີ XI ໝວດທີ II ມາດຕາ 13 ວ່າດ້ວຍການບົ່ງຕົວແຕ່ງຕັ້ງກຳມະການຄະນະພັກ, ປະທານກວດກາພັກ ແລະ ກຳມະການຄະນະພັກຢູ່ກອງພັນໃຫຍ່ 605 ເຊີ່ງປະກອບມີ: ຂໍ້ຕົກລົງບົ່ງຕົວແຕ່ງຕັ້ງ ສະຫາຍ ພັນໂທ ກິຮໍ ໜູແວ່ນ ຮອງຫົວໜ້າການທະຫານ ກອງພັນໃຫຍ່ 605 ເປັນກຳມະການປະຈຳພັກ ປ່ຽນແທນ ສະຫາຍ ພັນໂທ ສົມເພັດ ສິງທຳມະວົງ ທີ່ພັກການກຽມຮັບເບ້ຍບຳນານ, ສະຫາຍ ພັນໂທ ຄຳວອນ ສີຄູນເມືອງ ຮອງຫົວໜ້າການເມືອງກອງພັນໃຫຍ່ 605 ເປັນປະທານກວດກາພັກ, ປ່ຽນແທນ ສະຫາຍ ພັນໂທ ສົມເພັດ ສິງທຳມະວົງ ພັກການກຽມຮັບເບ້ຍບຳນານ, ສະຫາຍ ພັນໂທ ໄມສີ ມາວັນດີ ຮອງຫົວໜ້າພະແນກການເມືອງກອງພັນໃຫຍ່ 605 ເປັນກຳມະການຄະນະພັກ, ປ່ຽນແທນ ສະຫາຍ ພັນໂທ ຄຳຜິວ ແພງຄຳພາ ພັກການກຽມຮັບເບ້ຍບຳນານ ແລະ ສະຫາຍ ພັນໂທ ວົງເດືອນ ແກ້ວມະນີ ຮອງຫົວໜ້າພະແນກເສນາທິການກອງພັນໃຫຍ່ 605 ເປັນກຳມະການຄະນະພັກກອງພັນໃຫຍ່ 605 ປ່ຽນແທນສະຫາຍ ພັນໂທ ສົມເພັດ ສິງທຳມະວົງທີ່ພັກການກຽມຮັບເບ້ຍບຳນານ.

    ໂອກາດດຽວກັນ ພົນຕີ ສອນທອງ ພົມລາວົງ ໄດ້ມີຄຳເຫັນໂອ້ລົມຕໍ່ພິທີ ກ່ອນອື່ນສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ຄະນະພັກກອງພັນໃຫຍ່ 605 ທີ່ໄດ້ຊີ້ນຳ-ນໍາພາ ບັນຊາກົມກອງຂອງຕົນໄດ້ມີຜົນງານພົ້ນເດັ່ນຫຼາຍດ້ານໃນໄລຍະຜ່ານມາ. ຈາກນັ້ນ ກໍໄດ້ຍົກໃຫ້ເຫັນສະພາບການຂອງໂລກ ພາກພື້ນທີ່ຍັງຜັນແປໄປຢ່າງສັບສົນ ເປັນຕົ້ນແມ່ນ ສະພາບດ້ານເສດຖະກິດ, ສະພາບການເມືອງຂອງປະເທດທີ່ມີມະຫາອຳນາດໄດ້ຂັດແຍ້ງແຂ່ງຂັນກັນ ແລະ ສະພາບການແຜ່ລະບາດຂອງພະຍາດໂຄວິດ -19 ທີ່ແຜ່ລະບາດຢູ່ໃນທົ່ວໂລກ ເວົ້າລວມ, ເວົ້າສະເພາະກໍຄືຢູ່ປະເທດເຮົາ ເຊິ່ງມັນສົ່ງຜົນກະທົບຫຼາຍດ້ານໃຫ້ແກ່ປະເທດຊາດ, ເສດຖະກິດ ແລະ ປະຊາຊົນບັນດາເຜົ່າ, ພ້ອມນັ້ນໄດ້ຮຽກຮ້ອງໃຫ້ຄະນະພັກ-ຄະນະບັນຊາ ກອງພັນໃຫຍ່ກໍຄືຄະນະພັກທີ່ໄດ້ຮັບໜ້າທີ່ໃໝ່ໃນຄັ້ງນີ້, ເອົາໃຈໃສ່ຊີ້ນຳ-ນຳພາ ບັນຊາກົມກອງຂອງຕົນໃຫ້ມີຄຸນທາດການເມືອງໜັກແໜ້ນ, ເພີ່ມທະວີວຽກງານຈັດຕັ້ງພັກ, ຈັດຕັ້ງພະນັກງານໃຫ້ມີຄວາມປອດໃສ ເຂັ້ມແຂງ ໜັກແໜ້ນ ເອົາໃຈໃສ່ອົບຮົມ-ຫັດແອບນຳໃຊ້ອາວຸດຍຸດໂທປະກອນໃຫ້ມີຄວາມຄ່ອງແຄ້ວ, ເພື່ອກຽມພ້ອມສູ້ຮົບ ແລະ ສູ້ຮົບຕົວຈິງຮອບດ້ານໃຫ້ໄດ້ຮັບໝາກຜົນສູງ, ຕ້ານ ແລະ ສະກັດກັ້ນປະກົດການຫຍໍ້ທໍ້ທີ່ເກີດຂື້ນຢູ່ໃນກົມກອງໃຫ້ເຂັ້ມງວດ, ມີຄວາມສາມັກຄີພາຍໃນ, ພາຍນອກໃຫ້ມີຄວາມແໜ້ນແຟ້ນພ້ອມກັນເຮັດສຳເລັດໜ້າທີ່ທີ່ຂັ້ນເທິງມອບໝາຍໃຫ້.

    ຂ່າວ-ພາບ: ໜູແດງ+ເພັງ