ຮູບຫຼໍ່ເຄິ່ງຄີງປະທານ ໄກສອນ ພົມວິຫານ ວິລະບູລຸດຂອງຊາດ ໄດ້​ຖືກ​ອັນ​ເຊີນ​ໄປປະດິດສະຖານ ທີ່ອະນຸສອນສະຖານຂອງທ່ານແລ້ວ

    0
    151

    ໃນວັນທີ 15 ມິຖຸນາ 2021, ປະທານ ສະພາແຫ່ງຊາດ ພະນະທ່ານ ປອ ໄຊສົມພອນ ພົມວິຫານ ໄດ້ເຂົ້າຮ່ວມພິທີອັນເຊີນຮູບຫຼໍ່ເຄິ່ງຄີງປະທານ ໄກສອນ ພົມວິຫານ ທັງເປັນວິລະບູລຸດຂອງຊາດ ກໍຄື ປວງຊົນລາວ ຂຶ້ນປະດິດສະຖານ ທີ່ອະນຸສອນສະຖານຂອງທ່ານປະທານ ທີ່ເມືອງ ວິລະບູລີ, ແຂວງສະຫວັນນະເຂດ.

    ພະນະທ່ານ ປອ ໄຊສົມພອນ ພົມວິຫານ ພ້ອມຄະນະລວມທັງ ເຈົ້າແຂວງໆສະຫວັນນະເຂດ ທ່ານ ສັນຕິພາບ ພົມວິຫານ, ຍັງໄດ້ລົງຢ້ຽມຢາມໂຄງການຄຳ-ທອງເຊໂປນ ຂອງ ບໍລິສັດ ລ້ານຊ້າງ ມິເນໂຣນສ໌ ລິມິເຕັດ (LXML)

    ເພື່ອຢ້ຽມຊົມການຜະລິດ ແລະ ຮັບຟັງການລາຍງານກ່ຽວກັບ ຜົນສຳເລັດດ້ານວຽກງານສິ່ງແວດລ້ອມ, ຄວາມປອດໄພ ແລະ ການພັດທະນາຊຸມຊົນຂອງບໍລິສັດ. LXML ເປັນວິສາຫະກິດແບບຢ່າງໃນ ສປປ ລາວ ແລະ ໄດ້ຮັບລາງວັນຍ້ອງຍໍລະດັບດີເລີດ (A+) ຢ່າງສະເໝີມາ

    ເຊິ່ງມອບໂດຍ ກະຊວງພະລັງງານ ແລະ ບໍ່ແຮ່ ໃນດ້ານການປະຕິບັດໄດ້ ຕາມມາດຕະຖານສາກົນດ້ານການຂຸດຄົ້ນບໍ່ແຮ່, ການປົກປັກຮັກສາສິ່ງແວດລ້ອມ, ການພັດທະນາຊຸມຊົນ ແລະ ມາດຕະຖານດ້ານຄວາມປອດໄພໃນການດຳເນີນໂຄງການ.

    ອະນູສອນສະຖານ-ຮູບຫຼໍ່ເຄິ່ງຄີງປະທານ ໄກສອນ ພົມວິຫານ ແມ່ນໄດ້ຮັບການກໍ່ສ້າງຈາກກອງທຶນພັດທະນາຊຸມຊົນ ທີ່ສະໜັບສະໜູນໂດຍ ບໍລິສັດ LXML.

    ນອກຈາກນີ້ແລ້ວ ໃນຜ່ານມາ ບໍລິສັດຍັງໄດ້ກໍ່ສ້າງຫໍວັດທະນະທຳເມືອງວິລະບູລີ ເພື່ອຊຸກຍູ້ການທ່ອງທ່ຽວໃນພາກພື້ນ ນຳອີກດ້ວຍ.
    ໃນຜ່ານມາ, ນັບແຕ່ປີ 2003, ກອງທຶນພັດທະນາຊຸມຊົນຂອງ LXML ໄດ້ລົງທຶນ US$10 ລ້ານ ສະໜັບສະໜູນເມືອງວິລະບູລີ ເພື່ອປັບປຸງຊີວິດການເປັນຢູ່ຂອງປະຊາຊົນ ໂດຍສອດຄ່ອງກັບ ແຜນພັດທະນາເສດຖະກິດ-ສັງຄົມແຫ່ງຊາດລາວ.

    ໃນຖານະຄູ່ຮ່ວມພັດທະນາສຳຄັນໃນ ສປປ ລາວ, LXML ມີຄວາມມຸ່ງໝັ້ນເປັນບໍລິສັດຂຸດຄົ້ນບໍ່ແຮ່ດີເລີດ ແລະ ສ້າງຄວາມອຸດົມຮັ່ງມີໃຫ້ແກ່ສັງຄົມ