ຄວາມຄືບໜ້າໂຄງການກໍ່ສ້າງຂົວຂ້າມນໍ້າຂອງ ລາວ-ໄທ ແຫ່ງທີ 5 ບໍລິຄຳໄຊ-ບຶງການ

0
81

ຂປລ. ໂຄງການກໍ່ສ້າງຂົວຂ້າມນໍ້າຂອງ ລາວ-ໄທ (ບໍລິຄໍາໄຊ-ບຶງການ) ໄດ້ເລີ່ມກໍ່ສ້າງໃນເດືອນສິງຫາ 2019, ເປັນໂຄງການເງິນກູ້ ຈາກອົງການຄວາມຮ່ວມມືທາງດ້ານເສດຖະກິດ ກັບປະ ເທດເພື່ອນບ້ານ (ອົງການມະຫາຊົນ) ຈາກປະເທດໄທ, (ອົງການ ນິດາ NEDA), ຊຶ່ງລັດຖະບານລາວ ໄດ້ຮັບເງິນກູ້ຢືມຈໍານວນ 1.380.067.000 ບາດ, ໄດ້ແບ່ງອອກເປັນ 2 ສັນຍາ ຄື: ສັນຍາ 1 ແມ່ນສັນຍາກໍ່ສ້າງຂົວນໍ້າຂອງ ແລະ ສັນຍາທີ 2 ແມ່ນສັນຍາ ກໍ່ສ້າງທາງເຊື່ອມຕໍ່ເຂົ້າຂົວ ແລະ ກໍ່ ສ້າງອາຄານດ່ານກວດຄົນ ເຂົ້າ-ອອກເມືອງ.ສໍາລັບຄວາມຄືບໜ້າຂອງໂຄງການ ໃນແຕ່ລະໜ້າວຽກງານການກໍ່ສ້າງ ມາຮອດປັດຈຸບັນ ປະ ຕິບັດສໍາເລັດດັ່ງນີ້: ສັນຍາທີ 1 (Package): ກໍ່ສ້າງຂົວກາງນໍ້າ ລວມທັງທາງເຂົ້າຫົວຂົວ, ປັດຈຸບັນ ໄດ້ເຂົ້າມາສໍາຫລວດ ຊີເຈາະໂຄງສ້າງຂັ້ນດິນ ແລະ ຫີນຢູ່ຈຸດທີ່ຕັ້ງເສົາຂົວ,

ຊຶ່ງນອນໃນເຂດຮົ້ວ ຟຣີໂຊນ ເທົ່ານັ້ນ, ໃນສັນຍາທີ 1 ມາຮອດວັນທີ 31 ພຶດສະພາ 2021, ແຜນການໃນເດືອນ 1,19% ປະຕິບັດໄດ້ 0,42% ຫລຸດຄາດໝາຍ -1,77% ເນື່ອງຈາກສະຖານະການແຜ່ລະບາດຂອງພະຍາດໂຄວິດ-19, ຜູ້ຮັບເໝົາຫລັກ (ຝ່າຍໄທ) ບໍ່ສາມາດເຂົ້າສະໜາມໄດ້. ສ່ວນສັນຍາທີ 2 ການກໍ່ສ້າງທາງເຊື່ອມຕໍ່ເຂົ້າຂົວ ແລະ ອາຄານດ່ານ ປັດຈຸບັນ ການກໍ່ສ້າງ ແຜນການ 4,27%, ປະຕິບັດໄດ້ຕົວຈິງ 6,31% ລື່ນຄາດໝາຍ +2,04%, ລວມຄວາມຄືບໜ້າທັງ 2 ສັນຍາແມ່ນປະຕິບັດໄດ້ +4,08%.ຈຸດທີ່ຕັ້ງຂອງໂຄງການຂົວຂ້າມນໍ້າຂອງ ມິດຕະພາບລາວ-ໄທ ແຫ່ງທີ 5 ບໍລິຄໍາໄຊ-ບຶງການ, ຕັ້ງຢູ່ບ້ານກ້ວຍອຸດົມ ເມືອງປາກຊັນ

ແຂວງບໍລິຄໍາໄຊ, ຫ່າງຈາກເທດສະບານເມືອງປາກຊັນ ໄປທາງທິດເໜືອຕາມທາງເລກ 13 ໃຕ້ ປະມານ 10 ກມ ແລະ ຫ່າງຈາກທາງເລກ 13 ໃຕ້ 2.860 ແມັດ. ໂຄງສ້າງຂົວຊ່ວງກາງນໍ້າ ເປັນລັກສະນະຂົວແຂວນ (Extradoses) ຢູ່ຊ່ວງກາງນໍ້າ ຮູບແບບຂາງເປັນຮູບກັບແບບມີປີກ (Box Girder) ແບ່ງອອກເປັນຫລາຍຊ່ວງ ທີ່ແຕກຕ່າງກັນ ຄື: ຊ່ວງທີ່ຢູ່ເທິງບົກ ມີ 16 ຊ່ວງ, ໃນນັ້ນຍາວ 40 ແມັດ, 8 ຊ່ວງ, ຍາວ 50 ແມັດ 8 ຊ່ວງ, ຢູ່ກາງນໍ້າມີ 5 ຊ່ວງ, ຍາວ 90 ແມັດ 2 ຊ່ວງ ແລະ ຍາວ 150 ແມັດ 3 ຊ່ວງ, ມີເສົາເທິງບົກ 18 ເສົາ ແລະ ເສົາສູງຄຶງສາຍກາບກາງນໍ້າ 4 ເສົາ, ລວງຍາວສະເພາະຂົວ ທັງໝົດ 1.350

ແມັດ ແລະ ມີທາງເຊື່ອມຕໍ່ຂຶ້ນຫົວຂົວ (Approach Road) ເບື່ອງລະ 85 ແມັດ, ລວງກວ້າງຂອງຂົວທັງໝົດ 17,30 ແມັດ. ສ່ວນໂຄງສ້າງທາງເຂົ້າຂົວ (Connecting) ປູດ້ວຍເບຕົງເສີມເຫລັກໜາ 25 ຊັງຕີແມັດ, ມີຄວາມກວ້າງທັງໝົດ 24,10 ແມັດ, ໃນນັ້ນມີຄອງລົດແລ່ນເບື້ອງລະ 2×3,50 ແມັດ, ມີບ່າທາງເບື້ອງລະ 2,50 ແມັດ, ມີດອນກາງທາງລວມທັງຂອບປ້ອງກັນ ກວ້າງ 5,10 ແມັດ, ສໍາລັບຈຸດປ່ຽນທິດທາງຈາລະຈອນ ແມ່ນໄດ້ກໍານົດຢູ່ເບື້ອງປະເທດລາວ, ໂດຍກໍານົດຄວາມກວ້າງຂອບເຂດສະຫງວນຂອງທາງເບື້ອງລະ 50 ແມັດ.
ຂໍ້ມູນ-ພາບ ຈາກເວບໄຊ: ກະຊວງ ຍທຂ