ເຈົ້າໜ້າທີ່ ເຂັ້ມງວດການຈັດລະບຽບເຮືອ ເດັດຂາດຕໍ່ຜູ້ລະເມີດ

0
24

ເຂັ້ມງວດຈັດລະບຽບເຮືອ ເດັດຂາດຕໍ່ຜູ້ລະເມີດ ກອງບັນຊາການ ປກສ ເມືອງຫາດຊາຍຟອງ ເພີ່ມທະວີເຂັ້ມງວດຕໍ່ການຈັດລະບຽບເຮືອ ທີ່ອອກຫາປາຕາມລຳແມ່ນ້ຳຂອງ, ໃນວັນທີ 11 ມີຖຸນາ 2021, ພັທ ແສງທອງ ເກື້ອບຸນລ່ຳ ຫົວໜ້າກອງບັນຊາການ ປກສ ເມືອງຫາດຊາຍຟອງ ສົມທົບກັບ ພັຕ ເມດຕາ ອ່ອນສີວັນນະລິດ ຮອງຫົວໜ້າການທະຫານ ກອງບັນຊາການທະຫານ ເມືອງຫາດຊາຍຟອງ ເຜີຍແຜ່ຄຳສັ່ງຂອງ ປກສ ເມືອງຫາດຊາຍຟອງ ສະບັບເລກທີ 006/ປກສຫຟ ໃຫ້

ຫົວໜ້າຊາວປະມົງ ຈຳນວນ 81 ຄົນ ໄດ້ຮັບຮູ້ ແລະ ເຂົ້າໃຈ ເພື່ອນຳໄປເຜີຍແຜ່ ໃຫ້ສະມາຊິກເຮືອທີ່ຢູ່ໃນຄວາມຮັບຜິດຊອບຂອງຕົນ ໃນໄລຍະປ້ອງກັນ ແລະ ຕ້ານພະຍາດໂຄວິດ-19.ເນື້ອໃນແຈ້ງການ ແມ່ນເນັ້ນໃສ່ການເພີ່ມທະວີຄວາມເຂັ້ມງວດ ໃນການຄຸ້ມຄອງ, ນຳໃຊ້ເຮືອປະເພດຕ່າງໆ ຕາມແມ່ນ້ຳຂອງ ເຈົ້າຂອງເຮືອ ແລະ ເຮືອໃຊ້ເວລາອອກຫາປາໄດ້ ເລີ່ມແຕ່ເວລາ 6:00ໂມງເຊົ້າ ຫາ 18:00 ໂມງ (ໃຫ້ນໍາເຮືອເຂົ້າຈອດທຽບທ່າ ຕາມຈຸດທີ່ກຳນົດໄວ້), ເຮືອແຕ່ລະລຳຕ້ອງໄດ້ຂຶ້ນ

ທະບຽນ, ມີເລກຂອງເຮືອແຕ່ລະລຳ, ໃນນັ້ນຕ້ອງໄດ້ແຕ່ງຕັ້ງເປັນກຸ່ມ ຫຼື ສະມາຄົມເຮືອຄັກແນ່, ກຳນົດຈຸດຈອດເຮືອໃຫ້ຊັດເຈນ, ພາຍຫຼັງເຄື່ອນໄຫວກິດຈະກຳຕ່າງໆ ແຕ່ລະວັນແມ່ນ ໃຫ້ມາຈອດໄວ້ທ່າເຮືອ ທີ່ທາງເຈົ້າໜ້າທີ່ໄດ້ກຳນົດໄວ້ ແລະ ຕ້ອງຢູ່ພາຍໃຕ້ການຄຸ້ມຄອງຂອງສະມາຄົມເຮືອ ແລະ ອຳນາດການປົກຄອງບ້ານ; ຫ້າມເຈົ້າຂອງເຮືອ ຂັບຂີ່ເຮືອ ຫຼື ໄຫຼມອງຫາປາໄປກາຍເຂດແດນ (ເຂົ້າໄປເຂດແດນຂອງປະເທດໄທ) ຖ້າບຸກຄົນໃດລະເມີດຈະຖືກຮຽກຕົວມາສືບສວນ-ສອບສວນ

ແລະ ປະຕິບັດຕາມກົດໝາຍຂອງ ສ ປປ ລາວ ວາງອອກ, ຫ້າມນຳເຮືອເພື່ອຂົນສົ່ງສິນຄ້າເຖື່ອນ, ສິນຄ້າເກືອດຫ້າມ ແລະ ຢາເສບຕິດທຸກປະເພດ, ກໍລະນີເອົາເຮືອຂອງຕົນເອງໃຫ້ຄົນອື່ນຢືມ ຫຼື ເຊົ່າ ຕ້ອງໄດ້ແຈ້ງໃຫ້ຫົວໜ້າຈຸເຮືອທີ່ຕົນສັງກັດຢູ່ຮັບຊາບ, ກໍລະນີເຈົ້າໜ້າທີ່ພົບເຫັນຜູ້ລະເມີດ: ຄັ້ງທີ 1 ຈະຖືກສຶກສາອົບຮົມ, ພ້ອມທັງປັບໃໝ 1.000.000 ກີບ, ຄັ້ງທີ 3 ຈະຖືກປັບໃໝ 2.000.000 ກີບ, ພ້ອມທັງຢຶດເຮືອ ແລະ ຈັກໄວ້ເປັນຂອງລັດ ແລະ ຖືກດຳເນີນຄະດີຕາມ

ລະບຽບກົດໝາຍທີ່ໄດ້ວາງອອກ.ທ່ານ ຫົວໜ້າກອງບັນຊາການ ປກສ ເມືອງຫາດຊາຍຟອງ ໄດ້ຮຽກຮ້ອງໃຫ້ພໍ່ແມ່ປະຊາຊົນທຸກຊັ້ນຄົນ ໂດຍສະເພາະແມ່ນປະຊາຊົນເມືອງຫາດຊາຍຟອງ ເປັນເຈົ້າການປະຕິບັດພັນທະຂອງຕົນ ເປັນຫູເປັນຕາຊ່ວຍເຈົ້າໜ້າທີ່ ໃນການສະກັດກັ້ນການລັກລອບເຂົ້າ-ອອກເມືອງ ເພື່ອປ້ອງກັນ, ສະກັດກັ້ນ ແລະ ຕ້ານພະຍາດໂຄວິດ-19.