ເຈົ້າໜ້າທີ່ພາສີ ຮ່ວມກັບ ເຈົ້າໜ້າທີ່ກັກກັນພືດປະຈຳດ່ານ ທຳລາຍພືດ-ຜັກສິນຄ້າຄວບຄຸມທີ່ນຳເຂົ້າບໍ່ຖືກລະບຽບ

    0
    161

     

    ໃນວັນທີ 11 ມິຖຸນາ 2021 ທີ່ສະຖານີກັກກັນພືດ ບ້ານດົງໂພສີ ເມືອງຫາດຊາຍຟອງ ນະຄອນຫຼວງວຽງຈັນ, ເຈົ້າໜ້າທີ່ພາສີປະຈຳດ່ານພາສີສາກົນຂົວມິດຕະພາບI ຮ່ວມກັບເຈົ້າໜ້າທີ່ກັກກັນພືດ ປະຈຳດ່ານສາກົນຂົວມິດຕະພາບລາວ-ໄທI (ນະຄອນຫຼວງວຽງຈັນ-ໜອງຄາຍ)

    ໄດ້ຈັດພິທີທຳລາຍພືດຜັກສິນຄ້າຄວບຄຸມທີ່ນຳເຂົ້າບໍ່ຖືກຕ້ອງຕາມລະບຽບ, ໂດຍມີທ່ານ ຂາວພອນ ບາສີໂສມ ຮອງຫົວໜ້າໜ່ວຍງານກວດກາສິນຄ້າ ປະຈຳດ່ານພາສີສາກົນຂົວມິດຕະພາບI ແລະ ທ່ານ ວັນນາ ຄຳໂພໄຊ ຫົວໜ້າໜ່ວຍງານປ້ອງກັນ ແລະ ກັກກັນພືດ, ພ້ອມດ້ວຍພະນັກງານວິຊາການ ແລະ ຂະແໜງການກ່ຽວຂ້ອງເຂົ້າຮ່ວມທຳລາຍ.

    ສຳລັບພືດຜັກທີ່ນຳມາທຳລາຍໃນຄັ້ງນີ້, ແມ່ນໜ່ວຍງານກວດກາສິນຄ້າປະຈຳດ່ານພາສີສາກົນຂົວມິດຕະ ພາບI ສາມາດຢຶດໄດ້ໃນເວລາ 10:00 ໂມງຂອງວັນທີ 10 ມີຖຸນາ 2021 ຜ່ານມາ,ທີ່ນຳເຂົ້າຜ່ານດ່ານສາກົນໂດຍບໍ່ມີໃບອະນຸຍາດຢັ້ງຢືນຄຸນນະພາບຈາກພາກສ່ວນທີ່ກ່ຽວຂ້ອງ, ຊຶ່ງປະກອບມີໝາກເລັ່ນຈຳນວນ 675 ກິໂລກະຣາມ, ໜໍ່ໄມ້ຝະລັ່ງ 20 ກິໂລກະຣາມ ແລະ ຂີງສົດ 114 ກິໂລກະຣາມລວມນໍ້າໜັກທັງໝົດ 809 ກິໂລກະຣາມ.

    ນັບແຕ່ຕົ້ນປີຕົ້ນປີ 2021 ມາຮອດປັດຈຸບັນເຈົ້າໜ້າທີ່ພາສີປະຈຳດ່ານພາສີສາກົນຂົວມິດຕະພາບI ໄດ້ສົມທົບກັບໜ່ວຍງານງານປ້ອງກັນ ແລະ ກັກກັນພືດປະຈຳດ່ານ, ປະຕິບັດລະບຽບຕໍ່ຜູ້ກະທໍາຜິດທີ່ນໍາເຂົ້າສິນຄວບຄຸ້ມ ແລະ ຫ້າມນໍາເຂົ້າທີ່ຜິດລະບຽບໄດ້ທັງໝົດ 5 ຄັ້ງລວມທັງໝັກທັງໝົດຈໍານວນ 2.746 ກິໂລກະຣາມ, ຄິດເປັນມູນຄ່າປະມານ 11.860.000 ກີບ.

    ສ່ວນໃນປີ 2020 ຜ່ານມາເຈົ້າໜ້າທີ່ພາສີປະຈຳດ່ານພາສີສາກົນຂົວມິດຕະພາບI ໄດ້ສົມທົບກັບໜ່ວຍງານງານປ້ອງກັນ ແລະ ກັກກັນພືດ, ປະຕິບັດລະບຽບຕໍ່ຜູ້ກະທໍາຜິດທີ່ນໍາເຂົ້າສິນຄວບຄຸມ ແລະ ຫ້າມນໍາເຂົ້າທີ່ຜິດລະບຽບໄດ້ 11 ຄັ້ງຈໍານວນ 13.801 ກິໂລກະຣາມ, ຄິດເປັນມູນຄ່າ 76.239.640 ກີບ.

    ໃນພິທີທຳລາຍພືດຜັກສິນຄ້າຄວບຄຸມທີ່ນຳເຂົ້າບໍ່ຖືກລະບຽບຄັ້ງນີ້,ທ່ານ ຂາວພອນ ບາສີໂສມ ຮອງຫົວໜ້າໜ່ວຍງານກວດກາສິນຄ້າປະຈຳດ່ານພາສີສາກົນຂົວມິດຕະພາບI ໄດ້ຮຽກຮ້ອງມາຍັງພໍ່ແມ່ປະຊາຊົນຊາວຄ້າຂາຍຈົ່ງໄດ້ກວດສອບສິນຄ້າທີ່ນຳເຂົ້າມາຂາຍໃຫ້ຖືກຕ້ອງຕາມລະບຽບການທີ່ກຳນົດໄວ້

    ແລະ ໃບອະນຸຍາດຢັ້ງຢືນຄຸນນະ ພາບຈາກພາກສ່ວນທີ່ກ່ຽວຂ້ອງບໍ່ມີສານເຄມີປົນເປືອນ, ພ້ອມທັງຮຽກຮ້ອງໃຫ້ຫັນມານຳໃຊ້ຜະລິດຕະພັນພາຍໃນບ້ານເຮົານຳອີກດ້ວຍ.