ແບບຢ່າງທີ່ດີ..!!! ປົກຄອງແຂວງ ປະກອບສ່ວນຊີມັງ 60 ໂຕ່ນ ໂຄງການເສັ້ນທາງເບຕົງຮ່ວມໃຈ ພາຍໃນ3 ​ບ້ານ

    0
    45

    ໃນວັນທີ 11 ມິຖຸນາ 2021 ນີ້ ຢູ່ຫ້ອງການບ້ານ ນາແຫນ ທ່ານ ປອ ກອງແກ້ວ ໄຊສົງຄາມ ເຈົ້າແຂວງ ບໍລິຄຳໄຊພ້ອມຄະນະ ຕາງໜ້າໃຫ້ຄະນະພັກ,ຄະນະປົກຄອງແຂວງ ໄດ້ນຳເອົາຊີມັງຈຳນວນ 60 ໂຕນ ມູນຄ່າ 37 ລ້ານກວ່າກີບ ໄປມອບໃຫ້ ອຳນາດການປົກຄອງບ້ານ ນາແຫນ,ວັດທາດ ແລະ ບ້ານ ໂພນມຸງຄຸນ ເມືອງ ບໍລິຄັນ ໂດຍມີທ່ານ ວັນເລີນ ປູ້ຍໄມນີ ເຈົ້າເມືອງ ບໍລິຄັນ,ກອງກໍ່ສ້າງຮາກຖານປະຈຳກູ່ມເທດສະບານ ແລະ ອຳນາກການປົກຄອງບ້ານເຂົ້າຮ່ວມ.


    ໂຄງການກໍ່ສ້າງເສັ້ນທາງເບຕົງຮ່ວມໃຈ 3 ບ້ານເທດສະບານເມືອງ ບໍລິຄັນຄື ບ້ານ ນາແຫນ,ວັດທາດ ແລະ ບ້ານ ໂພນມຸງຄຸນ ແມ່ນໄດ້ເລີ່ມຕົ້ນຈັດຕັ້ງປະຕິບັດມາຕັ້ງແຕ່ວັນທີ 4 ມິຖຸນາ 2021 ເປັນຕົ້ນມາ ໂດຍແມ່ນທຶນສົມທົບລະຫວ່າງອົງການປົກເມືອງ ແລະ ພໍ່ແມ່ປະຊົນ ແລະ ທຸກພາກສ່ວນໃນສັງຄົມ ເຊີ່ງມີຄວາມຍາວໄລຍະທາງທັງໝົດ 1.600 ແມັດ,ກວ້າງ 6 ແມັດ ແລະ ມີຄວາມໜາ 15 ຊັງຕີແມັດ.ໃນນັ້ນ ບ້ານ ນາແຫນ ໄລຍະທາງມີຄວາມຍາວ 390​ ແມັດ,

    ບ້ານ ວັດທາດ ໄລຍະທາງຍາວ 290 ແມັດ ແລະ ບ້ານ ໂພນມຸງຄຸນ ໄລຍະທາງຍາວ 920 ແມັດສຳລັບການຈັດຕັ້ງປະຕິບັດບັນດາໜ້າວຽກ ແມ່ນມີພະນັກງານກອງກໍ່ສ້າງຮາກຖານປະຈຳກູ່ມເທດສະບານ ແລະ ພະນັກງານວິຊາການຫ້ອງການ ໂຍທາທິການ ແລະ ຂົນສົ່ງເມືອງ ຊຸກຍູ້,ຕິດຕາມ ທາງດ້ານເຕັກນິກວິຊາການ ສຳລັບແຮງງານແມ່ນປະຊາຊົນພາຍໃນບ້ານ ໂດຍລວມແລ້ວໃນແຕ່ລະວັນຄາດວ່າຈະໃຫ້ໄດ້ປະມານ 15-20 ແມັດມາຮອດປະຈຸບັນບ້ານ ນາແຫນ ສາມາດສ້າງສໍາເລັດ 100 ກວ່າແມັດ,

    ສຳລັບ ບ້ານ ວັດທາດ ແລະ ບ້ານ ໂພນມຸງຄຸນ ຈະໄດ້ເລີ່ມລົງມືປະຕິບັດໃນກາງເດືອນ ມິຖຸນາ 2021 ນີ້ ໂອກາດດັ່ງກ່າວ ທ່ານ ເຈົ້າແຂວງ ຍັງໄດ້ຍ້ອງຍໍຊົມເຊີຍ ອົງການປົກຄອງເມືອງ,ອຳນາດການປົກຄອງຂັ້ນບ້ານ ແລະ ພໍ່ແມ່ປະຊາຊົນ ທີມີຄວາມສາມັກຄີປອງດອງ ຮ່ວມແຮງຮ່ວມໃຈສ້າງສາພັດທະນາບ້ານໃຫ້ມີໃບໜ້າໃໝ່ ພ້ອມນັ້ນທ່ານ ຍັງໄດ້ເນັ້ນໃຫ້ອຳນາດການປົກຄອງທ້ອງຖິ່ນຈົ່ງໄດ້ ລົງຊຸກຍູ້,ຕິດຕາມ ການປະຕິບັດໜ້າທີ່ວຽກງານໃຫ້ເປັນປົກກະຕິ ໂດຍສະເພາະແມ່ນ ຫ້ອງການໂຍທາທິການ ແລະ ຂົນສົ່ງຂັ້ນເມືອງ ຈົ່ງໄດ້ເປັນເຈົ້າການທາງດ້ານເຕັກນິກ,ວິຊາການ ທັ້ງນີ້ກໍ່ເພື່ອຮັບປະກັນທາງດ້ານປະລິມານ ແລະ ຄຸນນະພາບ.

    ຂ່າວ_ພາບ:ສາຍສະຫມອນ