ອ່ານດ່ວນ ໃຜນອນໃນເງື່ອນໄຂນີ້ ຈະໄດ້ຮັບວັກແຊງ ຟາຍເຊີ ທີ່ຈະເປີດສັກສະເພາະ ນວ ເທົ່ານັ້ນ

0
148

ທ່ານ ພອນປະເສີດ ອຸນາພົມ ຫົວໜ້າກົມອະນາໄມ ແລະ ສົ່ງເສີມສຸຂະພາບ ໄດ້ກ່າວໃນໂອກາດເຂົ້າຮ່ວມຖະແຫຼງຂ່າວໂຄວິດ-19 ປະຈຳວັນທີ 7 ມິຖຸນາ 2021 ວ່າ: ມາຮອດວັນທີ 6 ມິຖຸນາ 2021 ທົ່ວປະເທດລາວ ໄດ້ມີຜູ້ໄປຮັບວັກແຊງ ເຂັມທີ 1 ໄປແລ້ວ ຈຳນວນ 686.794 ໂດສ ກວມເອົາ 9,36% ຂອງຈຳນວນປະຊາກອນ ແລະ ເຂັມທີ 2 ຈຳນວນ 313.402 ໂດສ ກວມເອົາ 4,27% ຂອງຈຳນວນປະຊາກອນໃນລາວ. ດັ່ງນັ້ນມາຮອດປະຈຸບັນ ແຕ່ລະຈຸດ ແລະ ລະໂຮງໝໍ ຈະເອົາໃຈໃສ່ສັກຢາເຂັມທີ 1 ແລະ ເຂັມທີ 2 ທີ່ເປັນຢາຊະນິດ ຊີໂນຟາມ (sinopharm) ແລະ ແອສຕາ ຊີນີກາ (astrazeneca) ໃຫ້ບັນລຸຕາມຄາດໝາຍ.

ສ່ວນວັກແຊງ ຟາຍເຊີ pfizer ທີ່ໄດ້ຮັບມາໃໝ່ນັ້ນ ແມ່ນທາງຄະນະສະກິດ ຕົກລົງຈະສັກໃຫ້ຢູ່ແຕ່ໃນນະຄອນຫຼວງວຽງຈັນ ເນື່ອງຈາກວ່າ ວັກຊີນຊະນິດດັ່ງກ່າວແມ່ນຈະຕ້ອງຮັກສາໃນລະບົບເຢັນ – 80 ອົງສາເຊ, ໂດຍມອບໃຫ້ກົມອະນາໄມ – ສົ່ງເສີມສຸຂະພາບ ແລະ ສູນສຸຂະພາບແມ່ ແລະ ເດັກ ຈັດການຝຶກອົບຮົມທາງດ້ານວິຊາການໃຫ້ກັບທີມງານຂັ້ນສູນກາງ, ຂັ້ນນະຄອນຫຼວງ ແລະ ເມືອງທີ່ຂຶ້ນກັບ ໃຫ້ມີຄວາມເຂົ້າໃຈເປັນເອກະພາບ ແລະ ມີຄວາມປອດໄພ ໃນການຈັດຕັ້ງປະຕິບັດ. ກຸ່ມເປົ້າໝາຍ ທີ່ຈະພິຈາລະນາ ໃນການຮັບວັກຊີນຄັ້ງນີ້ ທີ່ຍັງບໍ່ໄດ້ສັກວັກຊີນປ້ອງກັນພະຍາດ ໂຄວິດ-19 ຊະນິດອື່ນມາກ່ອນ ປະກອບມີ: ກຸ່ມຄົນທີ່ມີ

ອາຍຸ 60 ປີ ຂຶ້ນໄປ ໃຫ້ກວດເບິ່ງບັດປະຈຳຕົວ ຫຼື ສຳມະໂນຄົວ ຫຼື ຫຼັກຖານຢືນຢັນອື່ນໆ ທີ່ບົ່ງບອກອາຍຸ; ກຸ່ມຄົນທີ່ມີຄວາມສ່ຽງສູງ ເຊັ່ນ ພະນັກງານລັດຖະກອນ,
ແພດໝໍ, ຜູ້ເຮັດວຽກຢູ່ຕາມຈຸດຜ່ານແດນດ່ານສາກົນ, ຜູ້ທີ່ ມີການເດີນທາງເຂົ້າອອກໄປຕ່າງປະເທດ ຊຶ່ງບໍ່ສາມາດຮັບວັກຊີນຊະນິດອື່ນໄດ້ ໃນໄລຍະຜ່ານມາ, ໃຫ້ກວດເບິ່ງບັດ ຫຼື ເອກະສານຢັ້ງຢືນການເຮັດວຽກ; ຜູ້ມີພະຍາດປະຈໍາໂຕ ເຊັ່ນ: (ພະຍາດກ່ຽວຂ້ອງກັບໜາກໄຂ່ຫຼັງ, ຜູ້ມີຄວາມດັນເລືອດສູງ, ເບົາຫວານ,

ພະຍາດທາງເດີນຫາຍໃຈ, ພະຍາດຕັບ, ມະເຮັງ, ພະຍາດຕຸ້ຍ, ມະເຮັງ, ຜູ້ທີ່ມີຄວາມປົກຜ່ອງທາງດ້ານພູມຄຸ້ມກັນ ລວມທັງຜູ້ທີ່ມີການປ່ຽນຖ່າຍອະໄວຍະວະ, ຜູ້ທີ່ມີຄວາມຜິດປົກກະຕິ ທາງດ້ານພັນທຸກໍາມາແຕ່ກໍາເນີດ (Down syndrome). ຊຶ່ງແພດ ໝໍ ຢູ່ ຈຸດສັກຢາຈະເປັນ ຜູ້ ພິ ຈາລະນາ ແລະ ກວດເບິ່ງຫຼັກຖານການປິ່ນປົວ ຫຼື ການບົ່ງມະຕິພະຍາດ (ໃຫ້ ມີເອກະສານຢັ້ງຢືນປະຫວັດການປິ່ນປົວ).ທ່ານກ່າວຕື່ມວ່າ: ໃຫ້ອຳນາດການປົກຄອງທ້ອງຖິ່ນຂັ້ນເມືອງ, ຂັ້ນບ້ານ ຂອງ
ນະຄອນຫຼວງວຽງຈັນ ຂື້ນບັນຊີກຸ່ມເປົ້າໝາຍ ທີ່ໄດ້ກໍານົດໄວ້ຂ້າງເທິງນັ້ນ ໃຫ້ສຳເລັດກ່ອນວັນທີ 15 ມີຖຸນາ 202 1, ພ້ອມທັງປູກລະດົມກຸ່ມເປົ້າໝາຍ ເຂົ້າເຖິງ

ການບໍລິການ ຕາມຈຸດບໍລິການ ແລະ ເວລາທີ່ກໍານົດໄວ້ (ແຕ່ວັນທີ 16 ເຖີງ ວັນທີ 30 ມິຖຸນາ 2011 ໃຫ້ສໍາເລັດ ເຂັມທີ 01, ສ່ວນເຂັມທີ 02 ໃຫ້ຫ່າງກັນ 21-28 ວັນ). (ມີຟອມເກັບກຳຕິດຂັດດ້ານຫຼັງ).ການຈັດຕັ້ງສັກຢາຄັ້ງນີ້ ແມ່ນ ໃຫ້ມີຄວາມຮັບປະກັນທາງດ້ານຄຸນນະພາບຂອງວັກຊີນ ກ່ຽວກັບເລື້ອງລະບົບເຢັນ ແລະ ຄວາມປອດໄພຂອງການໃຫ້ບໍລິການ ໂດຍສະເພາະຫ້ອງສຶກ ແລະ ຈຸດປົນນ້ຳກັ່ນ ຈະຕ້ອງຢູ່ໃນຫ້ອງທີ່ມິຄວາມເຢັນຕ່ໍາກວ່າ 25 ອົງສາເຊ (ຫ້ອງແອ). ພ້ອມທັງປະຕິບັດ ໄລຍະຫ່າງ 01 ແມັດ, ແທກອຸຫະພູມ ແລະ ໃສ່ຜ້າອັດປາກ-ດັງ.