ກົມໃຫຍ່ພະລາທິການກອງທັບ ປິດຊຸດອົບຮົມທະຫານໃໝ່ປະຈຳປີ 2020

    0
    127

    ໃນວັນທີ 28 ພຶດສະພາ 2021 ນີ້, ຢູ່ທີ່ສູນຝຶກກອງຜະລິດກະສິກຳເລກ 6 ກອງທັບ ໄດ້ຈັດຕັ້ງພິທີປິດຊຸດອົບຮົມທະໃໝ່ ຂອງກົມໃຫຍ່ພະລາທິການກອງທັບປະຈຳປີ 2020 ໂດຍການເຂົ້າຮ່ວມເປັນປະຂອງສະຫາຍ ພົນຈັດຕະວາ ບຸນສູງ ຢາທໍ່ຕູ້ ກຳມະການຄະນະພັກກະຊວງປ້ອງກັນປະເທດ ຮອງຫົວໜ້າກົມໃຫຍ່ພະລາທິການກອງທັບ, ມີຮອງກົມ, ຄະນະພັກ-ຄະນະບັນຊາກົມກອງອ້ອມຂ້າງ ພ້ອມຄະນະຄູຝຶກ ແລະ ພະນັກງານ-ນັກຮົບທະຫານໃໝ່ເຂົ້າຮ່ວມ.

    ສະຫາຍພັນໂທ ໂຄລົບ ໄພຈິດ ຫົວໜ້າກອງຜະລິດກະສິກຳເລກ 6 ກອງທັບ, ຄະນະຮັບຜິດຊອບສູນຝຶກທະຫານໃໝ່ ໄດ້ຂື້ນຜ່ານບົດສະຫຼຸບລາຍງານ ຜົນຂອງການຈັດຕັ້ງປະຕິບັດອົບຮົມ-ຫັດແອບ ໃຫ້ທະຫານໃໝ່ປະຈຳປີ 2020 ຂອງກົມໃຫຍ່ພະລາທິການກອງທັບ ເຊິ່ງໄດ້ຈັດຕັ້ງປະຕິບັດຕາມແຜນການອົບຮົມຫັດແອບມາແຕ່ວັນທີ 1 ກຸມພາ 2021 ຫາ ເດືອນພຶດສະພາ 2021, ລວມໄລຍະອົບຮົມຫັດແອບ 3 ເດືອນກ່ວາ, ໂດຍມີທະຫານໃໝ່ເຂົ້າອົບຮົມຫັດແອບ ຈຳນວນ 116 ສະຫາຍ, ຍິງ 44 ສະຫາຍ,ໄດ້ຈັດຕັ້ງຮ່ຳຮຽນພາກວິຊາຕ່າງໆທັງພາກທິດສະດີ ແລະ ປະຕິບັດຕົວຈີງໄປພ້ອມ ເຊິ່ງສາມາດຕີລາຄາຜົນຂອງການສອບເສັງຕົວຈີງ ໄດ້ໃນໄລຍະຜ່ານມາຄື: ພາກວິຊາທິດສະດີການເມືອງ ຂັ້ນເກັ່ງເທົ່າກັບ 84%, ກາງເທົ່າກັບ16%, ພາກວິຊາລະບຽບງົດງາມ ເກັ່ງເທົ່າກັບ 66%, ກາງເທົ່າກັບ 34%, ພາກວິຊາການທະຫານ ເກັ່ງເທົ່າກັບ 98%, ກາງເທົ່າກັບ2%, ພາກວິຊາສິນລະປະຍຸດ ເກັ່ງເທົ່າກັບ 99%, ກາງເທົ່າກັບ 1%, ພາກວິຊາຍຸດທະວິທີທະຫານຮາບເກັ່ງເທົ່າກັບ 98%,ກາງເທົ່າກັບ 2% ແລະ ພາກວິຊາພະລາທິການ ເກັ່ງເທົ່າກັບ 89,ກາງເທົ່າກັບ11%.

    ສັງລວມແລ້ວການຝຶກອົບຮົມທະຫານໃໝ່ແມ່ນສາມາດສອບເສັງໄດ້ບັນລຸຕາມລະດັບຄາດໝາຍທີ່ວາງໄວ້ຢ່າງມີຜົນສຳເລັດ ແລະ ມີຄວາມປອດໄຟ 100%. ໃນພິທີສະຫາຍພັນໂທ ປອ ສົມພິດ ແກ້ວວັນທອງ ຮອງຫົວໜ້າກົມເສນາພະລາ ກົມໃຫຍ່ພະລາທິການກອງທັບ ຍັງໄດ້ຂື້ນ ມອບໃບຢັ້ງຢືນອົບຮົມທະຫານໃໝ່ ປະຈຳປີ 2020 ແລະ ປະກາດເລື່ອນຊັ້ນໃຫ້ທະຫານໃໝ່ຈຳນວນ116ສະຫາຍ, ຈາກຊັ້ນ ll ຂື້ນຊັ້ນ l ໃຫ້ຢ່າງສົມກຽດ. ໂອກາດນີ້ສະຫາຍ ພົນຈັດຕະວາ ບຸນສູງ ຢ່າທໍ່ຕູ້ ກໍ່ໄດ້ໂອ້ລົມຕໍ່ຄະນະຮັບຜິດຊອບສູນຝຶກກໍ່ຄື ຄູອາຈານ ແລະ ທະຫານໃໝ່ ທີ່ໄດ້ສຳເລັດໃນຄັ້ງນີ້ ເຊີ່ງສະຫາຍໄດ້ສະແດງຄວາມຍ້ອງຊົມເຊີນຕໍ່ ຜົນງານທີ່ຍາດມາໄດ້ ມັນແມ່ນຄວາມເປັນເຈົ້າການ, ຄວາມຮັບຜິດຊອບໃນການຄຸ້ມຄອງ, ບັນຊາ, ຖ່າຍທອດຄວາມຮູ້, ຄວາມສາມາດຕ່າງໆ ຂອງຄູ-ອາຈານ ແລະ ທະຫານໃໝ່ທີ່ຕັ້ງໜ້າ ແລະ ເອົາໃຈໃສ່ໃນບັ້ນຝຶກອົບຮົມຄັ້ງນີ້ ເຮັດໃຫ້ບັ້ນຝຶກອົບຮົມ ມີຜົນສຳເລັດສູງ,

    ພ້ອມນີ້ຍັງໄດ້ເນັ້ນໜັກໃຫ້ທະຫານໃໝ່ ຈົ່ງເອົາໃຈໃສ່ໃນການຝຶກຝົນ ຫຼໍ່ຫຼອມ ຕົນເອງຮອບດ້ານ,ຕັ້ງໜ້າປະກອບສ່ວນເຂົ້າໃນວຽກງານປັບປຸງກໍ່ສ້າງກົມໃຫ້ມີໃບໜ້າອັນໃໝ່ ແລະ ມີຄວາມເຂັ້ມແຂງ – ໜັກແໜ້ນໃນທຸກດ້ານ, ເປັນແບບຢ່າງທີ່ດີໃນການປະຕິບັດລະບຽບວິໄນຂອງກອງທັບ, ກໍ່ຄືຂອງກົມກອງຂອງຕົນຢ່າງເຂັ້ມງວດ, ນຳເອົາບົດຮຽນຕ່າງໆ ທີ່ໄດ້ຮ່ຳຮຽນໄປຈັດຕັ້ງຜັນຂະຫຍາຍເຂົ້າໃນວຽກງານ ວິຊາສະເພາະ, ມີແບບແຜນວິທີເຮັດວຽກ ກໍ່ຄືແບບແຜນດຳລົງຊີວິດໃຫ້ມີການພັດທະນາດີຂື້ນ ເພື່ອປະກອບສ່ວນສ້າງກອງທັບມີແບບແຜນທັນສະໄໝຂື້ນຢ່າງບໍ່ຢຸດຢັ້ງ.

    ທີ່ມາ: ຄຳໄພວັນ ສາຂາ