ຄືນນີ້ ກຽມຊົມ ຈັນທະຄາດ ປາກົດການທໍາມະຊາດ

    0
    54

    ຊວນເບິ່ງ ຈັນທະຄາດ ແລະ Super Moon ດວງເດືອນສີເລືອດ ພ້ອມກັນໃນຄືນວັນທີ 26 ພຶດສະພານີ້!! ຕັ້ງແຕ່ເວລາປະມານ 18:30-20:00 ຕາມຄວາມເຊື່ອອັນເກົ່າແກ່ວ່າ ເມື່ອໃດທີ່ເກີດປາກົດການດັງກ່າວ ໃຫ້ໄຂປະຕູເຫຼົ້າເຂົ້າ, ກະເປົາເງິນຄໍາ ແລ້ວເອົາມາເຄາະ ອາທິຖານ ໃຫ້ມີເງິນຫຼັງໄຫຼເຂົ້າມານັ້ນເອງ (ເປັນຄວາມເຊື່ອສ່ວນບຸກຄົນເດີ້)

    ດວງເດືອນຈະເລີ່ມເຂົ້າສູ່ເງົາມົວຕັ້ງແຕ່ເວລາ 15:47 ແລະ ຈະເລີ່ມເຄື່ອນຕົວເຂົ້າສູ່ເງົາມືດຂອງໂລກໃນເວລາ 16:44 ຫຼັງຈາກນັ້ນຈະເລີ່ມເຂົ້າສູ່ປາກົດການຈັນທະຄາດເຕັມຕົວຕັ້ງແຕ່ເວລາ 18:11-18:25.

    ສຳລັບໃຜທີ່ຢາກສັງເກດເບິ່ງ ແມ່ນສັງເກດທ້ອງຟ້າທາງທິດຕາເວັນອອກ ສຳລັບປະເທດລາວອາດຈະເຫັນໄດ້ຊັດເຈນທີ່ສຸດຕອນ 18:38. ນັກວິທະຍາສາດຄາດການວ່າ ມັນອາດຈະເປັນຈັນທະຄາດຄັ້ງດຽວໃນປີ 2021 ຕ່າງຈາກປົກກະຕິທີ່ມີຢ່າງໜ້ອຍປີລະ 2 ເທື່ອ.

    ນອກຈາກຈັນທະຄາດແລ້ວ ຍັງມີອີກປາກົດການໜຶ່ງທີ່ເກີດຂຶ້ນພ້ອມກັນນັ້ນແມ່ນ Super Moon ດວງເດືອນສີເລືອດ
    ນັກວິທະຍາສາດບອກວ່າມັນເປັນຊຸບເປີມູນສີເລືອດແຫ່ງລະດູດອກໄມ້ບານ (Super flower blood moon) ເຊິ່ງດວງເດືອນຈະເຂົ້າໃກ້ໂລກຫຼາຍຂຶ້ນ 157 Km, ໝາຍຄວາມວ່າມັນຈະໃຫຍ່ຂຶ້ນ 7% ແລະ ຍັງແຈ້ງຂຶ້ນອີກ 15%. ນັບເປັນປາກົດການດວງເດືອນທີ່ມີຄັ້ງດຽວໃນຮອບ 2 ປີເຄິ່ງ. ສາມາດເຫັນໄດ້ຊັດເຈນໃນພາກພື້ນອາຊີຕາເວັນອອກ, ອາເມຣິກາ ແລະ ພູມມີພາກໂອເຊອານີ.


    ປາກົດການຈັນທະຄາດເກີດຈາກດວງຕາເວັນ-ໂລກ-ດວງເດືອນ ໂຄຈອນມາຢູ່ໃນແນວດຽວກັນ ໂດຍມີໂລກຢູ່ລະຫວ່າງກາງ ແລະ ເປັນຈັງຫວະທີ່ດວງເດືອນໂຄຈອນເຂົ້າໄປໃນເງົາຂອງໂລກ ເຮັດໃຫ້ສາມາດເຫັນດວງຈັນທີ່ແຫວ່ງຫາຍໄປໃນເງົາມືດ ແລະ ປາກົດອອກມາອີກຄັ້ງ, ປາກົດການດັ່ງກ່າວຈະເກີດຂຶ້ນສະເພາະມື້ທີ່ເດືອນເພັງ ປີໜຶ່ງມີຢ່າງໜ້ອຍ 2 ເທື່ອ, ເຊິ່ງບາງປີມີຫຼາຍເຖິງ 5 ເທື່ອເລີຍ.

    ດວງເດືອນສີເລືອດ ເກີດພ້ອມຈັນທະຄາດ ໃນຂະນະທີ່ເກີດຈັນທະຄາດແບບເຕັມດວງນັ້ນ ເງົາຂອງໂລກຈະບົດບັງເອົາແສງຕາເວັນໄປເກືອບໝົດ ແຕ່ກໍຍັງມີບາງສ່ວນທີ່ລອດອອກມາຈາກຊັ້ນບັນຍາກາດຂອງໂລກໄປເຖິງດວງເດືອນ ເຮັດໃຫ້ເກີດການກັ່ນຕອງເອົາແສງສີຟ້າອອກໄປ ຈົນເຫັນດວງເດືອນເປັນສີແດງຈາງໆຄ້າຍກັບສີເລືອດນັ້ນເອງ.