ເມືອງ ຕົ້ນເຜິ້ງ ຜ່ອນຜັນໃຫ້ປະຊາຊົນຊາວຄ້າຂາຍ ນໍາເອົາສິນຄ້າກັບມາວາງຂາຍ ຢູ່ຕະຫຼາດເທສະບານເມືອງ

    0
    53

    ປະຈຸບັນເຖິງວ່າເມືອງ ຕົ້ນເຜິ້ງ ໄດ້ປີດບັນດາຕະຫຼາດພາຍໃນເມືອງ ຕາມແຈ້ງການຂອງຄະນະສະເພາະກິດເພືີ່ອປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການແຜ່ລະບາດ ຂອງພະຍາດ ໂຄວິດ – 19 ກໍ່ຄືພະແນກການ, ຫ້ອງທີ່ກ່ຽວຂ້ອງຂອງແຂວງ – ເມືອງ ເພຶ່ອຫຼີກລ່ຽງຄວາມແອອັດໃນການຊື້ – ຂາຍ ເຊິ່ງສ່ຽງຕໍ່ການຮັບ ແລະ ແຜ່ເຊື້ອພະຍາດ ໂຄວິດ – 19 ອອກເປັນວົງກວ້າງ ແຕ່ຍ້ອນມີຄວາມຈໍາເປັນໃນການດຳລົງຊີວິດປະຈຳວັນ ປະຊາຊົນຊາວຄ້າຂາຍພາຍໃນເມືອງຈໍານວນໜຶ່ງຈຶ່ງໄດ້ນໍາເອົາສິນຄ້າ ເຄື່ອງອຸປະໂພກ – ບໍລິໂພກ ມາວາງຂາຍຕາມສອງຂ້າງທາງ

    ເຊິ່ງຍິ່ງເປັນການເພີ່ມຄວາມແອອັດໃນການຊື້ – ຂາຍ ແລະ ສ່ຽງຕໍ່ການເກີດອຸປະຕິເຫດຕາມທ້ອງຖະໜົນ. ຍ້ອນສະພາບການດັ່ງກ່າວ ເພື່ອເຮັດໃຫ້ເສດຖະກິດ ຊີວິດການເປັນຢູ່ຂອງປະຊາຊົນ ແລະ ມາດຕະການເຝົ້າການແຜ່ລະບາດ ຂອງພະຍາດ ໂຄວິດ – 19 ມີຄວາມດຸ່ນດ່ຽງກັນ ຄະນະສະເພາະກິດເມືອງຕົ້ນເຜິ້ງ ຈຶ່ງໄດ້ມີການຜ່ອນຜັນ ໂດຍມອບໃຫ້ອຳນາດການປົກຄອງບ້ານໃຫຍ່ ຕົ້ນເຜິ້ງ ແລະ ຂະແໜງການທີ່ກ່ຽວຂ້ອງຈັດສັນສະຖານທີ່ຕະຫຼາດເທສະບານເມືອງຄືນໃໝ່ ໂດຍສະເພາະແມ່ນການຈັດສັນໄລຍະຫ່າງໃນການຕັ້ງໂຕະວາງຂາຍສິນຄ້າ ໃຫ້ຫ່າງກັນຢ່າງໜ້ອຍ 3 ແມັດ ແລະ ແຈ້ງໃຫ້ປະຊາຊົນຊາວຄ້າຂາຍນໍາເອົາສິນຄ້າມາວາງຂາຍຢູ່ຕະຫຼາດເທສະບານເມືອງ ບ່ອນເກົ່າ ເລີ່ມແຕ່ ຕອນເຊົ້າ ວັນທີ 19 ພຶດສະພາ 2021 ນີ້

    ໂດຍໃຫ້ປະຊາຊົນທັງຜູ້ຂາຍ ແລະ ຜູ້ມາຊື້ຢູ່ພາຍໃນຕະຫຼາດປະຕິບັດມາດຕະການປ້ອງກັນການແຜ່ລະບາດ ຂອງພະຍາດ ໂຄວິດ – 19 ຢ່າງເຂັ້ມງວດ ດ້ວຍການຮັກສາໄລຍະຫ່າງຢ່າງໜ້ອຍ 2 ແມັດ, ໃສ່ຜ້າອັດປາກ – ດັງ ແລະ ປະຕິບັດຫຼັກສຸຂະອະນາໄມອື່ນໆ ຕາມວິຖີດຳລົງຊີວິດປົກກະຕິແບບໃໝ່ ເພື່ອຫຼຸດຜ່ອນວົງຈອນໃນການຮັບ ແລະ ແຜ່ເຊື້ອພະຍາດ ໂຄວິດ – 19 ເນື່ອງຈາກປະຈຸບັນການແຜ່ ຂອງເຊື້ອພະຍາດ ໂຄວິດ – 19 ຢູ່ເມືອງ ຕົ້ນເຜິ້ງ ຍັງມີຕົວເລກເພີ່ມຂຶ້ນໃນແຕ່ລະວັນ.

    ພາບ – ຂ່າວ: ອຸໄທ ພູມມາ.