ແຂວງບໍລິຄຳໄຊ ມອບເຮືອຫາງຍາວ ໃຫ້ກອງບັນຊາການທະຫານແຂວງ

    0
    44

    ເພື່ອເປັນການປະກອບສ່ວນຊຸກຍູ້ ແລະ ອຳນວຍຄວາມສະດວກໃນວຽກງານທີ່ສຳຄັນຂອງກອງບັນຊາການທະຫານແຂວງ ເວົ້າລວມ, ເວົ້າສະເພາະ ກໍຄືກອງຮ້ອຍທະຫານຊາຍແດນ 3 ກອງຮ້ອຍ ດ້ານທິດຕາເວັນຕົກ, ປະກອບສ່ວນເຂົ້າໃນການປ້ອງກັນເວນຍານ, ລາດຕະເວນ ເພື່ອສະກັດກັ້ນການຫຼັກລອບເຂົ້າອອກຂອງປະຊາຊົນຕາມຊາຍແດນແບບຜິດກົດໝາຍ ເພື່ອແນໃສ່ສະກັດກັ້ນ ແລະ ຄວບຄຸມການແຜ່ລະບາດຂອງພະຍາດໂຄວິດ 19 ໃຫ້ມີປະສິດທິຜົນສູງ.

    ໃນວັນທີ 14 ພຶດສະພາຜ່ານມານີ້ ແຂວງບໍລິຄຳໄຊໄດ້ນຳເອົາເຮືອເຫຼັກ ຈຳນວນ 4 ລຳ ພ້ອມຈັກຫາງຍາວ 4 ເຄື່ອງ, ກະເບື້ອງ 265 ແຜ່ນ, ດີນບ໋ອກ 1.370 ກ້ອນ, ນ້ຳມັນກາຊວນ 150 ລິດ ແລະ ໝ້ໍນັບໄຟຟ້າຈຳນວນ 1 ຊຸດ ລວມມູນຄ່າທັງໝົດ 63 ລ້ານກວ່າກີບ ມາມອບໃຫ້ກອງບັນຊາການທະຫານແຂວງ ເພື່ອນຳໄປມອບຕໍ່ໃຫ້ 3 ກອງຮ້ອຍທະຫານຊາຍຕາມລຳແມ່ນ້ຳຂອງດ້ານຕາເວັນຕົກຄື: ກອງຮ້ອຍທະຫານຊາຍແດນ 254, ກອງຮ້ອຍທະຫານຊາຍແດນ 255 ແລະ ກອງຮ້ອຍທະຫານຊາຍແດນ 256.

    ໃຫ້ກຽດກ່າວມອບໂດຍທ່ານ ສາຍຄຳ ວົງຄຳທອງ ຮອງຫົວໜ້າຫ້ອງວ່າການແຂວງ ພ້ອມຄະນະ ແລະ ກ່າວຮັບໂດຍທ່ານ ພັທ ພິດາວັນ ພິມເຮືອງສີ ຄະນະພັກກອງບັນຊາການ ຫົວໜ້າຫ້ອງເສນາທິການທະຫານແຂວງ. ຈາກນັ້ນທ່ານ ພັທ ພິດາວັນ ພິມເຮືອງສີ ກໍໄດ້ມອບເຮືອເຫຼັກດັ່ງກ່າວໃຫ້ 3 ກອງຮ້ອຍທະຫານຊາຍແດນເປັນຜູ້ປົກຮັກສາ, ນຳໃຊ້ໃຫ້ໄດ້ຍາວນານ ແລະ ເກີດຜົນປະໂຫຍດສູງສຸດ.

    ຂ່າວ: ສີທອງ ຈັນທະວົງ