ໂອໂຢ້ມາແບບນີ້ເລີຍ ບໍ່ສັກວັກຊິນບໍ່ໃຫ້ເຂົ້າກອງຄຸ້ມຄອງພາຫະນະ ແລະການຂັບຂີ່

    0
    152

    ເພື່ອປະຕິບັດມາດຕະການຢ່າງເຂັ້ມງວດ ໃນການສະກັດກັ້ນການແຜ່ລະບາດ ຂອງພະຍາດໂຄວິດ-19. ເລີ່ມແຕ່ວັນທີ 18 ພຶດສະພາ ເປັນຕົ້ນໄປ ກອງຄຸ້ມຄອງພະຫະນະ ແລະ ການຂັບຂີ່, ນວ ຈະບໍ່ອະນຸຍາດໃຫ້ຜູ້ທີ່ຍັງບໍ່ທັນໄດ້ຮັບວັກຊີນປ້ອງກັນພະຍາດໂຄວິດ-19 ມາປະຈໍາການ ຫຼື ມາໃຊ້ບໍລິການ.

    ກອງຄຸ້ມຄອງພາຫະນະ ແລະ ການຂັບຂີ່, ພະແນກ ໂຍທາທິການ ແລະ ຂົນສົ່ງ, ນະຄອນຫຼວງວຽງຈັນ (ນວ) ອອກແຈ້ງການ ເລກທີ 0401/ກຄພຂ,ນວ ລົງວັນທີ 17 ພຶດສະພາ 2021 ເຖິງພະນັກງານ, ລັດຖະກອນ, ທະຫານ, ຕຳຫລວດ, ກຳມະກອນ, ນັກຮຽນ, ນັກສຶກສາ, ຜູ້ປະກອບການ, ປະຊາຊົນລາວ, ຊາວຕ່າງດ້າວ, ຜູ້ບໍ່ມີສັນຊາດ ແລະ ຊາວຕ່າງປະເທດ ທີ່ດຳລົງຊີວິດ ຢູ່ ສປປ ລາວ ກ່ຽວກັບການປະຕິບັດມາດຕະການເຂັ້ມງວດ ເພື່ອສະກັດກັ້ນ ການແຜ່ລະບາດ ຂອງພະຍາດໂຄວິດ-19.


    ອີງຕາມການຄົ້ນຄວ້າປຶກສາຫາລື ແລະ ຕົກລົງເປັນເອກະພາບກັນ ຂອງຄະນະກອງຄຸ້ມຄອງພາຫະນະ ແລະ ການຂັບຂີ່, ນວ ຄັ້ງວັນທີ 17 ພຶດສະພາ 2021, ກອງຄຸ້ມຄອງພາຫະນະ ແລະ ການຂັບຂີ່ ນວ ຂໍແຈ້ງມາຍັງທ່ານຊາບວ່າ ເພື່ອປະຕິບັດມາດຕະການຢ່າງເຂັ້ມງວດ ໃນການສະກັດກັ້ນ ການແຜ່ລະບາດ ຂອງພະຍາດໂຄວິດ-19 ເລີ່ມແຕ່ວັນທີ 18 ພຶດສະພາ 2021 ເປັນຕົ້ນໄປ ແມ່ນທາງກອງຄຸ້ມຄອງພາຫະນະ ແລະການຂັບຂີ່ຈະບໍ່ອະນຸຍາດໃຫ້ຜູ້ທີ່ຍັງບໍ່ທັນໄດ້ຮັບວັກຊີນປ້ອງກັນພະຍາດໂຄວິດ-19 ມາປະຈໍາການ ຫຼື ມາໃຊ້ບໍລິການ ຢູ່ທີ່ກອງຄຸ້ມຄອງພະຫະນະ ແລະ ການຂັບຂີ່ ນວ (ທົ່ງປົ່ງ), ສາຂາ ເມືອງນາຊາຍທອງ (ນ້ຳຊ່ວງ) ແລະ ສາຂາ ເມືອງໄຊທານີ.

    ແນະນຳໃຫ້ທຸກທ່ານຖືບັດຮັບວັກຊີນ ປ້ອງກັນໂຄວິດ-19 ມາພ້ອມທຸກຄັ້ງ ເພື່ອຄວາມສະດວກໃນການເຂົ້າມາໃຊ້ບໍລິການ. ດັ່ງນັ້ນ, ຈຶ່ງແຈ້ງມາຍັງທ່ານເພື່ອຊາບ ແລະ ພ້ອມກັນປະຕິບັດຕາມແຈ້ງການສະບັບນີ້ຢ່າງເຂັ້ມງວດ.