ຂ່າວດີ! ແຂວງສາລະວັນ ປິ່ນປົວຜູ້ຕິດເຊື້ອພະຍາດໂຄວິດ-19 ຫາຍດີ 5 ຄົນ

    0
    79

    ໃນຕອນແລງວັນທີ​ 7​ ພຶດສະພາ​ 2021​​ ໄດ້ມີພິທີສົ່ງຄົນເຈັບຜູ້ປິ່ນປົວຫາຍດີຈາກພະຍາດໂຄວິດ-19​ ທີ່ໂຮງໝໍແຂວງສາລະວັນ, ໂດຍມີ ທ່ານ ດຣ ຄໍາຄ້າຍ ຄໍາສິງສະຫວັດ ຮອງຫົວໜ້າພະແນກ ສາທາລະນະສຸກແຂວງສາລະວັນ ພ້ອມດ້ວຍແພດ, ໝໍ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ

    ແຂວງສາລະວັນ ໄດ້ປິ່ນປົວຜູ້ຕິດເຊື້ອພະຍາດໂຄວິດ-19 ຫາຍດີ ເພີ່ມອີກ 5 ຄົນ, ມີຊື່ວ່າ: ທ້າວ ຍົກ ອາຍຸ 26​ ປີ ບ້ານ ຫຼັກສອງ, ທ້າວ ຄອນສະຫວັນ ອາຍຸ 27 ປີ ບ້ານ: ນາກົກໂພ, ນາງ ຢວນ ອາຍຸ 19 ປີ ບ້ານຫຼັກສອງ, ນາງ ຄໍາຫລ້າ ອາຍຸ 23 ປີ ບ້ານໂພນແກ້ວ, ນາງ ສຸກສາລາຄອນ ອາຍຸ 19 ປີ ບ້ານຂົວເສັດ​ ເຊິ່ງຜູ້ກ່ຽວກວດພົບເຊື້ອໂຄວິດ-19 ໃນຄັ້ງວັນທີ 24 ເມສາ 2021,

    ຈາກນັ້ນໄດ້ເຂົ້າຮັບການປິ່ນປົວຢູ່ທີ່ໂຮງໝໍແຂວງສາລະວັນ ເປັນຈໍານວນ 14 ວັນ ແລະ​ ໄດ້ຮັບການເອົາໃຈໃສ່ປິ່ນປົວຈາກທີມງານແພດໝໍຢ່າງປົກກະຕິ ແລະ​ ຕໍ່ເນື່ອງຈົນເຮັດໃຫ້ອາການຂອງພວກຜູ້ກ່ຽວດີຂື້ນ, ແລ້ວກວດຫາເຊື້ອຈຳນວນ 4 ຄັ້ງ ໃນນັ້ນຄັ້ງທີ 1 ຜົນກວດແມ່ນພົບເຊື້ອ, ພາຍຫຼັງກວດອີກ 3 ຄັ້ງແມ່ນບໍ່ພົບເຊື້ອ ແລະ​ ອາການຂອງພວກຜູ້ກ່ຽວແມ່ນບໍ່ມີໄຂ້, ໄອ,ຈາມ, ບໍ່ເມື່ອຍ, ບໍ່ຫາຍໃຈຜືດ, ກິນ-ດື່ມໄດ້ດີເໝືອນຄົນປົກກະຕິທົ່ວໄປ​ ຈຶ່ງໃຫ້ອອກໂຮງໝໍໄດ້.​

    ປັດຈຸບັນແຂວງສາລະວັນ ລວມມີຜູ້ຕິດເຊື້ອທັງໝົດ 12 ຄົນ ແລະ ປິ່ນປົວຫາຍດີແລ້ວ 6 ຄົນ ແລະ​ ພວມກຳລັງປິ່ນປົວ 6 ຄົນ.
    ຂ່າວ: ກິນດາວັນ ອ້ວນນາຄູ