ມອບ-ຮັບ ອັດຖິທະຫານອາສາສະໝັກ ແລະ ຊ່ຽວຊານຫວຽດນາມ

    0
    21

    ເມື່ອບໍ່ດົນມານີ້, ທີ່ກອງບັນຊາການທະຫານນະຄອນຫຼວງວຽງຈັນ ໄດ້ຈັດພິທີມອບ-ຮັບ ແລະ ຈັດສົ່ງອັດຖິທະຫານອາສະໝັກ ແລະ ຊ່ຽວຊານຫວຽດນາມທີ່ເສຍສະຫຼະຊີວິດ ໃນສະໄໝສົງຄາມຢູ່ດິນແດນນະຄອນຫຼວງວຽງຈັນກັບຄືນສູ່ປະເທດຈຳນວນ 2 ອັດຖິ ໂດຍມີ ສະຫາຍ ພົນຈັດຕະວາ ສີພອນ ຈັນສົມວົງ ຄະນະປະຈໍາພັກນະຄອນຫຼວງ ຫົວໜ້າການເມືອງກອງບັນຊາການທະຫານນະຄອນຫຼວງວຽງຈັນ ແລະ ສະຫາຍ ພັນເອກ ຮ່າດຶກຮຸ້ງ ຫົວໜ້າໜ່ວຍງານຂຸດຄົ້ນອັດຖິແຂວງຮ່າຕິ່ງ ສສ ຫວຽດນາມ, ມີຄະນະພັກ-ຄະນະບັນຊາ-ພະນັກງານ ອົງການ 5 ຫ້ອງ ແລະ ກົມກອງອ້ອມຂ້າງ, ຄະນະປະຕິບັດງານພິເສດທັງສອງຝ່າຍ ແລະ ພາກສ່ວນກ່ຽວຂ້ອງເຂົ້າຮ່ວມ.


    ໃນພິທີພາກສ່ວນຕ່າງໆໄດ້ເຂົ້າວາງພວງມະລາ ຊຶ່ງປະກອບມີຄະນະກອງບັນຊາການທະຫານນະ ຄອນຫຼວງວຽງຈັນ, ຄະນະປະຕິບັດງານພິເສດແຂວງຮ່າຕິ່ງ, ຄະນະຫ້ອງເສນາທິການ, ຫ້ອງການເມືອງ, ຫ້ອງ ພະລາທິການ, ຫ້ອງເຕັກນິກ, ເພື່ອເປັນການສະແດງເຖິງຄວາມກະຕັນຍູຮູ້ບຸນຄຸນຕໍ່ຜົນງານ, ຄຸນງາມຄວາມດີຂອງບັນດາສະຫາຍນັກຮົບວິລະຊົນ, ທະຫານອາສາສະໝັກ ແລະ ຊ່ຽວຊານຫວຽດນາມທີ່ເສຍສະຫຼະຊີວິດ ເພື່ອ ພາລະກິດອັນສູງສົ່ງ ເພື່ອຄວາມສົມບູນພູນສຸກ, ຄວາມເປັນເອກະລາດ, ຄວາມຢູ່ເຢັນເປັນສຸກຂອງປະຊາຊົນລາວ ກໍຄືການປະຕິບັດໜ້າທີ່ດ້ວຍນໍ້າໃຈສາກົນກຳມະຊີບອັນສູງສົ່ງຂອງບັນດາສະຫາຍນັກຮົບວິລະຊົນ, ທະຫານອາສາ ສະໝັກ ແລະ ຊ່ຽວຊານຫວຽດນາມທີ່ມາປະຕິບັດໜ້າທີ່ຢູ່ລາວໃນປາງສົງຄາມ.

    ການມອບ-ຮັບ ແລະ ຈັດສົ່ງອັດຖິຄັ້ງນີ້, ແມ່ນປະຕິບັດຕາມສັນຍາຂອງ 2 ລັດຖະບານ ແລະ ບົດບັນທຶກຊ່ວຍຈໍາລະຫວ່າງ 2 ຄະນະປະຕິບັດງານພິເສດລາວ-ຫວຽດນາມກ່ຽວກັບການຊອກຫາ ແລະ ຂຸດຄົ້ນອັດຖິທະຫານອາສາສະໝັກ ແລະ ຊ່ຽວຊານຫວຽດນາມ ທີ່ເສຍຊີວິດໃນປາງສົງຄາມຢູ່ລາວເວົ້າລວມ, ເວົ້າສະເພາະຢູ່ນະຄອນຫຼວງວຽງຈັນ ໂດຍໄດ້ປະສານງານກັນແໜ້ນລະຫວ່າງຄະນະປະຕິບັດງານພິເສດຂອງທະຫານນະຄອນຫຼວງວຽງຈັນ ກັບ ຄະນະປະຕິບັດງານພິເສດແຂວງຮ່າຕິ່ງ ຊຶ່ງເລີ່ມແຕ່ປີ 2000 ມາເຖິງປີ 2020 ສາມາດຂຸດຄົ້ນ ໄດ້ 124 ອັດຖິ ແລະ ໄດ້ມອບ-ຮັບຈັດສົ່ງແລ້ວ. ສຳລັບປີ 2021 ນີ້ ໜ່ວຍງານຊອກຄົ້ນ ແລະ ຂຸດຄົ້ນໄດ້ເລີ່ມລົງມືປະຕິບັດນັບແຕ່ເດືອນມີນາ ຫາ ເດືອນເມສາ ແມ່ນສາມາດຂຸດຄົ້ນໄດ້ຕົວຈິງ ຈຳນວນ 3 ອັດຖິ ແລະ ໄດ້ຈັດສົ່ງ ຢ່າງເປັນທາງການເຊັ່ນດຽວກັນ.

    (ຂ່າວ: ແສງດາລາ ໄຊຍະລາດ ນັກຂ່າວທະຫານນະຄອນຫຼວງວຽງຈັນ)