ທະຫານບໍ່ແກ້ວເຮັດໜ້າທີ່ແນວໜ້າ ປ້ອງກັນຄົນລັກລອບເຂົ້າເມືອງ

    0
    135

    ຫາຍະນະຂອງຍຸກໂຄວິດຄືການລັກລອບເຂົ້າເມືອງທີ່ບໍ່ໄດ້ຜ່ານການຄັດກອງ ເປັນຂ່າງໂດ່ງດັງທຸກຄົນກໍ່ເຫັນວ່າ ທີ່ທຸກວັນນີ້ມີການແຜ່ນເຊື້ອທົ່ວບ້ານທົ່ວເມືອງແມ່ນມາຈາກຜູ້ລັກລອບເຂົ້າເມືອງມາແຜ່ໃຫ້ປະຊາຊົນລາວ ສະນັ້ນ ເພື່ອປ້ອງກັນບໍ່ໃຫ້ພວກສວຍໂອກາດລັກມາຕາມຈຸດຂ້າມລອຍຕ່າງໆຕາມແລວຊາຍແດນທາງນ້ຳ ສຳລັບແຂວງ-ແກ້ວແມ່ນໄດ້ຈັດຕັ້ງອ້າຍນ້ອງປ້ອງກັນຊາດເຮັດໜ້າທີ່ໃນຈຸດນີ້ຢ່າງເປັນປະຈຳ.

    ເພື່ອຕິດຕາມ, ກວດກາ ແລະ ຊຸກຍູ້ການຈັດຕັ້ງປະຕິບັດມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂ ການແຜ່ລະບາດຂອງພະຍາດໂຄວິດ-19 ເວົ້າສະເພາະ ແມ່ນການສະກັດກັ້ນ ແລະ ແກ້ໄຂບັນຫາ ຄົນລັກລອບເຂົ້າ-ອອກເມືອງແບບບໍ່ຖືກຕ້ອງ ໃຫ້ມີປະສິດທິພາບ ແລະ ປະສິດທິຜົນ ໃນຕອນເຊົ້າວັນທີ 27 ເມສາ 2021ນີ້, ສະຫາຍ ພັນເອກ ບຸນມີ ພາມີໄຊ ຄະນະປະຈຳພັກແຂວງ ເລຂາຄະນະພັກ ຫົວໜ້າການເມືອງກອງບັນຊາການທະຫານແຂວງບໍ່ແກ້ວ, ສະຫາຍ ຫົງແກ້ວ ວິໄນວົງ ກຳມະການພັກແຂວງ ເລຂາພັກເມືອງ ເຈົ້າເມືອງໆຫ້ວຍຊາຍ ແລະ ສະຫາຍ ພັນເອກ ຈັນທະລາ ໄຊຍະວົງ ຮອງຫົວໜ້າກອງບັນຊາການ ປກສ ແຂວງ ພ້ອມດ້ວຍຄະນະ ໄດ້ລົງເຄື່ອນໄຫວລາດຕະເວນຢູ່ຂອບເຂດຊາຍແດນເມືອງຫ້ວຍຊາຍ.


    ຈຸດປະສົງໃນການລົງກວດກາລາດຕະເວນໃນຄັ້ງນີ້ ແມ່ນເພື່ອຈັດຕັ້ງປະຕິບັດມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂ ການແຜ່ລະບາດ ຂອງພະຍາດໂຄວິດ-19, ລວມທັງວຽກງານສະກັດກັ້ນ ແລະ ແກ້ໄຂບັນຫາປະກົດການຫຍໍ້ທໍ້ທາງສັງຄົມ ເປັນຕົ້ນແມ່ນຄົນລັກລອບເຂົ້າ-ອອກເມືອງແບບບໍ່ຖືກຕ້ອງຕາມກົດໝາຍ ໂດຍໄດ້ເອົາໃຈໃສ່ວຽກງານໂຄສະນາເຜີຍແຜ່ໃຫ້ປະຊາຊົນໄດ້ຮັບຮູ້ ແລະ ເຂົ້າໃຈ ເນື້ອໃນຈິດໃຈຂອງຄຳສັ່ງ ເລກທີ 15/ນຍ, ລົງວັນທີ 21 ເມສາ 2021 ແລະ ນິຕິກຳອື່ນໆເປັນຕົ້ນນິຕິກຳຂອງ ຄະນະສະເພາະກິດແຕ່ລະຂັ້ນວາງອອກ.

    ເຈົ້າໜ້າທີ່ ທີ່ກ່ຽວຂ້ອງໄດ້ເຄື່ອນໄຫວກວດກາລາດຕະເວນ ທັງທາງບົກ ແລະ ທາງນໍ້າ ຢ່າງເປັນປົກກະຕິ ຕະຫຼອດ 24 ຊົ່ວໂມງ ໃນທົ່ວເມືອງ ແລະ ຢຸດການເດີນເຮືອຂອງປະຊາຊົນຊົ່ວຄາວ ໂດຍໄດ້ຈອດໂຮມ ແລະ ເອົາຂຶ້ນບົກໄວ້ເປັນຈຸດໆ; ພ້ອມນີ້, ໄດ້ຕັ້ງຈຸດກວດກາຈຳກັດ ການເຂົ້າ-ອອກບ້ານ ຂອງປະຊາຊົນ ແລະ ອື່ນໆ.

    ຜ່ານການຈັດຕັ້ງປະຕິບັດວຽກງານຕົວຈິງ ແມ່ນໄດ້ຮັບການຮ່ວມມືຈາກປະຊາຊົນດີສົມຄວນ, ເຮັດໃຫ້ຂອບເຂດເມືອງ ແລະ ບັນດາບ້ານມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ. ເພີ່ມທະວີການໂຄສະນາເຜີຍແຜ່ ແລະ ປະຕິບັດ ບັນດາມາດຕະການທີ່ລັດຖະບານກໍ່ຄືຄະນະສະເພາະກິດ ແຕ່ລະຂັ້ນວາງອອກຢ່າງເຂັ້ມງວດ ເຮັດໃຫ້ເຂົາເຈົ້າຮັບຮູ້ ແລະ ເຂົ້າໃຈຕໍ່ຄວາມອັນຕະລາຍ ແລະ ຜົນກະທົບຕາມມາຈາກການແຜ່ລະບາດ ຂອງເຊື້ອພະຍາດໂຄວິດ-19, ເຫດຜົນ ແລະ ຄວາມຈຳເປັນໃນການຈຳກັດການເຂົ້າ-ອອກບ້ານ, ເຂົ້າ-ອອກເມືອງ, ເຜີຍແຜ່ໃຫ້ຄວາມຮູ້ແກ່ປະຊາຊົນກ່ຽວກັບການປ້ອງກັນ ແລະ ປິ່ນປົວຕົນເອງຂັ້ນພື້ນຖານ; ເອົາໃຈໃສ່ ປຸກລະດົມປະຊາຊົນ ໃຫ້ສືບຕໍ່ມີຄວາມສາມັກຄີກັນດີ, ໃຫ້ການຮ່ວມມືເຊິ່ງກັນ ແລະ ກັນ, ພ້ອມກັນເຂົ້າຮ່ວມ ແລະ ປະຕິບັດພັນທະຂອງຕົນ ໃຫ້ເປັນຂະເປັນຂະບວນການຢ່າງຕັ້ງໜ້າ.

    ໂດຍ: ວໍລະສິດ ພິດສະຫາຍ.