ປີທີສອງຕິດຕໍ່ກັນທີ່ ຜູ້ຊາຍຄົນນີ້ເຮັດເພື່ອສັງຄົມຊ່ວຍຄົນຫ້ອງແຖວ

    0
    247

    ເປັນນ້ຳໃຈທີ່ດີງາມຫຼາຍສຳລັບເຈົ້າຂອງຫ້ອງແຖວຜູ້ນີ້ ເຊິ່ງປີນີ້ເປັນປີທີສອງຕິດຕໍ່ກັນທີ່ເພິ່ນເຫັນຄວາມເດືອດຮ້ອນຂອງພີ່ນ້ອງຮ່ວມຊາດແລ້ວຍື່ນມືຊ່ວຍ ໃນໄລຍະທີ່ພະຍາດຕິດຕໍ່ລະບາດ ຜູ້ຢູ່ເຮືອນເຊົ່າເຂົ້າຊື້ຍາກຈະເອົາຕົວລອດ ເພື່ອກໍ່ຮີບສະແດງນ້ຳໃຈຕໍ່ຜູ້ມາພັກເຊົານຳ ເປັນການແບ່ງເບົາພີ່ນ້ອງຈາກເໜືອໃຕ້ທີ່ມາພັກຢູ່ຫ້ອງແຖວເພິ່ນ ທັງເປັນການຄືນກຳໄລແກ່ຜູ້ເຊິ່ງເປັນລູກຄ້າ.

    ຜູ້ຊາຍຄົນນີ້ຊື່ ເກດສະໜາ ສູນດາລາ ເປັນເຈົ້າຂອງຫ້ອງແຖວຢູ່ສາລາຄຳ ເມືອງຫາດຊາຍຟອງ ນະຄອນຫຼວງວຽງຈັນ ຕາມແຜນແລ້ວເພິ່ນຈະເລີ່ມ ຫຼຸດຄ່າເຊົ່າໃຫ້ຜູ້ມາພັກເຊົາຢູ່ຫ້ອງແຖວແຕ່ວັນທີ 1ເດືອນ ພຶດສະພາ2021 ຈົນພະຍາດໂຄວິດຈະຫາຍຈາກ ສປປ ລາວເຮັດໃຫ້ປະຊາຊົນໄປທຳມາຫາກິນໄດ້.


    ທ່ານ ເກດສະໜາ ສູນດາລາ ບອກວ່າ: ນີ້ເປັນການແບ່ງເບົາຄົນລາວນຳກັນ ໃນຊ່ວງລຳບາກ ໂດຍສະເພາະໄລຍະນີ້ທີ່ເຮັດໃຫ້ຫຼາຍຄົນມີຄວາມຫຍຸ້ງຍາກຈາກການທຳມາຫາກິນ ໂດຍສະເພາະຄົນທີ່ອາໄສ ເຊົ່າຫ້ອງແຖວຢູ່ກັບຕົນ ແມ່ນຈະຫຼຸດລາຄາໃຫ້ 50% ຄວາມໝາຍຄືຜູ້ເຊົ່າຫ້ອງຈະໄດ້ຈ່າຍພຽງເຄິ່ງຄ່າເທົ່ານັ້ນ ສົມມຸດຫ້ອງລາຄາ 500.000 ກໍ່ຈະໄດ້ຈ່າຍແຕ່ 250.000 ກີບ.

    ສຳລັບຫ້ອງແຖວຂອງເພີ່ມແມ່ນມີຈຳນວນທັງໝົດ 14 ຫ້ອງ ແລະການຫຼຸດລາແບ່ງເບົາຄວາມທຸກຍ້ອຍພະຍາດໂຄວິດນີ້ແມ່ນໄດ້ດຳເນີນມາເປັນປີທີ 2 ຕິດຕໍ່ກັນແລ້ວ.

    ຈະເປັນຫຼຸດໜ້ອຍ ຫຼື ຫຼາຍຂໍໃຫ້ເປັນນ້ຳໃຈເລັກນ້ອຍກໍ່ໄດ້ໃຈມະນຸດຫ້ອງແຖວໄປເຕັມໆ ເຊິ່ງປີກາຍນີ້ບໍ່ພຽງຫຼຸດຄ່າຫ້ອງເຊົ່າ 50% ຍັງແຖມຟຣີຄ່ານ້ຳ-ໄຟຕະຫຼອດເດືອນອີກດ້ວຍ.


    ວິກິດຈາກໂຄວິດ-19 ມີພ້ອມເຊື້ອພະຍາດ ແລະຫາຍານະທາງເສດຖະກິດ ເຮັດໃຫ້ທຸລະກິດນ້ອຍໃຫຍ່ໄດ້ຮັບຜົນກະທົບທົ່ວໜ້າ, ຫຼາຍບໍລິສັດໄປບໍ່ລອດຕ້ອງຖອດຖອນພະນັກງານອອກຈຳນວນຫຼາຍ, ໃນປີກາຍນີ້ບາງບໍລິສັດຍັກໃຫຍ່ຍັງເຖິງຂັ້ນໃຫ້ພະນັກງານພັກວຽກບໍ່ຮັບເງິນເດືອນ ແລ້ວຈະທຽບຫຍັງພະນັກງານນ້ອຍກຳມະກອນຫາເຊົ້າກິນຄ່ຳທີ່ຢູ່ເຮືອນເຊົ່າເຂົ້າຊື້ຈະເອົາຕົວລອດໄດ້ແນວໃດ? ສະນັ້ນນ້ຳໃຈເລັກນ້ອຍກໍ່ຖືເປັນສິ່ງທີ່ຍິ່ງໃຫຍ່ສຳຄັນຄົນເງິນໜ້ອຍ.
    ຍ້ອນເຫດຜົນນີ້ແລທີ່ ເກດສະໜາຕັດສິນໃຈຫຼຸດຄ່າເຊົ່າຫ້ອງ 50% ໃຫ້ກັບຜູ້ມາເຊົ່າ ເຈົ້າຂອງຫ້ອງແຖວໃຈດີທ່ານນີ້ ເພິ່ນບອກວ່າ: ຄົນທີ່ຢູ່ຫ້ອງແຖວສ່ວນໃຫຍ່ຈະເປັນຜູ້ມີລາຍໄດ້ໜ້ອຍພະນັກງານກຳມະກອນ ຄົນເສີບອາຫານເຫຼົ່ານີ້ເປັນຕົ້ນ ສະນັ້ນ ເຂົາເຈົ້າປົກກະຕິກໍ່ບໍ່ມີລາຍຮັບຢູ່ແລ້ວ ຍິ່ງໄລຍະນີ້ເກີດວິກິດເສດຖະກິດຫຼາຍຄົນຕົກວຽກ, ເຈົ້ານາຍບໍ່ມີລາຍຮັບຈ່າຍລູກນ້ອງກໍ່ຄືຜູ້ເຊົ່າຫ້ອງເຫຼົ່ານີ້ ເຊິ່ງຕ່າງຄົນຕ່າງໄດ້ຮັບຜົນກະທົບ ດັ່ງນັ້ນ, ສິ່ງທີ່ຊ່ວຍກັນໄດ້ກໍ່ຄວນຊ່ວຍກັນໄປ!!!
    ວ້າວ!!!!!ສຸດໆໄປເລີຍ ຫຼາຍຄົນທີ່ຮູ້ຂ່າວການຫຼຸດລາຄາດັ່ງກ່າວໃຜກໍ່ກ່າວຊົມເຊີຍຍ້ອງ ຄົນດີໆມີໜ້ອຍໃນສັງຄົມ, ຂະນະທີ່ໜຸ່ມເຈົ້າຂອງຫ້ອງແຖວຍັງບອກອີກວ່າ ຕົນເອງກໍ່ບໍ່ມີຫຼາຍ ພື້ນຖານເຮັດທຸລະກິດຮ້ານບັນເທິງ ແລະຫ້ອງໃຫ້ເຊົ່າ ເຊິ່ງລ້ວນແຕ່ໄດ້ຮັບຜົນກະທົບຈາກວິກິດແຕ່ປະຊາຊົນທີ່ມາຢູ່ນຳຍິ່ງໜັກກວ່າ ສະນັ້ນສິ່ງທີ່ຊ່ວຍໄດ້ກໍ່ຍິນດີຊ່ວຍກັນໄປໃນຊ່ວງເວລາແບບນີ້!