ໄທ ຮ່ວມມືກັບເຈົ້າໜ້າທີ່ລາວ ໃນການນໍາໂຕຜູ້ເຂົ້າອອກເມືອງແບບຜິດກົດໝາຍມາດຳເນີນຄະດີ

0
236

ສື່ມວນຊົນໄທ ຫລາຍສໍານັກ ໄດ້ອອກຂ່າວຕໍາຫລວດກວດຄົນເຂົ້າ-ອອກເມືອງ(ຕມ)ແຂວງໜອງຄາຍ ໄດ້ແຈ້ງເອົາຜິດຜູ້ຊາຍໄທສອງຄົນກັບຜູ້ຍິງລາວໜຶ່ງຄົນທີ່ລັກລອບເຂົ້າ-ອອກປະເທດ ທັງທີ່ຮູ້ວ່າຕິດເຊື້ອໂຄວິດ-19 ເຂົ້າໄປແພ່ເຊື້ອຢູ່ປະເທດລາວ.

ໃນການນໍາຫາສາມຄົນນີ້ ເຈົ້າໜ້າ ທີ່ ຕມ ລາວ ໄດ້ກ່າວຕໍ່ ຂປລ ວ່າ: ໄດ້ປະສານງານ ກັບ ເຈົ້າຫນ້າທີ່ ຕມ ໄທ ໃນແຕ່ລະວັນ ຊຶ່ງໄດ້ຮັບຄວາມຮ່ວມມືທີ່ດີ ເພື່ອພ້ອມກັນແກ້ໄຂສະພາບ ການລະບາດຂອງພະຍາດໂຄວິດ-19. ກໍລະນີຜູ້ຍິງລາວນີ້ຈະຖືກປະຕິບັດໂທດ ຕາມກົດໝາຍໄທກ່ອນແລ້ວ ຈຶ່ງຈະສົ່ງກັບລາວ.

ລາຍງານຂ່າວPolice TV ຂອງໄທລະບຸວ່າ ໃນຕອນແລງຂອງວັນທີ 23 ເມສາ 2021, ທ່ານ ພັທ ພີຣະພັດ ປຣົມພຸດ ຮອງຜູ້ກໍາກັບ ຕໍາຫລວດ ກວດຄົນເຂົ້າອອກເມືອງແຂວງໜອງຄາຍ ພ້ອມດ້ວຍຄະນະ ໄດ້ເຂົ້າໄປ ແຈ້ງຄວາມ ຕໍ່ສໍານັກງານ ຕໍາຫລວດ ໜອງຄາຍ ໃຫ້ເອົາຄວາມຜິດຜູ້ຊາຍໄທສອງຄົນກັບຜູ້ຍິງລາວໜຶ່ງຄົນ ຖານລັກ

ລອບເຂົ້າອອກ ປະເທດ ແລະ ປິດບັງ ຂໍ້ມູນການເດີນທາງນໍາເອົາເຊື້ອພະຍາດໂຄວິດໄປແພ່ໃນປະເທດລາວ, ເຮັດໃຫ້ສອງປະເທດມີ ຄວາມເດືອດຮ້ອນ. ຜູ້ຊາຍໄທສອງຄົນ ຊື່ ທ້າວ ຊິຕະພົນ ອາຍຸ 30 ປີ, ທ້າວ ທະນະກຣິດ ອາຍຸ 31 ປີ ແລະ ນາງ ດາວວະດີ ອາຍຸ 26 ປີ ຄົນລາວ ຊຶ່ງທັງສາມ ໄດ້ລັກລອບເຂົ້າລາວຕາມທີ່ໄດ້ເປັນຂ່າວພົວພັນເຖິງການແພ່ເຊື້ອພະຍາດໂຄວິດ-19 ຕິດພັນຜູ້ຕິດເຊື້ອກໍລະນີ 59 ຢູ່ ລາວ. ປັດຈຸບັນທັງສາມຄົນພວມ ປິ່ນປົວຢູ່ໂຮງໝໍໜອງຄາຍ.