ອິນເດຍ ມອບອຸປະກອນຫ້ອງ ທົດລອງວິໄຈດິນ ແລະ ຝຸ່ນແກ່ລາວ

0
113

ລັດຖະບານ ອິນເດຍ ໄດ້ມອບອຸປະກອນຫ້ອງທົດລອງວິໄຈດິນ ແລະ ຝຸ່ນ ພາຍໃຕ້ໂຄງການ ເຫັນຜົນໄວ ໃນຂອບການຮ່ວມມື ແມ່ນໍ້າຂອງ-ແມ່ນໍ້າຄົງຄາ ໃຫ້ແກ່ກົມຄຸ້ມຄອງ ແລະ ພັດທະນາດິນກະສິກຳ, ກະຊວງກະສິກໍາ ແລະ ປ່າໄມ້ ຈຳນວນ 22 ລາຍການ ໃນມູນຄ່າ 50.000 ໂດລາສະຫະລັດ. ພິທີມອບ-ຮັບໄດ້ຈັດຂຶ້ນໃນວັນທີ 12 ເມສາ 2021 ທີ່ນຄອນຫລວງວຽງຈັນ ໂດຍມີທ່ານ ເພັດ ພົມພິພັກ ລັດຖະ ມົນຕີກະຊວງ ກະສິກໍາ ແລະ ປ່າໄມ້ ແລະ ທ່ານ ດິກາ ອັດທານາ ເອກອັກຄະລັດຖະທູດຜູ້ມີອຳນາດເຕັມ ແຫ່ງ ສ.ອິນເດຍ ປະຈຳ ສປປ ລາວ, ມີບັນດາພະນັກງານທີ່ກ່ຽວຂ້ອງເຂົ້າຮ່ວມ.ທ່ານ ດິກາ ອັດທານາ ໄດ້ກ່າວວ່າ: ໂຄງການນີ້ແມ່ນໄດ້ຮັບການສະໜັບສະໜູນຈາກລັດຖະບານອິນເດຍ, ສ່ວນເນື້ອທີ່ດິນ ແມ່ນ ໄດ້ຮັບການສະຫນັບສະໜູນຈາກລັດຖະ ບານລາວ ຄາດວ່າການດຳເນີນງານຈະໃຫ້ສໍາເລັດພາຍໃນ 10 ເດືອນ ຊຶ່ງຖືວ່າໃຊ້ເວລາ

ດົນພໍສົມຄວນ ເນື່ອງຈາກມີ ການແຜ່ລະບາດຂອງ ໂຄວິດ-19 ຢ່າງຕໍ່ເນື່ອງ. ຂ້າພະເຈົ້າແນ່ໃຈວ່າຊາວກະສິກອນລາວ ຈະສາມາດໄດ້ຮັບປຸ໋ຍຊີວະພາບທີ່ມີຄຸນນະພາບດີ ເພາະຈະໄດ້ຜ່ານຂັ້ນຕອນການທົດລອງຢູ່ຫ້ອງທົດລອງ ທີ່ໄດ້ມາພາຍໃຕ້ໂຄງການ ແລະ ຄາດວ່າມີຊາວກະສິກອນຫລາຍກວ່າ 100.000 ຄົນ ຈະໄດ້ຮັບຜົນປະໂຫຍດຈາກໂຄງການນີ້.ໃນໂອກາດດຽວກັນນີ້, ທ່ານ ເພັດ ພົມພິພັກ ກໍໄດ້ກ່າວສະແດງຄວາມຂອບໃຈ ຕໍ່ລັດຖະບານອິນເດຍ ກໍຄື ທ່ານເອກອັກຄະລັດຖະທູດ ອິນເດຍ ປະຈຳ ສປປ ລາວ ທີ່ໄດ້ມອບອຸປະກອນຫ້ອງວິໄຈດິນ ແລະ ຝຸ່ນ ໃນຄັ້ງນີ້ ຊຶ່ງເຫັນວ່າມີຄຸນຄ່າ ແລະ ມີຄວາມຈຳເປັນທີ່ສຸດ ຕໍ່ກັບວຽກ ງານການຄໍ້າປະກັນທາງດ້ານສະບຽງອາຫານ ຂອງລັດຖະ ບານ ໂດຍສະເພາະວຽກງານການຄຸ້ມຄອງດິນ ແລະ ຝຸ່ນ ໃຫ້ມີປະສິດທິພາບສູງສຸດ. ໃນຄວາມຈິງແລ້ວວຽກງານການວິໄຈດິນກະສິກໍາຂອງພວກເຮົາ ກໍ່ໄດ້ຈັດຕັ້ງປະຕິບັດມາຫລາຍ

ສິບປີແລ້ວ ເພື່ອຮັບໃຊ້ການຜະລິດຂອງພໍ່ແມ່ປະຊາຊົນບັນດາເຜົ່າ ຊຶ່ງໃນໄລຍະຜ່ານມາພວກເຮົາໄດ້ວິໄຈ ປັດໄຈທາງດ້ານເຄມີ ແລະ ຟີຊິກ ຂອງດິນ ແລະ ຝຸ່ນ ບາງຢ່າງທີ່ຈຳເປັນເທົ່ານັ້ນ ແຕ່ຍັງບໍ່ສາມາດວິໄຈໄດ້ຄົບທຸກປັດໄຈທີ່ສໍາຄັນ. ອີງໃສ່ຄວາມຮຽກຮ້ອງຕ້ອງການຂອງສັງຄົມໃນໄລຍະໃໝ່ເຫັນວ່າ ພວກເຮົາຈະຕ້ອງໄດ້ພັດທະນາຕື່ມອີກໃນຫລາຍໆດ້ານເຊັ່ນ: ການວິໄຈທາດໂລຫະໜັກ ທີ່ເປັນອັນຕະລາຍ ແລະ ເປັນສານພິດຕົກຄ້າງໃນດິນ ແລະ ຝຸ່ນ ຊຶ່ງເປັນຜົນກະທົບທີ່ບໍ່ດີຕໍ່ສິ່ງແວດລ້ອມ, ການວິໄຈຈຸລິນຊີທີ່ເປັນປະໂຫຍດໃນດິນ ແລະ ຝຸ່ນ ທີ່ມີຄວາມສຳຄັນຕໍ່ການພັດທະນາກະສິກຳສະອາດ ຕາມທິດສີຂຽວ ແລະ ຍືນຍົງ.ທ່ານລັດຖະມົນຕີກ່າວຕື່ມວ່າ: ການຊ່ວຍເຫລືອຈາກລັດຖະບານອິນເດຍ ໃນຄັ້ງນີ້ ແມ່ນສຸດທີ່ມີຄວາມໝາຍຄວາມສໍາຄັນຫລາຍທີ່ສຸດ ຕໍ່ວຽກງານການພັດທະນາກະສິກຳສະອາດ ຂອງກະຊວງກະສິກຳ ແລະ ປ່າໄມ້ຊຶ່ງອຸປະກອນ

ຈຳນວນ 22 ລາຍການນີ້ ຈະໄດ້ມອບໃຫ້ກົມຄຸ້ມຄອງ ແລະ ພັດທະນາທີ່ດິນກະສິກຳ ເປັນຜູ້ນໍາໃຊ້ເຂົ້າໃນວຽກງານວິໄຈຈຸລິນຊີໃນດິນ ແລະ ຝຸ່ນອົງຄະທາດ (ຝຸ່ນອິນຊີ) ເພື່ອຕອບສະໜອງໃຫ້ໄດ້ຕາມຄວາມຮຽກຮ້ອງຕ້ອງການຂອງສັງຄົມ. ສໍາລັບກະຊວງກະສິກໍາ ແລະ ປ່າໄມ້ ຂອງພວກເຮົາ ນອກຈາກໄດ້ຮັບການຊ່ວຍເຫລືອອຸປະ ກອນການວິໄຈດິນ ແລະ ຝຸ່ນ ແລ້ວ, ຂ້າພະເຈົ້າຍັງຊາບອີກວ່າ ທາງລັດຖະບານອິນເດຍຍັງໄດ້ຊ່ວຍເຫລືອອີກ ສອງໂຄງການຄື: ໂຄງການ ສົ່ງເສີມຄອບຄົວຕົວແບບ ເພື່ອລ້ຽງແບ້ເປັນຝາມ ຢູ່ບ້ານແຈ້ງ, ເມືອງທຸລະຄົມ, ແຂວງວຽງຈັນ ແລະ ໂຄງການ ສົ່ງເສີມຂະຫຍາຍ ການປູກໝາກແໜ່ງຂຽວ (ໝາກແໜ່ງອິນເດຍ) ຢູ່ເມືອງປາກຊ່ອງ ແຂວງຈໍາປາສັກ ລວມທັງໝົດ 3 ໂຄງການ ເປັນມູນຄ່າທັງໝົດ 150.000 ໂດລາສະຫະລັດ. ຈາກການຊ່ວຍເຫລືອຂອງທ່ານ ພວກຂ້າພະເຈົ້າຈະພະຍາຍາມທີ່ສຸດ ເພື່ອຜັນຂະຫຍາຍ ໃຫ້ເກີດດອກອອກຜົນ ໃຫ້ມີຄວາມຍືນຍົງ ແລະ ຫວັງຢ່າງຍິ່ງວ່າ ຈະໄດ້ຮັບການຊ່ວຍເຫລືອ-ຮ່ວມມືອີກໃນອະນາຄົດຕໍ່ໆໄປ.