ຄະນະສະເພາະກິດຢືນຢັນ ຜູ້ຕິດເຊື້ອໂຄວິດ ນ້ຳເບີ 50 ບໍ່ໄດ້ໄປງານດອງ ຫຼື ສະຖານບັນເທີງ

0
117

ທ່ານ ດຣ ນາງ ລັດສະໝີ ວົງຄຳຊາວ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ຕາງໜ້າຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂ ພະຍາດໂຄວິດ -19 ຖະແຫຼງຂ່າວໃນວັນທີ 13 ເມສາ 2021 ໃຫ້ຮູ້ວ່າ: ຂ້າພະເຈົ້າຂໍຊີ້ແຈງກ່ຽວກັບຂໍ້ມູນການເຄື່ອນໄຫວຂອງຜູ້ຕິດເຊື້ອໂຄວິດ-19 ນໍ້າເບີ 50 ເພດຊາຍ, ອາຍຸ 41 ປີ ສັນຊາດໄທ ທີ່ເປັນຂ່າວໃນສື່ສັງຄົມອອນລາຍຕ່າງໆນັ້ນເປັນຕົ້ນ ການໄປເຄື່ອນໄຫວຢູ່ງານດອງທີ່ພັດຕະຄານແຫ່ງໜຶ່ງ ຫຼື ການເດີນທາງໄປຍັງສະຖານທີ່ບັນເທິງ

ຕ່າງໆນັ້ນ ພາຍຫຼັງພວກເຮົາໄດ້ລົງສອບສວນ ແລະ ສອບຖາມປະຫວັດຢ່າງລະອຽດຂ່າວລືດັ່ງກ່າວແມ່ນບໍ່ເປັນຂໍ້ມູນຄວາມຈິງ. ສະນັ້ນ, ຈຶ່ງຂໍໃຫ້ບັນດາທ່ານຕິດຕາມຂໍ້ມູນຂ່າວສານທີ່ເປັນທາງການ ຈາກຄະນະສະເພາະກິດ ຜ່ານເຟສບຸກຂອງສູນຂ່າວສານການແພດ ແລະ ສຸຂະສຶກສາ, ກະຊວງສາທາລະນະສຸກ ແລະ ເວັບໄຊຂອງຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19.

ທັງໄດ້ແນະນຳຖ້າຫາກທ່ານ ໄດ້ໄປໃຊ້ບໍລິການຮ້ານອິນເຕີເນັດຄາເຟດັ່ງກ່າວ ໃນວັນທີ 9 ເມສາ 2021 ເປັນຕົ້ນມາ ຂໍໃຫ້ທ່ານຕິດຕາມອາການຕົນເອງ ຫາກຮູ້ສຶກບໍ່ສະບາຍ ໃຫ້ທ່ານໄປພົບແພດຢູ່ໂຮງໝໍມິດຕະພາບ, ໂຮງໝໍເສດຖາທິລາດ, ໂຮງໝໍມະໂຫສົດ ຫຼື ໂຮງໝໍສູນກາງ 103 ກອງທັບ ເພື່ອເກັບຕົວຢ່າງກວດຊອກຫາເຊື້ອ ແລະ ຈຳກັດບໍລິເວນຕົນເອງຄົບກຳນົດ 14 ວັນ, ຖ້າຫາກເຂົ້າໃນນິຍາມກໍລະນີສົງໄສ ແມ່ນຈະບໍ່ໄດ້ເສຍຄ່າໃຊ້ຈ່າຍ.