ຮີໂຣໃນຊີວິດຈິງ! ຊາຍຜູ້ຊ່ວຍງົມຫາຜູ້ໂຊກຮ້າຍໃນເຫດເສົ້າເຮືອຫຼົ້ມທີ່ອ່າງນໍ້າງື່ມ ເຜີຍຕົນຊ່ວຍໄດ້ 8ຄົນ

    0
    696

    ຕໍ່ກັບເຫດການເສົ້າເຮືອຫຼົ້ມຢູ່ອ່າງນໍ້າງື່ມເມື່ອວັນທີ 4 ເມສາ ທີ່ຜ່ານມາ ເຊື່ອວ່າຫຼາຍທ່ານຈະຮັບຮູ້ມາແລ້ວບໍ່ໜ້ອຍ ແຕ່ທ່ານຮູ້ບໍ່ວ່າມີຊາຍຄົນໜຶ່ງທີ່ເສຍສະລະດໍາດິ່ງນໍ້າເລິກເພື່ອຊ່ວຍຜູ້ເຄາະຮ້າຍໃນເຫດການດັ່ງກ່າວ ໂດຍບໍ່ຄິດເຖິງຊີວິດຂອງຕົນເອງ ເຊິ່ງເປັນສິ່ງທີ່ໜ້າຊື່ນຊົມ ແລະຍ້ອງຍໍສັນລະເສີນເປັນຢ່າງຍິ່ງ.

    ຊາຍຜູ້ນີ້ມີນາມວ່າ ທ້າວທອງຄູນ ໄຊຍະວົງ, ອາຍຸ 28 ປີ, ບ້ານຫ້ວຍປຸ່ງ, ເມືອງແກ້ວອຸດົມ, ແຂວງວຽງຈັນ ເປັນໜຶ່ງໃນບຸກຄົນສຳຄັນໃນການຊ່ວຍເຫລືອຜູ້ປະສົບເຄາະຮ້າຍເຮືອປີ້ນທີ່ ແດນສະຫວັນເຂດອ່າງນ້ຳງື່ມໃນວັນທີ 04 ເມສາ 2021 ທີ່ຜ່ານມາ.


    ອີງຕາມການໃຫ້ສຳພາດຊາຍຄົນນີ້ບອກໄວ້ວ່າ: ຕົນເອງໄດ້ຂີ່ເຮືອຫາປາຢູ່ບໍລິເວນດັ່ງກ່າວໄດ້ຍິນຄົນເວົ້າວ່າມີເຮືອໃຫ່ຍປີ້ນ, ກໍເລີຍຟ້າວໄປທີ່ຈຸດເກີດເຫດດັ່ງກ່າວ ແລ້ວກໍອາສາສະຫມັກຕົວເອງໂດດລົງນ້ຳຊ່ວຍເຫລືອໂດຍທັນທີ (ລາວບໍ່ມີອຸປະກອນຊ່ວຍດຳນ້ຳໃດໆ ແລະ ຕອນທີ່ລົງໄປຊ່ວຍກໍບໍ່ຮູ້ວ່າແມ່ນເຮືອຂອງໃຜທີ່ລົງໄປຊ່ວຍກໍຊ່ວຍດ້ວຍຄວາມເຕັມໃຈ). ລາວຈື່ໄດ້ວ່າລາວຊ່ວຍໄດ້ທັງຫມົດ 8 ຄົນ, ໃນຈຳນວນດັ່ງກ່າວນັ້ນແມ່ນມີແຕ່ ທ່ານ ຈູມມະລີ ໄຊຍະສອນ ພຽງຄົນດຽວທີ່ປອດໄພ.

    ມາຮອດວັນທີ 07 ເມສາ 2021 ທ່ານເຈົ້າເມືອງພ້ອມຄະນະ ແນວໂຮມແຂວງພ້ອມຄະນະໄດ້ນຳພາທຳພິທີແກ້ເຈົ້າພູມເຈົ້າທີ່ ທີ່ໄດ້ບະບົນເອົາສົບຢູ່ເຮືອເກີດອຸປະຕິເຫດ ຖືວ່າບໍມີອັນຂ້ອງອັນຄາ ແລະ ໄດ້ມັດແຂນເອີ້ນຂັວນເອົາ ທ້າວ ທອງຄູນ ຜູ້ທີ່ຖືວ່າເປັນຮີໂຣ້ໃນເຫດການນີ້.


    ໃນເວລາຕອນຄ່ຳຂອງວັນທີ 07 ເມສາ 2021 ທ້າວ ທອງຄູນ ໄຊຍະວົງ ພ້ອມດ້ວຍຄອບຄົວກໍໄດ້ເດີນທາງມາຮ່ວມພິທີຊາປະນະກິດສົບທີ່ສະໂມສອນຂອງກະຊວງປ້ອງກັນປະເທດ ແລະ ໄດ້ຕັ້ງໃຈວ່າຊິບວດເພື່ອສົ່ງດວງວິນຍານຂອງຜູ້ເສຍຊີວິດໃຫ້ໄປສູ່ສຸຂະຕິອີກດ້ວຍ.