ຕຳແລ້ວໜີຢູ່ຖະໜົນ 13 ໃຕ້ ຈົນມີຜູ້ເສຍຊີວິດ 1 ຄົນ ສຸດທ້າຍໄປບໍ່ລອດ

0
213

ພັທ ວິລະພົງ ສະເໜ່ຫາ ຫົວໜ້າພະແນກຕໍາຫຼວດຈາລະຈອນ ຫ້ອງຕໍາຫຼວດ ປກສ ນວ ໄດ້ໃຫ້ສໍາພາດຕໍ່ນັກຂ່າວ ປກສ ນວ ໃນວັນທີ 1 ເມສາ 2021 ວ່າ: ເວລາປະມານ 18: 50 ໂມງ ຂອງວັນທີ 8 ມີນາ 2021 ໄດ້ຮັບແຈ້ງຈາກພົນລະເມືອງດີ ທາງໂທລະສັບ ວ່າ: ເກີດອຸບັດຕິເຫດຢູ່ເຂດບ້ານໂນນທອງ ເມືອງໄຊທານີ ນວ ລະຫວ່າງລົດຈັກ ແລະ ລົດຍົນກະບະຮຸນໄດ ແລ້ວຜູ້ຂັບຂີ່ລົດຍົນກະບະຮຸນໄດ ໄດ້ເອົາຕົວລົບໜີ,

ພາຍຫຼັງໄດ້ຮັບແຈ້ງ ຈິງລົງກວດກາຊັນນະສູດສະຖານທີ່ເກີດເຫດພົບເຫັນ ລົດຈັກເວບ 100 ໝາຍເລກທະບຽນ ດກ 3178 ກໍາແພງນະຄອນ ເປ່ເພສົມຄວນ ແລະ ມີຜູ້ເສຍຊີວິດ ຈາກນັ້ນຈິງໄດ້ຊັນລະສູດ, ວັດແທກ ມາຮອດວັນທີ 15 ມີນາ 2021 ຈິ່ງເຂົ້າກັກຕົວຜູ້ຂັບຂີ່ລົດຍົນຄື: ທ້າວ ຄໍາອິນ ອາຍຸ 27 ປີ, ອາຊີບຄ້າ-ຂາຍ ຢູ່ບ້ານໄຊສົມບູນ ເມືອງໄຊທານີ ນະຄອນຫຼວງວຽງຈັນ, ພ້ອມລົດຍົນກະບະຮຸນໄດ ໝາຍເລກທະບຽນ ກລ 1507 ກໍາແພງນະຄອນ ມາເປັນຂອງກາງໃນການດໍາເນີນຄະດີ.

ຜ່ານການສອບສືບ ທ້າວ ຄໍາອິນ ໄດ້ຮັບສາສະພາບວ່າ: ໃນວັນທີ 8 ມີນາ 2021 ຕົນໄດ້ຂັບຂີ່ລົດອອກໄປຊື້ໝາກໂມແຖວບ້ານທ່າຈໍາປາ ເມືອງໄຊທານີ ເພື່ອມານັ່ງຂາຍຢູ່ແຄມທາງເຂດຫຼັກ 23 ເມືອງໄຊທານີ ນະຄອນຫຼວງວຽງຈັນ ຫຼັງຈາກໄດ້ຂົ້ນໝາກໂມລົງລົດໝົດ ເວລາປະມານ 18 ໂມງ ຕົນຈິງໄດ້ຂັບຂີ່ລົດຍົນຮຸນໄດຄັນດັ່ງກ່າວກັບຕາມຖະໜົນ 13 ໃຕ້ ຢູ່ບ້ານໂນນທອງ ເມືອງໄຊທານີ ນວ ພໍມາຮອດຈຸດເກີດເຫດເຂດບ້ານ ເປັນເສັ້ນທາງລ້ຽວກັບ

ເຊິ່ງເສັ້ນທາງກໍາລັງກໍ່ສ້າງ ບວກກັບບໍ່ມີໄຟເຍື່ອງທາງ ແລະ ຕົນເອງກໍ່ໄຕ້ໄຟຕາລົດຍົນຕໍາ ຈິງໄດ້ຂັບຂີ່ລົດຕໍາກົ້ນລົດຈັກຄັນດັ່ງກ່າວ, ແຕ່ດ້ວຍຄວາມຕົກໃຈ ແລະ ຢ້ານ ຕົນຈິງບໍ່ໄດ້ລົງເບິ່ງຄູ່ກໍລະນີ ແລ້ວຂັບຂີ່ລົດລົບໜີກັບເຮືອນ, ຫຼັງຈາກມາຮອດເຮືອນຕົນໄດ້ມ້າງຮາວລົດອອກ ແລ້ວຂັບຂີ່ລົດໄປແປງຢູ່ແຂວງຫຼວງພະບາງ, ມາຮອດວັນທີ 15 ມີນາ 2021 ເວລາປະມານ 14:30 ໂມງ ເຈົ້າໜ້າທີ່ໄດ້ເຂົ້າກັກຕົວ ພ້ອມລົດຍົນຮຸນໄດຄັນດັ່ງກ່າວ.

ປັດຈຸບັນຄະດີດັ່ງກ່າວ ແມ່ນຢູ່ໃນຂັ້ນຕອນຂອງການສືບສວນ-ສອບສວນ ຂອງເຈົ້າໜ້າທີ່, ພ້ອມນີ້ ພັທ ວິລະພົງ ສະເໜ່ຫາ ໄດ້ຮຽກຮ້ອງໃຫ້ພໍ່ແມ່ຜູ້ປົກຄອງຈົ່ງເອົາໃຈໃສ່ສຶກສາອົບຮົມລູກ-ຫຼານຂອງຕົນ ໃນການຂັບຂີ່ລົດຕ້ອງປະຕິບັດຕາມລະບຽບການສັນຈອນຢ່າງເຂັ້ມງວດ ແລະ ບໍ່ຄວນເອົາຄະດີລາຍນີ້ເປັນແບບຢ່າງ ເມືອຂັບຂີ່ລົດເກີດອຸບັດຕິເຫດ ຕ້ອງໃຫ້ຄວາມຊ່ວຍເຫຼືອຄູ່ກໍລະນີ ແລະ ບໍ່ຄວນເອົາຕົວລົບໜີຄືກັບຄະດີລາຍນີ້.