ຫຄຊກລ ແລະ ປະເທດຄູ່ຮ່່ວມພັດທະນາ ຢ້ຽມຢາມ ສະໜາມກວດກູ້ລະເບີດບໍ່ທັນແຕກ ຢູ່ແຂວງຊຽງຂວາງ

0
102

ຫ້ອງການຄະນະກຳມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ (ຫຄຊກລ), ພ້ອມດ້ວຍຄະນະກຳມະການ ເພື່ອແກ້ໄຂບັນຫາລະເບີດບໍ່ທັນແຕກແຂວງຊຽງຂວາງ, ບັນດາປະເທດຄູ່ຮ່ວມພັດທະນາ ແລະ ສື່ມວນຊົນ ລົງຢ້ຽມຢາມສະໜາມກວດກູ້ລະເບີດບໍ່ທັນແຕກ ແລະ ທຳລາຍລະເບີດບໍ່ທັນແຕກ ຂອງໂຄງການເກັບກູ້ລະເບີດແຫ່ງຊາດ ຢູ່ບ້ານລາດບວກ ເມືອງແປກ ແຂວງຊຽງຂວາງ ໃນວັນທີ 1 ເມສາ 2021, ເຊິ່ງນຳໂດຍ ທ່ານ ປະເດີມພອນ ສົນທະນີ ຮອງ

ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ຮອງປະທານຜູ້ປະຈຳການຄະນະກໍາມະການຄຸ້ມຄອງແຫ່ງຊາດເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງ ຢູ່ ສປປ ລາວ, ທ່ານ ສີວິໄລ ແສງຈະເລີນ ຮອງເຈົ້າແຂວງຊຽງຂວາງ, ປະທານຄະນະກໍາມະການເພື່ອແກ້ໄຂບັນຫາລະເບີດບໍ່ທັນແຕກແຂວງຊຽງຂວາງ, ທ່ານ ນາງ ຣີກາດາ ຣີເຈີ (Ricarda Rieger) ຜູ້ຕາງໜ້າອົງການສະຫະປະຊາຊາດເພື່ອການພັດທະນາ ປະຈຳ ສປປ ລາວ.ການລົງຢ້ຽມຢາມໃນຄັ້ງນີ້ ແມ່ນແນໃສ່ໃຫ້ປະເທດຄູ່ຮ່ວມພັດທະນາ ໄດ້ຮັບຮູ້ ແລະ ເຂົ້າໃຈສະ ພາບການຕົກຄ້າງຂອງລະເບີດຢູ່ທ້ອງຖິ່ນ ເພື່ອເປັນການລະດົມຂົນຂວາຍທຶນໃໝ່ຈາກບັນດາປະເທດຜູ້ໃຫ້ທຶນຕ່າງໆ ເຂົ້າໃນວຽກງານແກ້ໄຂບັນຫາ

ລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ ໃຫ້ຫລາຍຂຶ້ນ, ທັງເປັນການປະກອບສ່ວນເຂົ້າໃນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມແຫ່ງຊາດ, ເປົ້າໝາຍພັດທະນາແບບຍືນຍົງທີ 18 ແລະ ແຜນການລຶບລ້າງຄວາມທຸກຍາກ.ໂອກາດນີ້, ທ່ານ ປະເດີມພອນ ສົນທະນີ ໄດ້ໃຫ້ຮູ້ວ່າ: ສປປ ລາວ ເປັນປະເທດໜຶ່ງໃນໂລກທີ່ໄດ້ຮັບຜົນກະທົບໜັກກວ່າໝູ່ ກ່ຽວກັບລະເບີດຕົກຄ້າງແຕ່ປາງສົງຄາມ ລວມທັງລະເບີດລູກຫວ່ານ ທີ່ຢັ່ງ ຢາຍໄປທົ່ວທຸກແຂວງ, ເຊິ່ງລັດຖະບານໄດ້ຖືເອົາ ວຽກງານການແກ້ໄຂ

ບັນຫາລະເບີດບໍ່ທັນແຕກ ເປັນວຽກບູລິມະສິດ ເນື່ອງຈາກເປັນອຸປະສັກ ແລະ ເປັນສິ່ງກີດຂວາງອັນໃຫຍ່ຫລວງ ໃນການພັດທະນາເສດ ຖະກິດ-ສັງຄົມ ແລະ ການດໍາລົງຊີວິດຂອງປະຊາຊົນລາວບັນດາເຜົ່າ ໃນຂອບເຂດທົ່ວປະເທດ. ສະນັ້ນ, ລັດຖະບານຈຶ່ງຖືເປັນບັນຫາຕົ້ນຕໍ ແລະ ສໍາຄັນເຂົ້າໃນແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX (2021-2025) ເພື່ອຈັດຕັ້ງຜັນຂະຫຍາຍເປົ້າໝາຍການພັດທະນາແບບຢືນຍົງ 2030 ໂດຍສະເພາະແມ່ນເປົ້າໝາຍທີ 18 ກ່ຽວກັບການດໍາລົງຊີວິດທີ່ປອດໄພ ຈາກລະເບີດລະເບີດບໍ່ທັນແຕກທີ່ຕົກຄ້າງແຕ່ປາງສົງຄາມ. ຄຽງຄູ່ກັນນີ້, ຍຸດທະສາດວ່າດ້ວຍການແກ້ໄຂບັນຫາລະເບີດບໍ່ທັນແຕກ ໄລຍະ 10 ປີ (2021-2030) ກໍໄດ້ຮັບການປະເມີນ

ແລະ ກໍາລັງພັດທະນາເປັນຍຸດທະສາດສະບັບໃໝ່ ເພື່ອໃຫ້ສອດຄ່ອງກັບສະພາບຕົວຈິງຂອງ ສປປ ລາວ ແລະ ໃຫ້ສາມາດຈັດຕັ້ງປະຕິບັດຢ່າງມີປະສິດທິຜົນ.ຜ່ານການລົງຢ້ຽມຢາມສະໜາມເກັບກູ້ລະເບີດຂອງໂຄງການເກັບກູ້ລະເບີດແຫ່ງຊາດ ຢູ່ບ້ານລາດບວກ ເຫັນວ່າ: ຍັງມີສິ່ງທ້າທ້າຍຫລາຍຕໍ່ວຽກງານການເກັບກູ້ລະເບີດບໍ່ທັນແຕກ ເນື່ອງຈາກປະຊາຊົນຍັງມີຄວາມຕ້ອງການຫລາຍໃນການພັດທະນາຊີວິດການເປັນຢູ່, ການເຮັດກິດຈະກໍາ ແລະ ການທໍາມາຫາກິນອື່ນໆ. ຈາກນັ້ນ, ຄະນະດັ່ງກ່າວ ກໍໄດ້ລົງຢ້ຽມຢາມກິດຈະກຳໂຄສະນາສຶກສາຄວາມສ່ຽງ ຈາກລະເບີດບໍ່ທັນແຕກ ຢູ່ໂຮງຮຽນປະຖົມສຶກສາບ້ານລາດບວກ ແລະ ພົບປະຜູ້ຖືກເຄາະຮ້າຍຈາກລະເບີດບໍ່ທັນແຕກ ຕື່ມອີກ.

ຂ່າວ-ພາບ: ສິງຄຳ