ມອບ-ຮັບໜ້າທີ່ ລັດຖະມົນຕີກະຊວງ ຍທຂ ຜູ້ເກົ່າ ແລະ ຜູ້ໃໝ່

0
463

ກະຊວງໂຍທາທິການ ແລະ ຂົນສົ່ງ (ຍທຂ) ໄດ້ຈັດພິທີມອບ – ຮັບໜ້າທີ່ລັດ ຖະມົນຕີກະຊວງ ຍທຂ ລະຫວ່າງ ທ່ານ ບຸນຈັນ ສິນທະວົງ ລັດຖະມົນຕີກະຊວງ ຍທຂ ຜູ້ເກົ່າ ແລະ ທ່ານ ວຽງສະຫວັດ ສີພັນດອນ ຮອງລັດຖະມົນຕີກະຊວງ ຍທຂ ມາເປັນລັດຖະມົນຕີກະຊວງ ຍທຂ ຜູ້ໃໝ່ ຈັດຂຶ້ນວັນທີ 29 ມີນາ 2021 ທີ່ກະຊວງ ດັ່ງກ່າວ ໃຫ້ກຽດເຂົ້າຮ່ວມຂອງ ທ່ານ ກິແກ້ວ ໄຂຄໍາພິທູນ ກໍາມະການກົມການ ເມືອງສູນກາງພັກ ຮອງນາຍົກລັດຖະມົນຕີ ມີຄະນະບໍລິຫານງານພັກກະຊວງ ຄະນະໜ່ວຍ ພັກກົມ

ພະແນກ ຜູ້ຕາງໜ້າຈາກຄະນະຈັດຕັ້ງສູນກາງພັກ, ພະນັກງານຫຼັກແຫຼ່ງ ຍທຂ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ. ໃນໂອກາດດັ່ງກ່າວ, ທ່ານ ນາງ ວົງຄຳ ສຸທຳມະວົງ ຕາງໜ້າຈາກຄະນະຈັດ ຕັ້ງສູນກາງພັກ ໄດ້ຂຶ້ນຜ່ານບັນດານິກຳຕ່າງໆກ່ຽວກັບການສັບຊ້ອນ ແລະ ແຕ່ງຕັ້ງລັດຖະ ມົນຕີ ຍທຂ ເປັນຕົ້ນແມ່ນມະຕິຂອງກອງປະຊຸມຄັ້ງປະຖົມມະລືກ ຂອງສະພາແຫ່ງຊາດ ຊຸດທີ IX ສະບັບເລກທີ 9/ສພຊ ລົງວັນທີ 22/3/2021 ວ່າດ້ວຍການຮັບຮອງເອົາ ໂຄງປະກອບກົງຈັກລັດຖະບານ ແລະ ສະມາຊິກ

ລັດຖະບານ ໂດຍໄດ້ແຕ່ງຕັ້ງໃຫ້ທ່ານ ວຽງສະຫວັດ ສີພັນດອນ ເປັນລັດຖະມົນຕີກະຊວງໂຍທາທິການ ແລະ ຂົນສົ່ງ ຜູ້ໃໝ່ ແລະ ດຳລັດຂອງປະທານປະເທດ ສປປ ລາວ ເລກທີ 116/ປປທ ລົງວັນທີ 24 ມີນາ 2021 ວ່າດ້ວຍການພັກການ-ຮັບອຸດໜູນບຳນານ ໂດຍໄດ້ອະນຸມັດໃຫ້ ທ່ານ ບຸນຈັນ ສິນທະວົງ ລັດຖະມົນຕີກະຊວງໂຍທາທິການ ແລະ ຂົນສົ່ງ (ຜູ້ເກົ່າ) ອອກພັກການ-ຮັບອຸດໜູນບຳນານ. ພ້ອມນີ້, ທ່ານ ກິແກ້ວ ໄຂຄຳພິທູນ ໄດ້ໃຫ້ກຽດໂອ້ລົມໃນພິທີດັ່ງກ່າວ ໂດຍມີ ເນື້ອໃນບາງຕອນວ່າ: ມອບໃຫ້

ບັນດາສະຫາຍຄະນະພັກ, ການນໍາທຸກຂັ້ນ ເປັນເອກະພາບ ນໍາສູນກາງພັກ, ລັດຖະບານຕໍ່ການສັບປ່ຽນໜ້າທີ່ຄວາມຮັບຜິດຊອບຂອງພະນັກງານການ ນໍາຂັ້ນສູງ ໃນຄັ້ງນີ້; ບົນພື້ນຖານນັ້ນ, ໃຫ້ບັນດາສະຫາຍ ສືບຕໍ່ນໍາພາແນວຄິດຂອງພະ ນັກງານ-ສະມາຊິກພັກ ຢູ່ແຕ່ລະພະແນກການໃຫ້ເຂົ້າໃຈ ແລະ ຮັບຮູ້ຢ່າງທົ່ວເຖິງ ຕໍ່ການ ສັບປ່ຽນພະນັກງານການນໍາໃນເທື່ອນີ້ ເພື່ອພ້ອມກັນຜ່ານຜ່າທຸກອຸປະສັກນາໆປະການ ໃຫ້ໄດ້ຮັບຜົນດີຂຶ້ນເລື້ອຍໆ ສືບຕໍ່ມີສະຖຽນລະພາບດ້ານການເມືອງຢ່າງໜັກແໜ້ນ, ສັງຄົມ ມີຄວາມສະຫງົບ, ປະຊາຊົນມີຄວາມສາມັກຄີເປັນປຶກແຜ່ນແໜ້ນໜາ; ສ້າງຄວາມເປັນ ເອກະພາບພາຍໃນ ເພື່ອສືບຕໍ່ປົກປັກຮັກສາມູນເຊື້ອອັນດີງາມ, ເຕົ້າໂຮມຄວາມ

ສາມັກຄີໃນ ຖັນແຖວພະນັກງານ; ສະໜັບສະໜູນລັດຖະມົນຕີຄົນໃໝ່ ເພື່ອຮ່ວມມືໃນການພັດທະນາ ວຽກງານໃຫ້ມີຄວາມໜັກແໜ້ນ, ປະຕິບັດແບບແຜນວິທີການເຮັດວຽກງານ ຍທຂ ໃຫ້ແຂງ ແຮງຂຶ້ນເປັນກ້າວໆ ໃຫ້ສົມກັບຄໍາຂວັນຂອງຂະແໜງການໂຍທາ ທີ່ວ່າສູ້ຊົນພັດທະນາ ຂະແໜງການ ຍທຂ ຕາມວິໄສທັດ ຮອດປີ 2030 ພັດທະນາໂຍທາທິການ ແລະ ຂົນສົ່ງ ໃຫ້ເປັນປາຍແຫຼມ, ມີຈຸດສຸມ, ມີປະສິດທິຜົນສູງ, ທັນສະໄໝ, ປອດໄພ, ມີຄວາມທົນທານ ຕໍ່ການປ່ຽນແປງດິນຟ້າອາກາດ, ເຊື່ອມໂຍງ-ເຊື່ອມຈອດ ແລະ ຍືນຍົງ.