ສໍາເລັດການຝຶກອົບຮົມສືບສວນ-ສອບສວນ ທາງດ້ານການເງິນ ຕ້ານການສໍ້ລາດບັງຫລວງ

0
61

ໃນວັນທີ 26 ມີນາ 2021 ອົງການກວດກາລັດຖະບານ ແລະ ອົງການຕ້ານການສໍ້ລາດບັງຫລວງຂັ້ນສູນກາງ ຮ່ວມກັບ ອົງການສະຫະປະຊາຊາດເພື່ອນຕ້ານຢາເສບຕິດ ແລະ ອາຊະ ຍະກໍາປະຈໍາລາວ (UNODC) ໄດ້ສໍາເລັດຊຸດຝຶກອົບຮົມ ກ່ຽວກັບວຽກງານສືບສວນ-ສອບສວນທາງດ້ານການເງິນ ໃນຄະດີຖານຕ້ານການສໍ້ລາດບັງຫລວງຂຶ້ນ ທີ່ໂຮງແຮມປາກເຊ ພາຍໃຕ້ການເປັນປະທານ ແລະ ໃຫ້ກຽດມອບໃບຢັ້ງຍືນການຝຶກອົບຮົມ, ໂດຍ ທ່ານ ວັນຄໍາ ໄຊວົງສັກ ຄະນະພັກ, ຫົວໜ້າກົມຄົ້ນຄວ້າ ແລະ

ວາລະສານກວດກາ ຄະນະກວດກາສູນກາງພັກ ແລະ ອົງການກວດກາລັດ ຖະບານ; ທ່ານ ຟຣານເຊສໂກ້ ແຊັກກີ້ ທີ່ປຶກສາຕ້ານການສໍ້ລາດບັງຫລວງ ຂອງອົງການສະຫະປະຊາຊາດ ເພື່ອຕ້ານຢາເສບຕິດ ແລະ ອາຊະຍະກໍາ ປະຈໍາລາວ, ພ້ອມດ້ວຍສໍາມະນາກອນ ຜູ້ທີ່ເຮັດວຽກງານກວດກາ ຢູ່ 3 ແຂວງພາກກາງ ແລະ 4 ແຂວງພາກໃຕ້ ເຂົ້າຮ່ວມ.ໃນການຝຶກອົບຮົມໃນຄັ້ງນີ້, ສໍາມະນາກອນ ໄດ້ຮັບຟັງການບັນລະຍາຍຈາກນັກວິທະຍາກອນ ທັງພາຍໃນ ແລະ ຕ່າງປະເທດ ກ່ຽວກັບວຽກງານສືບສວນ-ສອບສວນ ເປັນຕົ້ນ: ຄວາມຮູ້ພື້ນຖານກ່ຽວກັບວຽກງານກວດກາລັດ, ການສືບສວນ-ສອບສວນການສໍ້ລາດບັງຫລວງ; ການຕິດຕາມຮ່ອງຮອຍຂອງເງິນ, ຊັບສິນທີ່ຖືກລັກ

ຂະໂມຍໄປ, ແນວຄິດ ແລະ ຂໍ້ກໍານົດທີ່ສໍາຄັນ-ຂັ້ນຕອນທໍາອິດເວລາເປີດການ ດໍາເນີນຄະດີ, ການສ້າງ ຫລື ລຽງລໍາດັບເວລາ, ການສືບສວນ-ສອບສວນບຸກຄົນທາງດ້ານກົດໝາຍ, ການສໍ້ລາດບັງຫລວງໃນໂຄງການລົງທຶນກໍ່ສ້າງພື້ນຖານໂຄງລ່າງຂອງລັດ. ພ້ອມນັ້ນ, ຍັງມີການຕັ້ງຄໍາຖາມ ແລກປ່ຽນບົດຮຽນປະສົບການຕົວຈິງ ລະຫວ່າງສໍາມະນາກອນ ແລະ ນັກວິທະຍາກອນ ດ້ວຍບັນຍາກາດຟົດຟື້ນ.ໃນໂອກາດດັ່ງກ່າວ, ທ່ານ ວັນຄໍາ ໄຊວົງສັກ ໄດ້ສະແດງຄວາມຂອບໃຈຄະນະນຳຂອງແຂວງ ກໍຄື ຄະນະນໍາອົງການກວດກາລັດ ແຂວງຈຳປາສັກ ແລະ ອົງການສະຫະປະຊາດ ເພື່ອຕ້ານຢາເສບຕິດ ແລະ ອາຊະຍາກຳ (UNODC) ປະຈໍາລາວ ທີ່ໃຫ້ການຊ່ວຍເຫລືອໃນການຈັດຊຸດຝຶກອົບຮົມ

ໃນຄັ້ງນີ້. ໃນການຝຶກອົບຮົມເຫັນວ່າ ຊ່ຽວຊານ, ຄູ-ອາຈານ ແລະ ສໍາມະນາກອນ ລ້ວນແຕ່ມີຄວາມເອົາ ໃຈໃສ່ຢ່າງຕັ້ງໜ້າ ເຂົ້າໃນການບັນລະຍາຍ-ຖ່າຍທອດຄວາມຮູ້ປະສົບການ ໃນການສົນທະນາແລກປ່ຽນ ແລະ ຮັບຜິດຊອບສູງ, ເຮັດໃຫ້ຜູ້ເຂົ້າຮ່ວມສາມາດຮຽນຮູ້ບົດຮຽນ ແລະ ປະສົບການອັນໃໝ່ເພີ່ມຕື່ມກ່ຽວກັບວຽກງານສືບສວນ-ສອບສວນ ທາງດ້ານການເງິນ ໃນຄະດີຖານຕ້ານການສໍ້ລາດບັງຫລວງ. ພ້ອມນີ້, ໄດ້ຮຽກຮ້ອງມາຍັງສຳມະນາກອນທັງໝົດ ຈົ່ງສືບຕໍ່ນຳເອົາບົດຮຽນ ແລະ ປະສົບການຈາກການຝຶກອົບຮົມໃນຄັ້ງນີ້ ໄປສືບຕໍ່ຄົ້ນຄວ້າ ແລະ ຜັນຂະຫຍາຍ ເຂົ້າໃນວຽກງານຂອງຕົນໃຫ້ໄດ້ຮັບ ໝາກຜົນດີຂຶ້ນເປັນກ້າວໆ.