ຮອງນາຍົກລັດຖະມົນຕີ ລົງຊຸກຍູ້ໂຄງການກໍ່ສ້າງ ໂຮງໝໍມະໂຫສົດ ຂະໜາດ 600 ຕຽງ

0
139

ໃນວັນທີ 17 ມີນາ 2021, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະ ການລົງທຶນ ພ້ອມດ້ວຍຄະນະ ໄດ້ລົງຢ້ຽມຢາມ ແລະ ຕິດຕາມຄວາມຄືບໜ້າ ໂຄງການກໍ່ສ້າງໂຮງໝໍມະໂຫສົດ (ຫລັງໃໝ່) ຂະໜາດ 600 ຕຽງ ເຊິ່ງຄາດວ່າຈະໃຫ້ສຳເລັດທັງໝົດໃນເດືອນພຶດສະພາ 2022 ແລະ ເປີດນຳໃຊ້ຢ່າງເປັນທາງການ.ຕາມການລາຍງານຈາກຂະແໜງການທີ່ກ່ຽວຂ້ອງ, ພາຍຫລັງກໍ່ສ້າງສຳເລັດແລ້ວ ໂຮງໝໍມະໂຫສົດແຫ່ງນີ້ ຈະກາຍເປັນໂຮງໝໍທີ່ໃຫຍ່ ແລະ ມີ

ອຸປະກອນການແພດທີ່ທັນສະໄໝທີ່ສຸດໃນ ສປປ ລາວ, ເຊິ່ງມີມູນຄ່າການລົງທຶນກໍ່ສ້າງຫລາຍກວ່າ 590 ລ້ານຢວນ ໂດຍໄດ້ຮັບການຊ່ວຍເຫລືອລ້າຈາກລັດຖະບານ ສປ ຈີນ.ການກໍ່ສ້າງໂຄງການດັ່ງກ່າວ ໄດ້ແບ່ງອອກເປັນ 2 ໄລຍະ ໂດຍໄດ້ເລີ່ມລົງມືກໍ່ສ້າງຢ່າງເປັນທາງການໃນທ້າຍປີ 2018 ມາຮອດປັດຈຸບັນ, ການກໍ່ສ້າງໄລຍະທີ 1 ສຳເລັດແລ້ວປະມານ 80% ແລະ ຄາດວ່າຈະໃຫ້ສຳເລັດໃນເດືອນພຶດສະພາ 2021 ນີ້, ສ່ວນໄລຍະທີ 2 ຄາດວ່າຈະເລີ່ມລົງມືກໍ່ສ້າງໃນເດືອນກໍລະກົດ 2021 ແລະ ໃຫ້ສຳເລັດ

ທັງໝົດໃນເດືອນພຶດສະພາ 2022.ຕາມແຜນການກໍ່ສ້າງແລ້ວ, ໄລຍະທີ່ 1 ແມ່ນຈະໃຫ້ສໍາເລັດໃນເດືອນກໍລະກົດ ປີ 2020 ​ແຕ່ຍ້ອນຜົນກະທົບຈາກການລະບາດຂອງພະຍາດໂຄວິດ-19 ຈຶ່ງເຮັດໃຫ້ວຽກງານການກໍ່ສ້າງມີຄວາມຫລ້າຊ້າ, ທັງນີ້ ກໍຍ້ອນວ່າ ວິຊາການ, ຊ່ຽວຊານ, ວັດຖຸດິບ ແລະ ວັດສະດຸກໍ່ສ້າງ ບໍ່ສາມາດນຳເຂົ້າມາໄດ້ຕາມຄວາມຕ້ອງການ ແລະ ຕາມເວລາທີ່ກຳນົດໄວ້.ໂອກາດນີ້, ທ່ານ ສອນໄຊ ສີພັນດອນ ໄດ້ສະແດງຄວາມຊົມເຊີຍມາຍັງບໍລິສັດຮັບເໝົາກໍ່ສ້າງ ແລະ ຄະນະຮັບຜິດຊອບທີ່

ກ່ຽວຂ້ອງ ທີ່ໄດ້ສຸມທຸກຄວາມພະຍາຍາມໃນການຈັດຕັ້ງປະຕິບັດໜ້າທີ່ຈົນໄດ້ຮັບຜົນສຳເລັດໃນທ່າມກາງທີ່ມີອຸປະສັກຫລາຍຢ່າງ ໂດຍສະເພາະຜົນກະທົບຂອງການລະບາດພະຍາດໂຄວິດ-19. ເຖິງແນວໃດກໍກີ, ທ່ານຮອງນາຍົກລັດຖະມົນຕີ ກໍໄດ້ເນັ້ນໃຫ້ຄະນະຮັບຜິດຊອບໂຄງການດັ່ງກ່າວ ຮ່ວມກັບພາກສ່ວນທີ່ກ່ຽວຂ້ອງ ສືບຕໍ່ກວດກາຄືນກ່ຽວກັບ

ການນຳເຂົ້າວັດສະດຸກໍ່ສ້າງ ແລະ ອື່ນໆທີ່ກ່ຽວຂ້ອງ ເພື່ອໃຫ້ມີຄວາມວ່ອງໄວ ແລະ ທັນການ, ຖ້າຫາກວ່າມີບັນຫາໃດຫຍຸ້ງຍາກ ຂໍໃຫ້ທາງຄະນະຮັບຜິດຊອບໂຄງການ ເຮັດໜັງສືລາຍງານມາຍັງພາກສ່ວນທີ່ກ່ຽວຂ້ອງ ເພື່ອແກ້ໄຂຢ່່າງທ່ວງທັນ. ພ້ອມກັນນັ້ນ ກໍຮຽກຮ້ອງໃຫ້ທຸກຂະແໜງການທີ່ກ່ຽວຂ້ອງ ພະຍາຍາມສູ້ຊົນ, ຕິດຕາມກວດກາ, ຊຸກຍູ້ ແລະ ອຳນວຍຄວາມສະດວກ ໃຫ້ໂຄງການກໍ່ສ້າງໂຮງໝໍມະໂຫສົດແຫ່ງນີ້ ມີປະສິດທິພາບ, ປະສິດທິຜົນ ແລະ ສຳເລັດຕາມຄາດໝາຍທີ່ວ່າງໄວ້.