ເມືອງນານ ຈັດພິທີທໍາລາຍສິນຄ້າໝົດອາຍຸ ຫຼາຍກວ່າ 25 ລາຍການ

0
129

ວັນທີ 19 ພະຈິກ 2020 ນີ້ຫ້ອງການອຸດສາຫະກໍາ ແລະ ການຄ້າເມືອງນານ ໄດ້ຈັດພິທີທໍາລາຍສິນຄ້າໝົດອາຍຸ ແລະ ສິນຄ້າຫ້າມນໍາເຂົ້າຂຶ້ນ ໂດຍການເຂົ້າຮ່ວມເປັນປະທານຂອງ ທ່ານ ແສງເພັດ ເພັດດວງຈັນ ຮອງເຈົ້າເມືອງ-ເມືອງນານ, ມີທ່ານ ພອນປະສິດ ພອນສະຫວັດ ຮອງຫົວໜ້າຂະແໜງການຄ້າພາຍໃນແຂວງ, ທ່ານ ນາງ

ມາລີ ທະນົງສັກ ຫົວໜ້າຫ້ອງການອຸດສາຫະກໍາ ແລະ ການຄ້າເມືອງນານ, ມີບັນດາກຸ່ມເສດຖະກິດຂອງເມືອງ ພ້ອມດ້ວຍແຂກຖືກເຊີນເຂົ້າຮ່ວມ.ທ່ານ ນາງ ມາລີ ທະນົງສັກ ຫົວໜ້າຫ້ອງການອຸດສາຫະກໍາ ແລະ ການຄ້າເມືອງໄດ້ຂຶ້ນຜ່ານບົດລາຍງານກ່ຽວກັບພິທີທໍາລາຍສິນຄ້າໝົດອາຍຸ ແລະ ສິນຄ້າຫ້າມນໍາເຂົ້າໃນຄັ້ງນີ້ໃຫ້ຮູ້ວ່າ ໃນໄລຍະຜ່ານມາ ທາງຈຸງານເຈົ້າໜ້າທີ່ກວດກາການຄ້າເມືອງນານ,ໄດ້ເຄື່ອນໄຫວຈັດຕັ້ງປະຕິບັດວຽກງານກວດກາການຄ້າແຕ່ລະໄລຍະ ເຊິ່ງໄດ້ເອົາໃຈໃສ່ໃນການກວດກາ ສິນຄ້າໝົດ

ອາຍຸ,ສິນຄ້າຫ້າມນໍາເຂົ້າ,ສິນຄ້ານໍາເຂົ້າບໍ່ຖືກຕ້ອງ,ສິນຄ້າປອມແປງ ແລະ ຈັກສະຕິນ ເຊິ່ງທາງຈຸງານເຈົ້າໜ້າທີ່ກວດກາການຄ້າໄດ້ລົງກວດບັນດາຫ້າງຮ້ານ,ຕະຫຼາດປ່າໄຜ່ ແລະ ຕາມຂໍ້ມູນແຫຼ່ງຂ່າວສາມາດຍືດສິນຄ້າໄດ້ທັງໝົດ 27 ລາຍການຄື ນໍ້າອັດລົມ,ໝີ່ຍໍາຍໍາ,ກາເຟເບີດີ,ນົມດີມໍ,ເຈເລ່,ຄະນໍ,ນໍ້າດີໂດ້,ນົມໄຮຄິວ,ນົມມະລິ,ໂອວັນຕິນ,ນໍ້າສະອິ້ວ,ນໍ້າປາ,ຊັອດຫອຍ ແລະ ສິນຄ້າຍ່ອຍອື່ນໆ ມູນຄ່າ 3,600,000 ກີບ, ແລະ ເຈົ້າໜ້າທີ່ກວດກາປ່າໄມ້ ຫ້ອງການກະສິກໍາ ແລະ ປ່າໄມ້ເມືອງນານໄດ້ລົງກວດ

ຕາມແຫຼ່ງຂ່າວ ສາມາດຍືດຈັກສະຕິນໄດ້ຈໍານວນ 7 ເຄື່ອງ ມູນຄ່າ 10,500,000 ກີບ,ຈັກດັ່ງກ່າວແມ່ນໄດ້ຍືດມາຈາກການລັກລອບຕັດໄມ້ຂອງປະຊາຊົນພາຍໃນເມືອງທີ່ບໍ່ຖືກຕ້ອງຕາມລະບຽບກົດໝາຍຂອງບ້ານເມືອງ ໃນການລົງກວດກາ,ຍືດສິນຄ້າທີ່ໝົດອາຍຸ ແລະ ສິນຄ້າຫ້າມນໍາເຂົ້າໃນຄັ້ງນີ້ກໍ່ເພື່ອປົກປ້ອງຜູ້ບໍລິໂພກ,ຮັກສາ

ຊີວິດ,ສຸຂະພາບ,ຊັບສິນ,ສິດ ແລະ ຜົນປະໂຫຍດອັນຊອບທໍາຂອງຜູ້ຊົມໃຊ້,ຜູ້ບໍລິໂພກ ນອກນັ້ນຍັງເປັນການສະກັດກັ້ນການທໍາລາຍປ່າໄມ້ແບບຊະຊາຍນໍາອີກ ເຊິ່ງລວມມູນຄ່າຂອງສິນຄ້າທີ່ສາມາດຍືດມາໄດ້ໃນຄັ້ງນີ້ທັງໝົດແມ່ນ 14,100,000 ກີບ ຈາກນັ້ນທີ່ພິທີຍັງໄດ້ຮັບຟັງຄໍາເຫັນໂອ້ລົມຂອງທ່ານ ແສງເພັດ ເພັດດວງຈັນ ຮອງເຈົ້າເມືອງ-

ເມືອງນານເຊິ່ງທ່ານໄດ້ເນັ້ນໜັກໃຫ້ເຈົ້າໜ້າທີ່-ທີ່ກ່ຽວຂ້ອງທຸກພາກສ່ວນຈົ່ງພ້ອມກັນເອົາໃຈໃສ່ໃນການລົງຕິດຕາມກວດກາບັນດາສິນຄ້າຕ່າງໆທີ່ນໍາມາຈໍາໜ່າຍຢູ່ພາຍໃນເມືອງໃຫ້ມີຄວາມຖືກຕ້ອງ ແລະ ມີຄວາມປອດໄພຕໍ່ຜູ້ຊົມໃຊ້ ແລະ ຜູ້ບໍລິໂພກ ແລະ ຈາກນັ້ນທາງຄະນະປະທານ,ພະນັກງານທີ່ກ່ຽວຂ້ອງ ພ້ອມດ້ວຍແຂກຖືກເຊີນທຸກພາກສ່ວນກໍ່ໄດ້ຮ່ວມກັນຈູດທໍາລາຍສິນຄ້າທີ່ໝົດອາຍຸ ແລະ ສິນຄ້າຫ້າມນໍາເຂົ້າທີ່ຍືດມາໄດ້ໃນຄັ້ງນີ້ຢ່າງເປັນທາງການ.

ຂ່າວ: ເມືອງນານ