ເຈົ້າໜ້າທີ່ຕໍາຫຼວດດ່ານສາກົນປາກຊັນ ມອບ-ສົ່ງ ແມ່ປ້າ ອາຍຸ 73 ປີ ທີ່ລັກລອບເຂົ້າເມືອງຜິດກົດໝາຍກັບຄືນປະເທດ

0
1961

ຕອນເຊົ້າ ວັນທີ 14 ຕຸລາ 2020 ເຈົ້າໜ້າທີ່ຕໍາຫຼວດກວດຄົນເຂົ້າ-ອອກເມືອງ ດ່ານສາກົນ ປາກຊັນ ແຂວງ ບໍລິຄໍາໄຊໄດ້ມອບ-ສົ່ງຜູ້ຖືກຫາ ຈໍານວນ 01 ຄົນ, ຊື່ ນາງ ວັນສີ ມາປັງໂມ ອາຍຸ 73 ປີ, ອາຊີບເຮັດສວນ, ເຊື້ອຊາດ ແລະ ສັນຊາດໄທ ຢູ່ບ້ານ ທ່າໂພ, ເມືອງ ບຶງການ, ແຂວງ ບຶງການ ລາສະອານາຈັກໄທ ທີ່ລັກລອບເຂົ້າເມືອງຜິດກົດໝາຍໃຫ້ແກ່ເຈົ້າໜ້າທີ່ຕໍາຫຼວດຝ່າຍໄທເພື່ອສົ່ງກັບຄືນປະເທດ,

ກ່າວມອບໂດຍ ທ່ານ ຮ້ອຍເອກ ບົວລຽນ ໂພຄໍາ, ຮອງຫົວໜ້າດ່ານຕໍາຫຼວດ ກວດຄົນເຂົ້າ-ອອກເມືອງ, ດ່ານສາກົນປາກຊັນ, ກ່າວຮັບໂດຍ ທ່ານ ດາບຕໍາຫຼວດ ສົມສັກ ສຸວິນຍາ ເຈົ້າໜ້າທີ່ຕໍາຫຼວດກວດຄົນເຂົ້າ-ອອກເມືອງ ດ່ານສາກົນບຶງການ, ມີພະນັກງານທີ່ກ່ຽວຂ້ອງຂອງທັງສອງຝ່າຍເຂົ້າຮ່ວມ.
ເຈົ້າໜ້າທີ່ພະແນກຕໍາຫຼວດກວດຄົນເຂົ້າ-ອອກເມືອງ, ຫ້ອງສັນຕິບານ ປກສ ແຂວງ ບໍລິຄໍາໄຊ ໄດ້ໃຫ້ຮູ້ວ່າ: ນາງ ວັນສີ ມາປັງໂມ ຖືກເຈົ້າໜ້າທີ່ທະຫານຊາຍແດນ 255 ກັກຕົວ ໃນຄັ້ງວັນທີ 22 ກັນຍາ 2020 ຢູ່ບໍລິເວນແຄມນໍ້າຂອງ ເຂດບ້ານສິນໄຊ ເມືອງ ປາກຊັນ ແຂວງ ບໍລິຄໍາໄຊ, ໃນຂໍ້ຫາລັກລອບເຂົ້າເມືອງຜິດກົດໝາຍ, ຜ່ານການສືບສວນ-ສອບສວນ ຂອງເຈົ້າໜ້າທີ່, ຜູ້ກ່ຽວໄດ້ຮັບສາລະພາບວ່າ:

ຕົນໄດ້ເລີ່ມສົ່ງແຮງງານຄົນລາວທີ່ໄປເຮັດວຽກຢູ່ ປະເທດໄທທີ່ຕ້ອງການການກັບຄືນມາປະເທດລາວແຕ່ປີ 2019 ເປັນຕົ້ນມາ, ໂດຍມີຄົນລາວຕິດຕໍ່ຫາຜົວຂອງຜູ້ກ່ຽວທີ່ເປັນຄົນຂັບລົດສາມລໍ້ ແລ້ວກໍ່ພາມາຂື້ນເຮືອຫາປາມາສົ່ງຢູ່ຝັ່ງລາວ ເຂດທ່ານໍ້າ ບ້ານ ສິນໄຊ, ເຊິ່ງກ່ອນຈະຂ້າມມາແຕ່ລະຄັ້ງໄດ້ໂທຫາຄົນລາວຜູ້ໜຶ່ງຢູ່ບ້ານສິນໄຊເພື່ອສອບຖາມເສັ້ນທາງທີ່ຈະຂ້າມມາຢ່າງລະອຽດ,

ໃນໄລຍະ ປີ 2019 ໄດ້ຮັບສົ່ງຄົນລາວກັບຄືນປະເທດດ້ວຍວິທີດັ່ງກ່າວ ຈໍານວນ 12 ຄັ້ງ, ມີຈໍານວນ 12 ຄົນ,ໂດຍເກັບຄ່າຈ້າງຄົນລະ 500 ບາດຕໍ່ຄັ້ງ, ພາຍຫຼັງໄດ້ເງິນແລ້ວຜູ້ກ່ຽວກໍ່ເອົາໄປຊື້ເຂົ້າປາອາຫານ ແລະ ຢາປິ່ນປົວພະຍາດມາກິນ, ມາຮອດປີ 2020 ໄດ້ສືບຕໍ່ຮັບສົ່ງຄົນລາວກັບຄືນມາປະເທດດ້ວຍຮູບການແບບເກົ່າ ຈໍານວນ 08 ຄັ້ງ, ມີຈໍານວນ 08 ຄົນ, ມາຮອດ ເວລາປະມານ 13 ໂມງ ຂອງວັນທີ 22 ກັນຍາ 2020 ຜົວຂອງຜູ້ກ່ຽວໄດ້ບອກໃຫ້ໄປສົ່ງຄົນລາວຢູ່ທ່າເຮືອ ໂດຍມີລົດສາມລໍ້ພາຜູ້ຍິງລາວຄົນໜຶ່ງອາຍຸປະມານ 20 ປີໄປສົ່ງຢູ່ທ່າເຮືອ,

ຈາກນັ້ນ, ຕົນກໍ່ຂັບເຮືອອອກໄປສົ່ງຜູ້ຍິງລາວຄົນນັ້ນຢູ່ເຂດທ່ານໍ້າ ບ້ານ ສິນໄຊ ແລ້ວເກັບເງິນຄ່າຈ້າງ ຈໍານວນ 500 ບາດ, ແລ້ວຂັບເຮືອກັບຄືນຝັ່ງໄທ, ພໍຂັບເຮືອໄປໄດ້ປະມານ 100 ແມັດກໍ່ມີເຈົ້າໜ້າທີ່ທະຫານຊາຍແດນ 255 ຂີ່ເຮືອອອກກວດກາພົບເຫັນຈຶ່ງໄດ້ເຂົ້າສອບຖາມຜູ້ກ່ຽວ ແລະ ຖືກກັກຕົວມາສືບສວນ-ສອບສວນຕາມລະບຽບກົດໝາຍຂອງ ສປປ ລາວ.

ຜ່ານການສັງເກດຕີລາຄາຂອງເຈົ້າໜ້າທີ່ເຫັນວ່າ: ນາງ ວັນສີ ມາປັງໂມ ມີເຈດຕະນາລັກເຂົ້າເມືອງຜິດກົດໝາຍ ແລະ ເຄື່ອນໄຫວສົ່ງຄົນຂ້າມແດນບໍ່ຖືກຕ້ອງ, ໂດຍລະເມີດກົດໝາຍວ່າດ້ວຍການເຂົ້າ-ອອກເມືອງ ແລະຄຸ້ມຄອງຄົນຕ່າງປະເທດຢູ່ ສປປລາວ ສະບັບເລກທີ 59/ສພຊ ລົງວັນທີ 26 ທັນວາ 2014 ມາດຕາ 53 ຂໍ້ 01, ຜູ້ກ່ຽວຍັງມີເຈດຕະນາສົ່ງແຮງງານລາວຂ້າມຊາຍແດນໂດຍບໍ່ຖືກຕ້ອງເປັນຈໍານວນຫຼາຍຄັ້ງ, ຈຶ່ງໄດ້ກັກຕົວມາສຶກສາອົບຮົມໃຫ້ຜູ້ກ່ຽວຮັບຮູ້, ເຂົ້າໃຈຕໍ່ລະບຽບຫຼັກການການເຂົ້າ-ອອກເມືອງຢ່າງຖືກຕ້ອງຕາມກົດໝາຍຂອງ ສປປ ລາວ ເປັນທີ່ຮຽບຮ້ອຍແລ້ວ