ລາວ ບໍ່ພົບຜູ້ຕິດເຊື້ອໂຄວິດ-19 ເພີ່ມ ຈາກການກວດວິເຄາະ 607 ຄົນ

0
110

ສະພາບການລະບາດຂອງພະຍາດໂຄວິດ – 19 ປະຈຳວັນທີ 13 ຕຸລາ 2020 ສປປ ລາວ ບໍ່ມີຜູ້ຕິດເຊື້ອໃໝ່ ແຕ່ຕົວເລກຜູ້ຕິດເຊື້ອໃນທົ່ວໂລກແມ່ນຍັງມີເພີ່ມຂຶ້ນເລື້ອຍໆ ເຊິ່ງໃນມື້ ດຽວມີຜູ້ຕິດເຊື້ອຫຼາຍກວ່າ 280.000 ຄົນ.ທ່ານ ດຣ. ນາງ ລັດສະໝີ ວົງຄຳຊາວ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກຖະແຫຼງຂ່າວ ປະຈຳວັນທີ 13 ຕຸລາ 2020 ວ່າ: ປັດຈຸບັນທົ່ວປະເທດມີສູນຈໍາກັດບໍລິເວນທັງໝົດ 35 ສູນ, ມີຜູ້ຖືກຈຳກັດບໍລິເວນຢູ່ສູນ 2.544 ຄົນ.

ໃນວັນທີ 12 ຕຸລາ 2020 ໄດ້ເກັບຕົວຢ່າງມາກວດວິເຄາະທັງໝົດ 607 ຄົນ, ໃນນັ້ນມີແຮງງານລາວມາແຕ່ໄທ 211 ຕົວຢ່າງ, ແຮງງານຈີນ 382 ຕົວຢ່າງ, ແຮງງານຫວຽດນາມ 10 ຕົວຢ່າງ, ບຸກຄົນທົ່ວໄປທີ່ບໍ່ມີອາການ 3 ຕົວຢ່າງ, ບຸກຄົນທົ່ວໄປທີ່ມີອາການ 1 ຕົວຢ່າງ ເຊິ່ງຜົນກວດວິເຄາະທັງໝົດແມ່ນບໍ່ພົບເຊື້ອ.ໝາຍຄວາມວ່າໃນວັນທີ 12 ຕຸລາ 2020 ບໍ່ມີຜູ້ຕິດເຊື້ອໃໝ່, ສຳລັບຜູ້ຕິດເຊື້ອນໍ້າເບີ 23 ແມ່ນຍັງພົບເຊື້ອຢູ່, ສັງລວມການກວດວິເຄາະແຕ່ເດືອນມັງກອນ ຮອດວັນທີ 12 ຕຸລາ 2020

ໄດ້ເກັບຕົວຢ່າງມາກວດທັງໝົດ 58.685 ຕົວຢ່າງ, ກວດພົບເຊື້ອສະສົມ 23 ຄົນ.ສະພາບການລະບາດຂອງພະຍາດໂຄວິດ – 19 ຂອງບັນດາປະເທດໃກ້ຄຽງ ແລະ ໃນໂລກ. ຮອດວັນທີ 13 ຕຸລາ 2020 ທົ່ວໂລກມີການລາຍງານການລະບາດ ທັງໝົດ 214 ( ປະເທດ/ເຂດ ) ເຊິ່ງມີການຢັ້ງຢືນຜູ້ຕິດເຊື້ອພະຍາດໂຄວິດ – 19 ແມ່ນ 38.012.424 ຄົນ ເສຍຊີວິດ 1.084.707 ຄົນ ເຊິ່ງກວມເອົາ 2,85% ຂອງຜູ້ຕິດເຊື້ອທັງໝົດ, ປິ່ນປົວດີ 28.557.839 ຄົນ ເຊິ່ງກວມເອົາ 75,1% ຂອງຜູ້ຕິດເຊື້ອທັງໝົດ.ທ່ານໄດ້ກ່າວຕື່ມວ່າ: ຈຳນວນຜູ້ຕິດເຊື້ອ ແລະ ຜູ້ເສຍຊີວິດຈາກທົ່ວໂລກຍັງມີທ່າອ່ຽງເພີ່ມຂຶ້ນຢ່າງຕໍ່ເນື່ອງ ຈຶ່ງຂໍຮຽກຮ້ອງຈາກທຸກພາກສ່ວນໃນສັງຄົມ ຈົ່ງພ້ອມໃຈ

ກັນປົກປ້ອງຕົນເອງ ແລະ ຄົນໃນຄອບຄົວຂອງທ່ານ ໂດຍການປະຕິບັດມາດຕະການປ້ອງກັນການຕິດເຊື້ອຢ່າງເຄັ່ງຄັດ ເປັນຕົ້ນການລ້າງມືເລື້ອຍໆ ໂດຍໃຊ້ສະບູ ແລະ ນ້ຳສະອາດ ຫຼື ເຈວລ້າງມືທີ່ປະສົມເຫຼົ້າ, ຮັກສາໄລຍະຫ່າງໃນສັງຄົມ, ໃສ່ຜ້າອັດປາກ – ດັງ ເມື່ອໄປສະຖານທີ່ທີ່ມີຜູ້ຄົນແອອັດ, ບໍ່ເອົາມືສຳຜັດຕາ, ດັງ ຫຼື ປາກ, ເມື່ອທ່ານໄອ – ຈາມ ຄວນໃຊ້ແຂນພັບຂໍ້ສອກອັດປາກ, ກິນຮ້ອນໃຊ້ບ່ວງກາງ ແລະ ໄປພົບແພດ ເມື່ອທ່ານຮູ້ສຶກບໍ່ສະບາຍ, ການປະຕິບັດທັງໝົດນີ້ກໍເພື່ອຫຼຸດຜ່ອນ ແລະ ສະກັດກັ້ນການລະບາດບໍ່ໃຫ້ຂະຫຍາຍເປັນວົງກວ້າງ.