ເອົາທຸງຊາດລາວ ແລະ ທຸງອາຊຽນຂຶ້ນສູ່ຍອດເສົາ ສະຫລອງ ສປປ ລາວ ເຂົ້າເປັນສະມາຊິກອາຊຽນ

0
75

ເອົາທຸງຊາດລາວ ແລະ ທຸງອາຊຽນຂຶ້ນສູ່ຍອດເສົາສະຫລອງ ສປປ ລາວ ເຂົ້າເປັນສະມາຊິກອາຊຽນ

ຂປລ. ໃນວັນທີ 8 ສິງຫາ 2022 ນີ້, ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ໄດ້ເປັນປະທານພິທີເອົາທຸງຊາດລາວ ແລະ ທຸງອາຊຽນຂຶ້ນສູ່ຍອດເສົາ ເພື່ອສະເຫລີມສະຫລອງ ວັນຄົບຮອບ 25 ປີ ສປປ ລາວ ເຂົ້າເປັນສະມາຊິກອາຊຽນ (23/7/1997) ແລະ ຄົບຮອບ 55 ປີ ແຫ່ງການສ້າງຕັ້ງອາຊຽນ (8/8/1967-8/8/2022), ທີ່

ກະຊວງການຕ່າງປະເທດໂດຍມີບັນດາລັດຖະມົນຕີ ທີ່ຮັບຜິດຊອບສາມເສົາຄໍ້າປະຊາຊົນອາຊຽນ, ບັນດາຮອງລັດຖະ ມົນຕີ, ບັນດາເອກອັກຄະລັດຖະທູດ ບັນດາປະເທດສະມາຊິກອາຊຽນ ປະຈໍາລາວ ແລະ ຜູ້ຕາງໜ້າຈາກກະຊວງທີ່ກ່ຽວຂ້ອງ ເຂົ້າຮ່ວມ.

ໂອກາດດັ່ງກ່າວ, ທ່ານຮອງນາຍົກລັດຖະມົນຕີ ສະເຫລີມໄຊ ກົມມະສິດ ໄດ້ຢໍ້າເຖິງຄວາມໝາຍອັນສໍາຄັນຂອງອາຊຽນ ກໍຄື ຜົນສໍາເລັດດ້ານຕ່າງໆທີ່ອາຊຽນຍາດມາໄດ້ຕະຫລອດໄລຍະ 55 ປີຜ່ານມາ ໂດຍສະເພາະການຮ່ວມມື ຕາມວິຖີທາງຂອງອາຊຽນ ທີ່ໄດ້ຮັບຜົນສໍາເລັດເປັນກ້າວໆມາ ຈົນກາຍເປັນປະຊາຄົມອາຊຽນໃນປັດຈຸບັນ ແລະ ເປີດກວ້າງການຮ່ວມມືກັບພາຍນອກ ໂດຍອາຊຽນເປັນແກນ

ກາງ ເຊິ່ງເປັນການປະກອບ ສ່ວນເຂົ້າໃນການປົກປັກຮັກສາ ສັນຕິພາບ ແລະ ສະຖຽນລະພາບໃນພາກພື້ນ ກໍຄື ໃນໂລກ.

ພ້ອມດຽວກັນນີ້, ທ່ານຮອງນາຍົກລັດຖະມົນຕີ ຍັງໄດ້ຍົກໃຫ້ເຫັນການປະກອບ ສ່ວນຂອງ ສປປ ລາວ ໃນວຽກງານອາຊຽນ ຕະຫລອດ 25 ປີ ຜ່ານມາ ແລະ ຢືນຢັນ ຄວາມໝາຍໝັ້ນຂອງ ສປປ ລາວ ທີ່ຈະສືບຕໍ່ຮ່ວມມືກັບປະເທດສະມາຊິກອາຊຽນ ແລະ ຄູ່ຮ່ວມມືພາຍນອກ ຂອງອາຊຽນ ເພື່ອເສີມສ້າງປະຊາຄົມອາຊຽນໃຫ້ເຂັ້ມແຂງໃນຕໍ່ໜ້າ, ລວມທັງກະກຽມການເປັນປະທານອາຊຽນ ຂອງ ສປປ ລາວ ໃນປີ 2024.