ປິດຊົ່ວຄາວປໍ້ານໍ້າມັນຢູ່ນະຄອນປາກເຊ 5 ປໍ້າ ຍ້ອນຂາຍເກີນລາຄາ

0
87

ວັນທີ​ 18 ກໍລະກົດ​ 2022 ຜ່ານມາ,​ ເຈົ້າໜ້າທີ່ກວດການການຄ້າ ຂະແໜງການຄ້າ​ພາຍໃນ​ ຮ່ວມກັບ​ ຂະແໜງຊັບສິນທາງປັນຍາ,​ ມາດຕະຖານ ແລະ​ ວັດແທກ​ ພະແນກອຸດສາຫະກໍາ​ ແລະ​ ການຄ້າ​ແຂວງຈໍາປາສັກ​ ໄດ້ເຄື່ອນໄຫວຕິດຕາມ, ກວດກາປໍ້ານໍ້າມັນຢູ່ນະຄອນປາກເຊ​ 26​ ປໍ້າ ຜ່ານການກວດກາຕົວຈິງ ເຫັນວ່າປໍ້ານໍ້າມັນທີ່ເປີດໃຫ້ບໍລິການ ມີ 21 ປ້ໍາ ແລະ ຢຸດບໍລິການຊົ່ວຄາວ 6 ປໍ້າ. ພ້ອມດຽວກັນ, ໄດ້ກວດກາພົບເຫັນປໍ້ານໍ້າມັນທີ່ຂາຍຕາມລາຄາລັດກໍານົດ ມີ​ 16 ປ້ໍາ ແລະ ຂາຍເກີນລາຄາທີ່ລັດກໍານົດມີ 5 ປ້ໍາ.​

ສໍາລັບປໍ້ານໍ້າມັນ 5 ປ້ໍາ​ ທີ່ຂາຍນໍ້າມັນເຊື້ອໄຟເກີນລາຄາທີ່ລັດກໍານົດ​ ນັ້ນ,​ ເຈົ້າໜ້າທີ່ກວດກາການຄ້າ ໄດ້ສ້າງບົດບັນທຶກ ແລະ​ ສຶກສາອົບຮົມເຈົ້າຂອງປ້ໍາ​ ໃຫ້ຮັບຮູ້ເຂົ້າໃຈຢ່າງເລິກເຊິ່ງຕໍ່ລະບຽບການທີ່ກໍານົດໄວ້.​ ພ້ອມນີ້ ເຈົ້າໜ້າທີ່ ກໍໄດ້ໜີບກົ່ວໃສ່ຫົວຈ່າຍ ບໍ່ໃຫ້ຈໍາໜ່າຍ ຈົນກ່ວາຈະມີທິດຊີ້ນໍາຈາກຂັ້ນເທິງ​ ແລະ​ ຈະຕ້ອງໄດ້ຈ່າຍຄ່າປັບໃໝ 5 ລ້ານກີບ/ປໍ້າ,​ ຕາມທີ່ໄດ້ລະບຸໄວ້ ໃນມາດຕາ 82 ຂອງດໍາລັດນາຍົກລັດຖະມົນຕີ ເລກທີ 331/ນຍ, ວ່າດ້ວຍ​ທຸລະກິດນໍ້າມັນເຊື້ອໄຟ.​

ການເຄື່ອນໄຫວຕິດຕາມ, ກວດກາປໍ້ານໍ້າມັນຢູ່ນະຄອນປາກເຊ ແລະ​ ເມືອງບາຈຽງຈະເລີນສຸກ​ ຄັ້ງນີ້ ແມ່ນອີງຕາມດໍາລັດຂອງນາຍົກລັດຖະມົນຕີ ເລກທີ 331/ນຍ, ລົງວັນທີ 27​ ຕຸລາ​ 2017​ ວ່າດ້ວຍ​ທຸລະກິດນໍ້າມັນເຊື້ອໄຟ; ອີງຕາມຂໍ້ຕົກລົງຂອງພະແນກອຸດສາຫະກໍາ ແລະ​ ການຄ້າແຂວງ ເລກທີ 2537/ພອກ.ຈສ, ລົງວັນທີ 20 ພຶດສະພາ 2022 ວ່າດ້ວຍ ການແຕ່ງຕັ້ງຄະນະຮັບຜິດຊອບກວດກາການນໍາເຂົ້ານໍ້າມັນເຊື້ອໄຟ, ກວດສາງເກັບນໍ້າມັນເຊື້ອໄຟ ແລະ ປໍ້າຫົວຈ່າຍນໍ້າມັນເຊື້ອໄຟ ໃນທົ່ວແຂວງຈໍາປາສັກ.​

ນອກນີ້​ ເຈົ້າໜ້າທີ່ກວດການການຄ້າ ຂະແໜງການຄ້າ​ພາຍໃນ,​ ຂະແໜງຊັບສິນທາງປັນຍາ,​ ມາດຕະຖານ ແລະ​ ວັດແທກ​ ພະແນກອຸດສາຫະກໍາ​ ແລະ​ ການຄ້າ​ແຂວງ​ ຍັງຈະປະສານສົມທົບກັບຫ້ອງການອຸດສາຫະກໍາ​ ແລະ​ ການຄ້າ​ບັນດາເມືອງ​ ເພື່ອ​ສືບຕໍ່ເຄື່ອນໄຫວຕິດຕາມ, ກວດກາປໍ້ານໍ້າມັນຢູ່​ 8​ ເມືອງ​ ຕື່ມອີກ.