ເປັນຄວາມພາກພູມໃຈຂອງຄົນລາວ ທີ່ທີມຊາດລາວ U19 ສ້າງປະຫວັດສາດໜ້າໃໝ່ໃຫ້ແກ່ຊາດລາວ

0
60

ພູມໃຈໃນທີມຊາດ U19 ສ້າງປະຫວັດສາດໜ້າໃໝ່ໃຫ້ແກ່ຊາດລາວ ໂດຍ: ລູກເມືອງພວນ

ກິລາບານເຕະ ເປັນກິລາປະເພດໜຶ່ງທີ່ໄດ້ຮັບຄວາມນິຍົມຊົມຊອບຂອງຄົນຈຳນວນຫຼາຍໃນທົ່ວໂລກ, ອັນເນື່ອງຈາກວ່າກິລາປະເພດນີ້ເປັນກິລາທີ່ມີສິລະປະ ຍຸດທະວິທີການຫລິ້ນທີ່ຫລາກຫລາຍ ດູດດຶງຄວາມສົນໃຈຂອງຄົນທັງໂລກ. ກ່ອນອື່ນໝົດ ກິລານີ້ເປັນກິລາປະເພດຫລິ້ນເປັນທີມ, ມີການວາງແຜນການຕໍ່ສູ້, ມີການວາງຕົວນັກກິລາໃນແຕ່ລະຕຳແໜ່ງຢ່າງເໝາະສົມ, ມີການບຸກ ການຖອຍ ປ້ອງກັນຕົວ ຕາມແຕ່ລະສະຖານະການ, ມີແບບແຜນໃນການວາງເກມຫລິ້ນ…ທັງໝົດນີ້ຢາກເຮັດໄດ້ກໍຍ້ອນມີຄູຝຶກ.

ຄູຝຶກມີຄວາມສຳຄັນຫລາຍ, ຖ້າຄູຝຶກມີການວາງແຜນຫຼີ້ນທີ່ດີ, ຮູ້ວາງຕົວນັກກິລາໃນແຕ່ລະຕຳແໜ່ງທີ່ເໝາະສົມ ສົມທົບກັບເຕັກນິກ, ລີລາການຫລິ້ນຂອງຕົວບຸກຄົນນັກກິລາ, ການຫລິ້ນເປັນທີມທີ່ດີ ກໍຖືວ່າມີຄວາມໝັ້ນໃຈ ຫວັງເອົາໄຊຊະນະໄດ້ເຄິ່ງໜຶ່ງແລ້ວ. ຍ້ອນເຫດຜົນດັ່ງກ່າວ, ແຕ່ລະຊາດຈຶ່ງຊອກຫາຄູຝຶກທີ່ເກັ່ງ, ມີປະສົບການ, ມີຜົນງານມາຝຶກໃຫ້ທີມຝີມຊາດຂອງຕົນ.

ສຳລັບວົງການກິລາບານເຕະລາວ, ຕະລອດໄລຍະ 1 ທົດສະຫວັດທີ່ຜ່ານມາ, ເຖິງແມ່ນທາງສະຫະພັນກິລາບານເຕະແຫ່ງຊາດລາວໄດ້ມີຄວາມພະຍາຍາມເຮັດທຸກສິ່ງຢ່າງເພື່ອຍົກລະດັບກິລາບານເຕະລາວໃຫ້ທຽບທັນກັບບັນດານາໆຊາດໃນອາຊຽນກໍຕາມ ແຕ່ກໍຍັງບໍ່ທັນໄດ້ດີເທົ່າທີ່ຄວນ ອັນເນື່ອງມາຈາກຫລາຍສາເຫດດ້ວຍກັນ ແຕ່ສາເຫດທີ່ສຳຄັນ ກໍຄືຂາດງົບປະມານ. ບໍ່ວ່າແຕ່ໄປແຂ່ງຂັນໃນລະດັບໃດ,

ເວທີໃດ ກໍບໍ່ສາມາດຈະນຳເອົາໄຊຊະນະມາໃຫ້ແກ່ປະເທດຊາດ, ຈົນເຮັດໃຫ້ແຟນບານທັງປະເທດຕໍ່ານ້ອຍຄ້ອຍໃຈ, ເກີດຄວາມອຶດອັດກັບວົງການກິລາບານເຕະຂອງຊາດລາວບໍ່ໜ້ອຍ ແລະ ໝົດຄວາມຫວັງໄປໃນທີ່ສຸດ. ໂດຍສະເພາະແມ່ນຄູ່ປັບກັບທີມຊາດໄທພົບກັນຄັ້ງໃດ ທັງຮຸ່ນນ້ອຍ ຮຸ່ນໃຫ່ຍ ບໍ່ວ່າແຕ່ໃນເວທີໃດກໍບໍ່ມີທາງທີ່ຈະເອົາຊະນະທີມຊາດໄທໄດ້ໃນຕະຫລອດ 1 ທົດສະຫວັດທີ່ຜ່ານມາ, ເຮັດໃຫ້ແຟນບານທົ່ວປະເທດຮູ້ສຶກໝົດຫວັງ ແລະເສຍໃຈເປັນຢ່າງຍິ່ງ.

ເຖິງຢ່າງໃດກໍຕາມ, ການແຂ່ງຂັນບານເຕະຊີງແຊ້ມອາຊຽນລຸ່ນອາຍຸບໍ່ເກີນ 19 ປີ ຫຼື U19 2022, ທີມຊາດລາວໄດ້ກອບກູ້ເອົາໜ້າເອົາຕາ, ເອົາຊື່ສຽງຮຽງນາມຂອງຊາດລາວກັບຄືນມາໃຫ້ປະຊາຊົນລາວທັງຊາດໄດ້ຢ່າງສະຫງ່າງາມ, ໂດຍສະເພາະແມ່ນການເອົາຊະນະທີມຊາດໄທ 2-0 ດ້ວຍຄວາມດີໃຈ ໄຊໂຍໂຮຮ້ອງຂອງແຟນບານທັງປະເທດ, ນຳເອົາຮອຍຍິ້ມ ສຽງຫົວອັນ ຫວານຊື່ນ ດ້ວຍຄວາມດີອົກດີໃຈຈະຫາສິ່ງໃດມາປຽບບໍ່ໄດ້. ທີມຊາດລາວຊຸດນີ້ໄດ້ສ້າງປະຫວັດສາດໜ້າໃໝ່ໃຫ້ແກ່ຊາດລາວຄື:

1.ເປັນຄັ້ງທຳອິດທີ່ເອົາຊະນະໄທໃນຕະຫລອດໄລຍະ 1 ທົດສະຫວັດທີ່ຜ່ານມາ. 2. ເປັນຄັ້ງທີອິດທີ່ໄດ້ເຂົ້າຮອບຊີງຊະນະເລີດ 3. ເປັນຄັ້ງທຳອິດທີ່ເອົາຊະນະລວດຄູ່ແຂ່ງທັງ 5 ນັດ

ພວກເຮົາປະຊາຊົນລາວມີຄວາມໝາຍພູມໃຈເປັນຢ່າງຍິ່ງ ແລະ ຊົມເຊີຍຢ່າງສຸດໃຈ. ຂໍໃຫ້ທີມຊາດຊຸດນີ້ຈົ່ງເສີມຂະຫຍາຍມູນເຊື້ອອັນແຂງແກ່ນນີ້ໄວ້ໃຫ້ໝັ້ນຄົງ, ຈົ່ງຍືນຍົງຢູ່ໃນຄວາມຊົງຈຳຂອງແຟນບານທົ່ວປະເທດຕະຫຼອດໄປ ໃຫ້ສົມກັບຄວາມໝາຍພູມໃຈຂອງຄົນລາວທັງຊາດ. ຊົມເຊີຍ ຊົມເຊີຍ, ລາວສູ້ສູ້, ລາວສູ້ສູ້.