ຜູ້ນຳສີລັງກາຈະໜີອອກນອກປະເທດ ກຽມຂຶ້ນເຮືອບິນໄປດູໄບແຕ່ບໍ່ສຳເລັດ ເພາະເຈົ້າໜ້າທີ່ສະໜາມບິນຂັດຂວາງ

0
76

ຜູ້ນຳສີລັງກາຈະໜີອອກນອກປະເທດ ກຽມຂຶ້ນເຮືອບິນໄປດູໄບແຕ່ບໍ່ສຳເລັດ ເພາະເຈົ້າໜ້າທີ່ສະໜາມບິນຂັດຂວາງ

ເຈົ້າໜ້າທີ່ສະໜາມບິນສີລັງກາຂັດຂວາງປະທານາທິບໍດີ ຣາຊປັກສາ ບໍ່ໃຫ້ໜີອອກນອກປະເທດໄປດູໄບ ຫລັງຖືກປະທ້ວງໜັກຈົນຕ້ອງປະກາດຜ່ານຄົນໃກ້ຊິດຈະລາອອກຈາກຕຳແໜ່ງໃນວັນທີ 13 ກໍລະກົດນີ້.

ລາຍງານຈາກເວັບໄຊ The Guardian ອ້າງເຈົ້າໜ້າທີ່ສະໜາມບິນສີລັງກາທີ່ອອກມາເປີດເຜີຍວ່າ: ທ່ານ ໂຄຖາກຍະ ຣາຊປັກສາ ປະທານາທິບໍດີສີລັງກາ ພະຍາຍາມຂຶ້ນເຮືອບິນເດີນທາງໄປນະຄອນດູໄບ ສະຫະລັດອາຣັບເອມິເຣດ ເພື່ອໜີອອກນອກປະເທດໃນຄືນວັນທີ 11 ກໍລະກົດ, ແຕ່ເຈົ້າໜ້າທີ່ສະໜາມບິນເປັນຝ່າຍຂັດຂວາງ ຈົນທ່ານບໍ່ສາມາດອອກຈາກສີລັງກາໄດ້.

ເຈົ້າໜ້າທີ່ທີ່ນຳເອົາເລື່ອງນີ້ມາເປີດເຜີຍລະບຸວ່າ: ປະທານາທິບໍດີ ຣາຊປັກສາ ຖືກເຈົ້າໜ້າທີ່ກວດຄົນເຂົ້າເມືອງສະກັດບໍ່ໃຫ້ເຂົ້າສູ່ຂະບວນການກວດຄົນເຂົ້າເມືອງດ້ວຍຊ່ອງທາງພິເສດ.
ລາຍງານຍັງລະບຸອີກວ່າ: ການຂັດຂວາງຂອງເຈົ້າໜ້າທີ່ເຮັດໃຫ້ປະທານາທິບໍດີ ຣາຊປັກສາ ຕົກເຮືອບິນທີ່ຈະເດີນທາງໄປດູໄບເຖິງ 4 ຖ້ຽວບິນ ກ່ອນຈະຕັດສິນໃຈຍອມແພ້ ໂດຍມີລາຍງານວ່າທ່ານ ແລະ ພັນລະຍາໄດ້ເດີນທາງກັບໄປຖານທັບທີ່ຢູ່ໃກ້ຄຽງ.

ລາຍງານດັ່ງກ່າວ ສອດຄ່ອງກັບກ່ອນໜ້ານີ້ທີ່ມີຂ່າວວ່າ: ປະທານາທິບໍດີ ຣາຊປັກສາ ໄດ້ຮັບການຄຸ້ມຄອງຄວາມປອດໄພຈາກກອງທັບສີລັງກາ ໂດຍລາຍງານບາງສະບັບບອກວ່າ: ຜູ້ນຳສີລັງກາຕ້ອງໄປຫລົບຢູ່ເຮືອຮົບນອກຊາຍຝັ່ງສີລັງກາ ເພື່ອລີ້ຊ້ອນຈາກການຕໍ່ຕ້ານຂອງປະຊາຊົນ ເຊິ່ງຮອດຕອນນີ້ຍັງບໍ່ມີການຢືນຢັນແນ່ນອນວ່າປະທານາທິບໍດີ ຣາຊປັກສາ ຢູ່ບ່ອນໃດແທ້.