ການເງິນສາລະວັນ ເຊື່ອມຊຶມ ຈັນຍາບັນພະນັກງານ ແລະ ການປະຕິບັດວິໄນ

0
52

ຂປລ. ແຫລ່ງຂ່າວ ຈາກແຂວງສາລະວັນ ລາຍງານໃຫ້ຮູ້ວ່າ: ໃນວັນທີ 7 ກໍລະກົດ 2022 ນີ້, ພະແນກການເງິນ ແຂວງສາລະວັນ ໄດ້ຈັດຕັ້ງບັ້ນເຊື່ອມຊຶມເນື້ອໃນ 4 ເອກະສານທີ່ສຳຄັນ ຄື: ຈັນຍາບັນພະນັກງານ-ລັດຖະກອນ, ການປະຕິບັດວິໄນພະນັກງານ ໃນຂະແໜງການເງິນທົ່ວປະເທດ, ບົດບັນທຶກວ່າດ້ວຍການຮ່ວມມືກຳນົດ ກົນໄກການປະສານງານດຳເນີນຄະດີຂອງ ອົງການໄອຍະການປະຊາຊົນສູງສຸດ ກັບ ກະຊວງການເງິນ, ໃຫ້ກຽດເຜີຍແຜ່ ໂດຍທ່ານ ຂັນທະລັກ ໂພໄຊ ເລຂາຄະນະພັກຮາກຖານ ຫົວໜ້າພະແນກການເງິນແຂວງສາລະວັນ.

ການຈັດຕັ້ງເຜີຍແຜ່, ເຊື່ອມຊຶມ ໃນຄັ້ງນີ້, ແນໃສ່ ເຮັດໃຫ້ພະນັກງານລັດຖະກອນ ພາຍໃນພະແນກການເງິນ ແຂວງສາລະວັນ ກຳແໜ້ນບັນດາເນື້ອໃນເອກະສານ ດັ່ງກ່າວໃຫ້ເລິກເຊິ່ງ ເພື່ອນໍາໄປຈັດຕັ້ງປະຕິບັດ ເຂົ້າໃນໜ້າທີ່ການເມືອງຂອງຕົນ ທີ່ໄດ້ຮັບການມອບໝາຍ ໃຫ້ປະສົບຜົນສຳເລັດ ແລະ ຖືກຕ້ອງຕາມແນວທາງ ທີ່ພັກ-ລັດວາງອອກ, ແນໃສ່ສະກັດກັ້ນທຸກການກະທຳ ທີ່ເປັນການ

ລະເມີດລະ ບຽບ, ກົດໝາຍ ກ່ຽວກັບການເງິນ ຮັບປະກັນການຮັກສາຊັບສິນ, ທຶນຮອນຂອງລັດ ແລະ ການຄຸ້ມຄອງການປະພຶດຂອງເຈົ້າໜ້າທີ່ ເຊິ່ງມີການກໍານົດຫລັກການລົງວິໄນຕາມຂັ້ນຕອນ, ລະບຽບການ, ກົດໝາຍ ຢ່າງຮັດກຸມ; ຖ້າຫາກມີການກະທຳຜິດທີ່ຮ້າຍແຮງ ອາດໄດ້ລົງໂທດທາງອາຍາ ແລະ ທາງແພ່ງໄດ້.

ສຳລັບ ບົດບັນທຶກວ່າດ້ວຍການຮ່ວມມືກຳນົດ ກົນໄກການປະສານງານດຳເນີນຄະດີຂອງ ອົງການໄອຍະການປະຊາຊົນສູງສຸດ ກັບ ກະຊວງການເງິນ, ທ່ານ ຂັນທະລັກ ໂພໄຊ ໄດ້ຍົກໃຫ້ເຫັນ ຫລັກການ, ຄວາມຮັບຜິດຊອບ, ການປະສານງານ ກ່ຽວກັບການດຳເນີນຄະດີອາຍາ ຕາມຂະບວນການຍຸຕິທຳ ກ່ຽວກັບການລະເມີດກົດໝາຍພາສີ, ກົດໝາຍວ່າດ້ວຍສ່ວຍສາອາກອນ ແລະ ການກະທຳຜິດອື່ນໆ ທີ່ກ່ຽວຂ້ອງ.
ຂ່າວ: ວິໄລວອນ ສິດທິໄຊ