ລາວ​ຈະ​ສົ່ງ​ຂາຍ​ພະ​ລັງ​ງານ​ໄຟ​ຟ້າ​ໄປ ສ​ສ ຫວຽດ​ນາມ ແລະ ກຳ​ປູ​ເຈຍ ໃຫ້​ໄດ້ຫຼາຍກວ່າ 14.000 MW ພາຍ​ໃນ​ປີ 2030 ນີ້

0
99

ລາວ​ຈະ​ສົ່ງ​ຂາຍ​ພະ​ລັງ​ງານ​ໄຟ​ຟ້າ​ໄປ ສ​ສ ຫວຽດ​ນາມ ແລະ ກຳ​ປູ​ເຈຍ ໃຫ້​ໄດ້ຫຼາຍກວ່າ 14.000 MW ພາຍ​ໃນ​ປີ 2030 ນີ້

ໃນປີ 2030 ສປປ ລາວ ຈະສົ່ງຂາຍພະລັງງານໄຟຟ້າໄປ ປະເທດກຳປູເຈຍ ໃຫ້ໄດ້ຫຼາຍກວ່າ 6.000 MW ແລະ ສ​ສ ຫວຽດ​ນາມ ໃຫ້​ໄດ້ຫຼາຍກວ່າ 8.000 MW.
ອີງໃສ່ກອບການຮ່ວມມືດ້ານພະລັງງານໄຟຟ້າ ລະຫວ່າງ ສປປ ລາວ ກັບຣາຊະອານາຈັກ ກຳປູເຈຍ ກຳນົດໄວ້ວ່າ: ພາຍໃນປີ 2030 ສປປ ລາວ ຈະສົ່ງຂາຍພະລັງງານໄຟຟ້າໄປ ປະເທດກຳປູເຈຍ ໃຫ້

ໄດ້ຫຼາຍກວ່າ 6.000 MW ຊຶ່ງ ປັດຈຸບັນ ສາມາດສົ່ງໄປແລ້ວ ຈຳນວນ 445 MW. ສຳລັບສັນຍາການຮ່ວມມືດ້ານພະລັງງານ ລະຫວ່າງ ສອງປະເທດ ປະກອບມີສັນຍາຊື້-ຂາຍໄຟ ຟ້າ ຄື:  PPA ລະຫ່ວາງ EDL ແລະ EDC, (ເຂື່ອນໄຟຟ້າດອນສະໂຮງ 3 Unit) ຈໍານວນ 195 MW,

PPA ລະຫ່ວາງ EDL ແລະ EDC ຈໍານວນ 500 MW,PPA ລະຫວ່າງ ຜູ້ພັດທະນາໂຄງການໄຟຟ້າຄວາມຮ້ອນຖ່ານຫີນລະມາມ ແລະ EDC ຈຳນວນ 600 MW ແລະ  PPA ລະ ຫວ່າງ ຜູ້ພັດທະນາໂຄງການໄຟຟ້າຄວາມຮ້ອນຖ່ານຫີນກະລຶມ ແລະ EDC ຈຳນວນ 1.800 MW.

ສຳລັບ ກອບການຮ່ວມມືລະຫວ່າງ ສປປ ລາວ ແລະ ສສ ຫວຽດນາມ, ມາຮອດປັດຈຸບັນ ໂຄງການທີ່ໄດ້ເຊັນສັນຍາຊື້-ຂາຍໄຟຟ້າ (PPA) ກັບ ລັດວິສາຫະກິດໄຟຟ້າຫວຽດນາມ (EVN) ທັງໝົດມີ 25 ໂຄງການ, ລວມກຳລັງຕິດຕັ້ງ 2.180 MW ໃນນັ້ນ, ໄດ້ສົ່ງໄຟຟ້າອອກຂາຍແລ້ວມີ 3 ໂຄງ ການຄື: ໂຄງການເຊຂະໝານ 1, ເຊຂະໝານຊານໄຊ ແລະ ເຊຂະໝານ 3 ລວມກໍາລັງຕິດຕັ້ງ

572 MW. ສ່ວນໂຄງການທີ່ກຳລັງກໍ່ສ້າງ ແລະ ຄາດວ່າຈະສາມາດສົ່ງໄຟຟ້າໄດ້ໃນປີ 2022-2025 ແມ່ນມີທັງໝົດ 22 ໂຄງການ, ລວມກໍາລັງຕິດຕັ້ງ 1.608 MW. ນອກນີ້, ຍັງມີບັນດາໂຄງການທີ່ມີນິຕິກໍາພາຍໃຕ້ ການເຊັນບົດບັນທຶກຄວາມເຂົ້າໃຈດ້ານລາຄາໄຟຟ້າ (Tariff MOU); ມີຂໍ້ຕົກລົງເຫັນດີດ້ານຫຼັກການຮັບໄຟຟ້າ ແລະ ບັນດາໂຄງການທີ່ກຸ່ມບໍລິສັດ ພົງຊັບທະວີກໍ່ສ້າງຂົວທາງ-

ເຄຫາສະຖານ ຈຳກັດ ແລະ EVN ໄດ້ເຊັນ MOU ສຶກສາຄວາມເປັນໄປໄດ້ໂຄງການທີ່ຈະຂາຍໃຫ້ ສສ ຫວຽດນາມມີ ຄື:ໂຄງການທີ່ໄດ້ເຊັນບົດບັນທຶກຄວາມເຂົ້າໃຈດ້ານລາຄາໄຟຟ້າ (Tariff MOU) ມີ 8 ໂຄງການ ລວມກຳລັງຕິດຕັ້ງ 1.814 MW; ໂຄງການທີ່ມີຂໍ້ຕົກລົງເຫັນດີດ້ານຫຼັກການຮັບໄຟຟ້າຈາກ ລັດຖະບານ ສສ ຫວຽດນາມມີ 6 ໂຄງການ ລວມກຳລັງຕິດຕັ້ງ 2.485 MW; ໂຄງການທີ່

ກຸ່ມບໍລິ ສັດ ພົງຊັບທະວີກໍ່ສ້າງຂົວທາງ-ເຄຫາສະຖານ ແລະ EVN ໄດ້ເຊັນສັນຍາບົດບັນທຶກຄວາມເຂົ້າໃຈ ກັບ EVN ມີ 8 ໂຄງການ ລວມກຳລັງຕິດຕັ້ງ 1.669,5 MW.

ທ່ານ ດາວວົງ ພອນແກ້ວ ລັດຖະມົນຕີກະຊວງພະລັງງານ ແລະ ບໍ່ແຮ່ ກ່າວຕື່ມວ່າ: ຖ້າພວກເຮົາສາມາດຈັດຕັ້ງປະຕິບັດບັນດາໂຄງການທີ່ຢູ່ໃນເປົ້າໝາຍດັ່ງກ່າວສໍາເລັດທັງໝົດ ແມ່ນຈະສາມາດບັນລຸຕົວເລກສົ່ງອອກພະລັງງານໄຟຟ້າໄປຍັງ ສສ ຫວຽດນາມໄດ້ປະມານ 8.148,5 MW ເຊິ່ງກໍໝາຍຄວາມວ່າຖ້າຈັດຕັ້ງປະຕິບັດສຳເລັດພາຍໃນປີ 2030 ແມ່ນ ຈະປະຕິບັດໄດ້ເກີນຄາດໝາຍທີ່ວາງໄວ້.

ນອກ​ຈາກ​ນີ້ຍັງໄດ້ສົ່ງໄຟຟ້າ ຈຳນວນ 5 MW ໄປ ປະເທດມຽນມາ ແລະ ຈະສົ່ງໄປອີກຕື່ມປະມານ 30-35 MW ພາຍໃນປີ 2022 ນີ້ ລວມທັງການສົ່ງໄຟຟ້າ ໄປ ສປ ຈີນ ໃນຮູບແບບການແລກປ່ຽນພະລັງງານໃນລະບົບແຮງດັນ 115 kV ແລະ ມີແຜນຈະເຊື່ອມໂຍງ ດ້ວຍລະບົບ 500 Kv, ພ້ອມນັ້ນ ຈະສົ່ງໄຟຟ້າໄປ ສິງກະໂປແບບທົດລອງບໍ່ເກີນ 100 MW ໃນທ້າຍເດືອນນີ້.