ຈາກທີ່ມີຄລິບ ຖືກເຜີຍແຜ່ໃນສື່ສັງຄົມອອນລາຍຄວາມຈີງເລື່ອງແຮງງານລາວໄປເກົາຫຼີ ຖືກນາຍຈ້າງຕີ

    0
    147

    ອາທິດຜ່ານມາ ໄດ້ມີຄລິບຖືກເຜີຍແຜ່ໃນສື່ສັງຄົມອອນລາຍກ່ຽວກັບແຮງງານລາວໄປເຮັດວຽກຢູ່ເກົາຫຼີແລ້ວຖືກນາຍຈ້າງທາລຸນ ເຊິ່ງໃນຄລິບນັ້ນແມ່ນຢູ່ລະຫວ່າງມາປຶກສາກັບໝູ່ຄົນຮູ້ຈັກ ເພື່ອຫາທາງອອກຈາກໂຮງງານແຫ່ງດັ່ງກ່າວ ເນື່ອງຈາກເຈັບມືແຮງບໍ່ສາມາດເຮັດວຽກຕໍ່ໄປອີກ.

    ຫຼັງຈາກຄລິບຖືກແຊອອກໄປແມ່ນໄດ້ຮັບຄວາມສົນໃຈຈາກສັງຄົມພໍສົມຄວນ ໂດຍສະເພາະຜູ້ທີ່ກຳລັງມີຄວາມສົນໃຈຢາກໄປເຮັດວຽກຢູ່ເກົາຫຼີ ລວມເຖິງປະຊາຊົນທົ່ວໄປ.

    ຫຼ້າສຸດນີ້ ກົມການຈັດຫາງານ, ກະຊວງແຮງງານ ແລະ ສະຫວັດດີການສັງຄົມ ໄດ້ອອກມາຊີ້ແຈງ ກ່ຽວກັບ ບັນຫາແຮງງານລາວທີ່ໄປເຮັດວຽກຢູ່ ສ.ເກົາຫຼີ ຖືກນາຍຈ້າງທຸບຕີ ແລະ ບໍ່ໄດ້ຮັບເງິນເດືອນຈາກຂ່າວທີ່ສັງຄົມອອນລາຍໂພສ ໃນວັນທີ 7 ມິຖຸນາ 2022 ແລະ ຖືກແຊໄປເປັນຈຳນວນຫຼາຍ ກ່ຽວກັບແຮງງານ ທີ່ໄປເຮັດວຽກຢູ່ ສ.ເກົາຫຼີ ຖືກນາຍຈ້າງທຸບຕີ ຈົນເກີດບາດເຈັບ ແລະ ບໍ່ໄດ້ຮັບເງິນເດືອນ.

    ຕໍ່ກັບປະເດັນນີ້, ກົມການຈັດຫາງານ ກໍໄດ້ມີການປະສານງານຫາໜ່ວຍງານທີ່ກ່ຽວຂ້ອງ ເພື່ອຊອກຫາຂໍ້ມູນຂອງແຮງງານທີ່ເປັນຂ່າວນັ້ນ. ຜ່ານການສອບຖາມ ຈຶ່ງຮູ້ວ່າ ແຮງງານທີ່ສົ່ງໄປນັ້ນເປັນແຮງງານລາວຊົນເຜົ່າມົ້ງ ໂດຍການຈັດສົ່ງໄປເຮັດວຽກຢູ່ ປະເທດ ສ.ເກົາຫຼີ ຕາມລະບົບ EPS (ໄລຍະຍາວ 3-5 ປີ) ໄດ້ຮັບບາດເຈັບທີ່ມືແທ້ ຍ້ອນແຮງງານນໍາໃຊ້ອຸປະກອນປ້ອງກັນບໍ່ຄົບຖ້ວນຕາມມາດຕະຖານຄວາມປອດໄພທີ່ໄດ້ກໍານົດ.

    ຈາກນັ້ນຜູ້ກ່ຽວກໍໄດ້ປະສານກັບໜ່ວຍງານທີ່ກ່ຽວຂ້ອງ ເຊັ່ນ: ສູນບໍລິການຈັດຫາງານຂອງ ສ.ເກົາຫຼີ, ສະຖານທູດລາວ ປະຈໍາຢູ່ ສ.ເກົາຫຼີ ແລະ ກະຊວງແຮງງານ ແລະ ສະຫວັດດີການສັງຄົມ ເພື່ອເຂົ້າໄປໄກ່ເກ່ຍ ຊຶ່ງປະຈຸບັນ ຜູ້ກ່ຽວຍັງຢູ່ໃນໄລຍະລໍຖ້າໃຫ້ສູນບໍລິການຈັດຫາງານຂອງ ສ.ເກົາຫຼີ ຊອກຫາວຽກໃໝ່ທີ່ເໝາະສົມໃຫ້ຜູ້ກ່ຽວ. ເພື່ອເປັນການປ້ອງກັນບັນຫາທີ່ອາດຈະເກິດຂຶ້ນ ກັບແຮງງານໃນກໍລະນີຕ່າງໆ, ກະຊວງແຮງງານ ແລະ ສະຫວັດດີການສັງຄົມ ຈະໄດ້ປຶກສາຫາລືກັບຕົວແທນຫ້ອງການພັດທະນາຊັບພະຍາກອນມະນຸດ ສ.ເກົາຫຼີ ທີ່ປະຈໍາຢູ່ ສປປ ລາວ.


    ກະຊວງແຮງງານ ແລະ ສະຫວັດດີການສັງຄົມ ໃຫ້ຮູ້ຕື່ມວ່າ: ໃນໄລຍະຜ່ານມາ ກະຊວງແຮງງານ ແລະ ສະຫວັດດີການສັງຄົມ ໄດ້ເອົາໃຈໃສ່ໃນການຕິດຕາມ ແລະ ຊ່ວຍເຫຼືອແຮງງານ ໂດຍມີການປະສານງານຢ່າງເປັນປົກກະຕິກັບ ຕົວແທນຫ້ອງການພັດທະນາຊັບພະຍາກອນມະນຸດ ສ.ເກົາຫຼີ ທີ່ປະຈໍາຢູ່ ສປປ ລາວ. ພ້ອມກັນນັ້ນ ໄດ້ຕັ້ງກຸ່ມວອດແອັບ ທີ່ມີຜູ້ອອກແຮງງານ ແລະ ຄະນະຮັບຜິດຊອບຂອງກະຊວງແຮງງານ ແລະ ສະຫວັດດີການສັງຄົມ ເພື່ອໃຫ້ສາມາດຕິດຕາມ ແລະ ໃຫ້ການຊ່ວຍເຫຼືອແຮງງານໄດ້ຢ່າງທັນການ.

    ສໍາລັບການຈັດສົ່ງແຮງງານໄປເຮັດວຽກຢູ່ຕ່າງປະເທດ ເປັນໜຶ່ງໃນນະໂຍບາຍຂອງລັດຖະບານ ເພື່ອກະຕຸກຊຸກຍູ້ເສດຖະກິດດ້ວຍການນຳເອົາເງິນຕາເຂົ້າປະເທດ, ພ້ອມທັງເປັນການສົ່ງເສີມການມີວຽກເຮັດງານທຳ ມີອາຊີບຄົງທີ່ ແລະ ມີຊີວິດການເປັນຢູ່ທີ່ດີຂຶ້ນ, ສິ່ງສຳຄັນ ເປັນການຍົກສູງຄວາມຮູ້ຄວາມສາມາດ ແລະ ທັກສະໃນດ້ານຕ່າງໆ ຄຽງຄູ່ກັບການສ້າງນິດໄສແບບອຸດສາຫະກໍາ, ສ້າງໃຫ້ແຮງງານລາວ ກາຍເປັນແຮງງານທີ່ມີຄຸນນະພາບ, ເປັນທີ່ຕ້ອງການຂອງຕະຫຼາດແຮງງານ ເພື່ອກັບມາພັດທະນາສ້າງສາປະເທດຊາດ.

    ດັ່ງນັ້ນ ລັດຖະບານ ຈຶ່ງມີການຮ່ວມມືກັບຫຼາຍປະເທດ ເພື່ອຈັດສົ່ງແຮງງານລາວອອກໄປເຮັດວຽກຢູ່ຕ່າງປະເທດ ໂດຍພາຍໃຕ້ການຄຸ້ມຄອງດູແລຂອງລັດຖະບານ ກໍຄືກົມການຈັດຫາງານ ກະຊວງແຮງງານ ແລະ ສະຫວັດດີການສັງຄົມ.

    (ຂ່າວສານຮສສ)

    LEAVE A REPLY

    Please enter your comment!
    Please enter your name here