ລັດຖະບານ ຄາດຈະມີລາຍຮັບບໍ່ຫຼຸດ 200 ລ້ານໂດລາ ຈາກການທົດລອງສົ່ງອອກແຮ່ທາດ ນອກນັ້ນຍັງມີລາຍຮັບການທຸລະກິດຊັບສິນດີຈີຕອນ

    0
    51

    ທ່ານ ບຸນໂຈມ ອຸບົນປະເສີດ ລັດຖະມົນຕີ ກະຊວງການເງິນ ໄດ້ລາຍງານກ່ຽວກັບ ຄາດຄະເນການຈັດຕັ້ງປະຕິບັດແຜນງົບປະມານແຫ່ງລັດ 6 ເດືອນຕົ້ນປີ 2022, ຄາດຄະເນ 6 ເດືອນທ້າຍປີ 2022 ຕໍ່ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ເມື່ອວັນທີ 13 ມິຖຸນາ ນີ້ວ່າ: ການເກັບລາຍຮັບຈາກຖານໃໝ່ ໃນການຈັດຕັ້ງປະຕິບັດການເກັບລາຍຮັບຈາກການທົດລອງສົ່ງອອກແຮ່ທາດແບບເດັດຖານ ມີທັງໝົດ 50 ໂຄງການ ໄດ້ວາງເງິນມັດຈໍາທັງໝົດ 45,2 ລ້ານໂດລາ ແລະ 255 ຕື້ກີບ.

    ກໍາລັງມີແຜນສົ່ງອອກ ຈໍານວນ 14 ບໍລິສັດ ບໍລິມາດ 9,18 ລ້ານໂຕນ ຄາດຄະເນຈະໄດ້ລາຍຮັບເຂົ້າງົບປະມານ ຕໍ່າສຸດບໍ່ຫຼຸດ 200 ລ້ານໂດລາ; ໄດ້ສົ່ງອອກແລ້ວມີຈໍານວນ 5 ບໍລິສັດ ບໍລິມາດ 279.000 ໂຕນ ແລະ ໄດ້ມອບພັນທະເຂົ້າງົບປະມານ 8,83 ລ້ານໂດລາ.

    ການເກັບລາຍຮັບຈາກຖານໃໝ່ໃນການຈັດຕັ້ງປະຕິບັດການທົດລອງດໍາເນີນທຸລະກິດ ກຽວກັບ ຊັບສິນດີຈີຕອນ (ເງິນຄຣິບໂຕ). ປັດຈຸບັນ ໄດ້ຮັບອະນຸມັດດໍາເນີນທຸລະກິດດັ່ງກ່າວ ຈໍານວນ 13 ບໍລິສັດ; ໃນນັ້ນ ມີ 11 ບໍລິສັດ ດໍາເນີນທຸລະກໍາຊັບສິນດີຈີຕອນ, ໄດ້ມອບຄ່າລິຂະສິດໃນການອະນຸຍາດດໍາເນີນທຸລະກິດ ເງິນຄຣິບໂຕແລ້ວ ຈໍານວນ 10 ບໍລິສັດ ເປັນເງິນຈໍານວນ 4,5 ລ້ານໂດລາ ແລະ ຈໍານວນ 5,71 ຕື້ກີບ.

    ໃນນີ້, ມີ 2 ບໍລິສັດ ໄດ້ຮັບອະນຸຍາດຈາກທະນາຄານ ແຫ່ງ ສປປ ລາວ ຊື້-ຂາຍເງິນຄຣິບໂຕ ຊຶ່ງຈະຕ້ອງໄດ້ມອບຄ່າລິຂະສິດ ບໍລິສັດລະ 1 ລ້ານໂດລາ, ຈັດເກັບລາຍຮັບຈາກບໍລິສັດ ວາບດາຕ້າ ເຕັກໂນໂລຊີ ລາວ ທີ່ໄດ້ດໍາເນີນທຸລະກິດການຂຸດຄົ້ນເງິນຄຣິບໂຕ ທີ່ມອບພັນທະແບບອາກອນມອບເໝົາ (ອາກອນກໍາໄລ ແລະ ອາກອນມູນຄ່າເພີ່ມ) ງວດ 1 ຂອງປີ 2022 ຈໍານວນ 6,50 ລ້ານໂດລາ ແລະ ຄາດວ່າງວດທີ 2 ຈໍານວນ 6,50 ລ້ານໂດລາ ຈະມອບໃນທ້າຍເດືອນມິຖຸນາ 2022.

    ສໍາລັບການເກັບລາຍຮັບຕາມສັນຍາ 10 ເມັກກາວັດ ຕໍ່ 1 ລ້ານໂດລາ ແລະ ອາກອນມອບເໝົາ 15% ຂອງລາຍຮັບທຸລະກິດທັງໝົດ ແມ່ນພວມດໍາເນີນການກວດກາ ເພື່ອເກັບລາຍຮັບຕາມການເຄື່ອນໄຫວຂອງແຕ່ລະຫົວໜ່ວຍ ແລະ ຕາມສັນຍາທີ່ໄດ້ເຊັນກັບລັດຖະບານ.

    LEAVE A REPLY

    Please enter your comment!
    Please enter your name here