ປກສ ນວ ຄົ້ນຄວ້າຄວາມເປັນໄປໄດ້ ໃນການປັບປຸງການເຮັດປຶ້ມຜ່ານແດນ ໃຫ້ວ່ອງໄວ ແລະ ສະດວກ

0
52

ຂ່າວປ້ອງກັນຄວາມສະຫງົບນະຄອນຫລວງວຽງຈັນໃຫ້ຮູ້ວ່າ: ວັນທີ 25 ພຶດສະພາ 2022, ກອງບັນຊາການ ປກສ ນວ ໄດ້ຈັດກອງປະຊຸມທາງດ້ານວິຊາການປຶກສາຫາລື ເພື່ອຊອກທິດທາງໃນການປັບປຸງແບບແຜນບໍລິການ ປະຊາຊົນເຮັດປິ້ມຜ່ານແດນ ໃຫ້ສະດວກສະບາຍ ທ່ວງທັນກັບຄວາມຮຽກຮ້ອງຕ້ອງການຂອງສັງຄົມ ພາຍຫຼັງທີ່ລັດຖະບານໄດ້ເປີດປະເທດ ໃຫ້ມີການເຂົ້າ-ອອກປະເທດເປັນ

ປົກກະຕິ ເຮັດໃຫ້ພໍ່ແມ່ປະຊາຊົນຈໍານວນຫຼາຍ ເຂົ້າມາເຮັດປຶ້ມຜ່ານແດນ ແລະ ເກີດສຽງຈົ່ມວ່າ ການບໍລິການຊັກຊ້າ ດັ່ງນັ້ນ ຈິ່ງໄດ້ຈັດກອງປະຊຸມປຶກສາຫາລື ຄົ້ນຄ້ວາທາງດ້ານວິຊາການ ເຖິງຄວາມເປັນໄປໄດ້ ໃນການປັບປຸງຂອດບໍລິການເຮັດປຶ້ມຜ່ານແດນ ໃຫ້ຊາວນະຄອນຫລວງວຽງຈັນ ມີຄວາມເປັນທັນສະໄໝສະດວກວ່ອງໄວ ແລະ ຮັບປະກັນທາງດ້ານວິຊາສະເພາະ ພາຍໃຕ້ການເປັນປະທານຂອງ ພັອ ສຸກພະຈັນ ບຸດດາຄໍາ ຫົວໜ້າກອງບັນຊາການ ປກສ ນວ, ມີຫົວໜ້າຫ້ອງການ, ຄະນະຫ້ອງສັນຕິບານ, ພະແນກວິຊາສະເພາະຫ້ອງສັນຕິບານ ແລະ ມີ ທ່ານ ສຸລິໄຊ ໄຊຍະສານ ປະທານບໍລິສັດ ສິລິຈະເລີນໄຊ ຈຳກັດຜູ້ດຽວ ເຂົ້າຮ່ວມ.

ກອງປະຊຸມໄດ້ຄົ້ນຄວ້າຊອກຫາຊ່ອງທາງແກ້ໄຂ ການບໍລິການທີ່ມີລັກສະນະຊັກຊ້າ ເຊິ່ງເປັນສາເຫດພາໃຫ້ມີການຈົ່ມວ່າຈາກສັງຄົມ, ປະລິມານການບໍລິການໄດ້ໜ້ອຍ ເມື່ອທຽບໃສ່ຄວາມຕ້ອງການຂອງສັງຄົມ ເພື່ອຊອກຫາວິທີທາງແກ້ໄຂບັນຫາດັ່ງກ່າວ ຈຶ່ງໄດ້ພ້ອມກັນສຶກສາຄວາມເປັນໄປໄດ້ໃນການບໍລິການໃຫ້ທັນສະໄໝ, ວ່ອງໄວ, ບໍ່ໃຫ້ຜູ້ມາໃຊ້ບໍລິການເສຍເວລາ ແລະ ສາມາດອະນຸມັດປຶ້ມຜ່ານແດນໃຫ້ໄດ້ຈໍານວນຫຼາຍ ຕາມຄວາມຕ້ອງການຂອງປະຊາຊົນ ໂດຍຈະນໍາໃຊ້ເຕັກໂນໂລຊີເຂົ້າຊ່ວຍ.

ພາຍຫຼັງຄົ້ນຄວ້າທາງດ້ານວິຊາການແລ້ວ ຈະໄດ້ນຳສະເໜີ ຂໍທິດຊີ້ນຳຈາກສາຍຕັ້ງ ແລະ ສາຍຂວາງ.