ເຂື່ອນໄຟຟ້ານ້ຳອູ ແລະ ເຂື່ອນໄຟຟ້າ ນ້ຳງື່ມ 5 ຝຶກຊ້ອມແຜນຮັບມື ອຸທົກກະໄພສຸກເສີນ

0
70

ເຂື່ອນໄຟຟ້ານ້ຳອູ ແລະ ເຂື່ອນໄຟຟ້ານ້ຳງື່ມ 5 ຝຶກຊ້ອມແຜນຮັບມື ອຸທົກກະໄພສຸກເສີນ

ຂປລ. ແຫລ່ງຂ່າວຈາກ ແຂວງຫລວງພະບາງ ໃຫ້ຮູ້ວ່າ: ເມື່ອບໍ່ດົນມານີ້, ຢູ່ຫ້ອງການສູນຄຸ້ມຄອງການດໍາເນີນງານ ແລະ ບໍາລຸງຮັກສາເຂື່ອນໄຟຟ້າພະລັງນໍ້າ ນໍ້າອູ ແລະ ເຂື່ອນໄຟ ຟ້ານ້ຳງື່ມ 5 ໄດ້ຝຶກອົບຊ້ອມແຜນຮັບມືສຸກເສີນອຸທົກກະໄພ ຂອງເຂື່ອນໄຟຟ້າພະລັງນ້ຳອູ ແລະ ເຂື່ອນໄຟຟ້ານ້ຳງື່ມ 5 ປະຈໍາປີ 2022 ເພື່ອໃຫ້ວິຊາການທີ່ຮັບຜິດຊອບວຽກດັ່ງກ່າວ ຮັບຮູ້ ແລະ ສາມາດປະເມີນສະພາບການທີ່ອາດຈະເກີດຂຶ້ນ ເພື່ອກຽມຄວາມພ້ອມຮັບມືໃຫ້ທັນກັບສະພາບການ ແນໃສ່ເຮັດໃຫ້ມີຜົນກະທົບຕໍ່ສິ່ງແວດລ້ອມ ແລະ ສັງຄົມໜ້ອຍທີ່ສຸດ, ທັງຮັບ ປະກັນໃຫ້ການຜະລິດພະລັງງານ
ໄຟຟ້າ ຂອງເຂື່ອນໄຟຟ້ານ້ຳອູ ແລະ ເຂື່ອນໄຟຟ້ານ້ຳງື່ມ 5 ມີຄວາມຍືນຍົງ ແລະ ປອດໄພ.

ການຝຶກຊ້ອມຄັ້ງນີ້, ໄດ້ມີການຈໍາລອງເຫດການຮັບມືກັບໄພນໍ້າຖ້ວມ ຂອງສະຖານີໄຟຟ້າລະດັບ 7 ໃນຮອບ 20 ປີ ຢູ່ເຂື່ອນໄຟຟ້ານ້ຳອູ 7, ການຍົກຍ້າຍພະນັກງານທັງໝົດຫລົບໜີອອກຈາກສະຖານທີ່ ຈະເກີດໄພພິບັດສຸກເສີນ ໃນບໍລິເວນເຂື່ອນໄຟຟ້ານ້ຳອູ 6, ການຍົກຍ້າຍປະຊາຊົນ ແລະ ພະນັກງານ ອອກຈາກພື້ນທີ່ສ່ຽງ ກ່ອນການລະບາຍນ້ຳອອກ ປະຕູລະບາຍນ້ຳເຂື່ອນນ້ຳອູ 5 ແລະ ການປິດປະຕູກັນນ້ຳຖ້ວມ ຫລີກລ້ຽງການເກີດເຫດການນ້ຳຖ້ວມເຮືອນຈັກໄຟຟ້າ ຢູ່ເຂື່ອນນ້ຳອູ 3.

ໂອກາດນີ້, ທ່ານ ບຸນເລື່ອມ ມະນີວົງ ຮອງເຈົ້າແຂວງຫລວງພະບາງ ໄດ້ສະແດງຄວາມຊົມເຊີຍ ທີ່ບໍລິສັດເຂື່ອນໄຟຟ້ານ້ຳອູ ແລະ ເຂື່ອນໄຟຟ້ານ້ຳງື່ມ 5 ຈັດຝຶກອົບຮົມຝຶກຊ້ອມແຜນການຮັບມືສຸກເສີນອຸທົກກະ ຈາກໄພພິບັດທຳມາຊາດ ໃນຂອບເຂດເຂື່ອນໄຟຟ້ານ້ຳອູ ເຊິ່ງຈະເປັນບົດຮຽນອັນດີ ໃນການກຽມຄວາມພ້ອມຮັບມືໃນຕໍ່ໜ້າ. ພ້ອມນີ້, ທ່ານໄດ້ເນັ້ນໃຫ້ຄະນະຮັບຜິດຊອບ ສືບຕໍ່ໃນການວາງແຜນຮັບມືກັບໄພພິບັດທາງທຳມະຊາດ ທີ່ອາດຈະເກີດຂຶ້ນ ທັງແຈ້ງເຕືອນໃຫ້ປະຊາຊົນມີຄວາມພ້ອມຮັບມືເປັນແຕ່ລະໄລຍະ.
ຂ່າວ: ບົວວອນ