ລາວ ສາມາດຍາດໄດ້ 42 ຫຼຽນ ໃນຊີເກມຄັ້ງທີ 31 ທີ່ ສສ ຫວຽດນາມ

0
83

ງານມະຫະກຳກິລາຊີເກມຄັ້ງທີ31ທີ່ ສສ ຫວຽດນາມ ໄດ້ປິດລົງເປັນທີ່ຮຽບຮ້ອຍແລ້ວ ໃນວັນທີ23ພຶດສະພາ2022ພາຍຫຼັງ ໄດ້ດຳເນີນມາແຕ່ວັນທີ12ພຶດສະພາ2022 (12ວັນ),ຊຶ່ງງານກິລາຊີເກມຄັ້ງນີ້ ຄະນະນັກກິລາລາວ ສາມາດຍາດມາໄດ້2ຫຼຽນຄໍາ, 7ຫຼຽນເງິນ ແລະ33ຫຼຽນທອງ ລວມ42ຫຼຽນ ຈັດຢູ່ອັນດັບທີ9ຈາກທັງໝົດ11ປະເທດທີ່ເຂົ້າຮ່ວມແຂ່ງຂັນ. ສ່ວນເຈົ້າພາບ ຫວຽດນາມ ຄອງເຈົ້າຫຼຽນຄຳຢ່າງຍິ່ງໃຫຍ່ ສາມາດຍາດໄດ້205ຫຼຽນຄຳ, 125ຫຼຽນເງິນ ແລະ116ຫຼຽນທອງ ລວມ446ຫຼຽນ ແລະ ອັນດັບ2ຕົກເປັນຂອງປະເທດໄທ ຍາດໄດ້92ຫຼຽນຄຳ, 103ຫຼຽນເງິນ ແລະ136ຫຼຽນທອງ ລວມ331ຫຼຽນ.

ສປປ ລາວ ໄດ້ສົ່ງຄະນະນຳ,ຄູຝຶກ ແລະ ນັກກິລາ ທັງໝົດ487ທ່ານ ໃນນີ້ແບ່ງເປັນນັກກິລາ280ຄົນ ຈາກ29ປະເພດກິລາ ເພື່ອເຂົ້າຮ່ວມຊີເກມຄັ້ງທີ31,ງານແຂ່ງຂັນກິລາຄັ້ງນີ້ ນັກກິລາລາວ ສາມາດຍາດໄດ້42ຫຼຽນ ຈາກປະເພດກິລາ ຄື:2ຫຼຽນຄຳ ໄດ້ຈາກກິລາໂວວີນາມ; 7ຫຼຽນເງິນ ໄດ້ຈາກກິລາໂວວີນາມ,ຄາຣາເຕໂດ,ເປຕັງ,ຢູໂດ ແລະ ກະຕໍ້; 33ຫຼຽນທອງ ໄດ້ຈາກກິລາເປຕັງ,ກິລາຄິກບອກຊິງ,ວູຊູ,ປັນຈັກສີລັດ,ເພາະກາຍ,ເທຄວັນໂດ,ມວຍປໍ້າ,ໂວວີນາມ,ມວຍສາກົນ,ຢູໂດ,ເທັນນິດ,ກະຕໍ້,ມວຍລາວ ແລະ ຍິງປືນ.

ໃນງານມະຫະກຳກິລາຊີເກມແຕ່ລະຄັ້ງ ນັກກິລາລາວ ກໍສາມາດສ້າງຊຶ່ສຽງໃຫ້ກັບປະເທດຊາດ ໂດຍສະເພາະ ໃນຊີເກມ ຄັ້ງທີ30ປີ2019ທີ່ ຟິລິບປິນ,ນັກກິລາລາວ ສາມາດຍາດໄດ້1ຫຼຽນຄໍາ, 5ຫຼຽນເງິນ ແລະ29ຫຼຽນທອງ ຢູ່ອັນດັບທີ10ຂອງຕາຕະລາງຈາກທັງໝົດ11ປະເທດທີ່ເຂົ້າຮ່ວມແຂ່ງຂັນ.

ສໍາລັບ ງານມະຫະກຳກິລາຊີເກມ ຄັ້ງທີ32ໃນປີ2023ແມ່ນຮັບກຽດເປັນເຈົ້າພາບຂອງຣາຊະອານາຈັກກຳປູເຈຍ.