ປະຊາຊົນທີ່ອາໄສຢູ່ພາກເໜືອ ແລະ ພາກກາງ ລະວັງຝົນຕົກໜັກ ແລະ ລົມພັດແຮງ

0
49

ກົມອຸຕຸນິຍົມ ແລະ ອຸທົກກະສາດໄດ້ພະຍາກອນນັບແຕ່ເວລາ 7:00 ໂມງຂອງວັນທີ 23 ເຖິງ ເວລາ 7:00 ໂມງຂອງວັນທີ 24 ພຶດສະພາ 2022 ນີ້ໃຫ້ຮູ້ວ່າ: ທົ່ວທຸກພາກຂອງປະເທດຍັງຈະມີຝົນຕົກ ຟ້າຮ້ອງ ຟ້າເຫຼື້ອມ ໃນລະດັບຄ່ອຍຢູ່ທົ່ວໄປໃນແຕ່ລະພາກ ແລະ ຕົກປານກາງ ຫາ ໜັກຢູ່ບາງທ້ອງຖິ່ນ ໂດຍສະເພາະ ແຂວງພາກເໜືອ ແລະ ພາກກາງ ຈະມີລົມພັດແຮງເປັນບາງໂອກາດ, ດັ່ງນັ້ນ ຈຶ່ງແຈ້ງເຕືອນເຖິງປະຊາຊົນບັນດາເຜົ່າ ແລະ ອໍານາດ ການປົກຄອງທຸກພາກສ່ວນ ທີ່ອາໄສຢູ່ບັນດາແຂວງພາກເໜືອ ແລະ ພາກກາງ ຈົ່ງມີສະຕິລະມັດລະວັງຕໍ່ສະພາບຝົນຕົກໜັກຕິດຕໍ່ກັນ ຫຼາຍວັນ ທີ່ຈະເຮັດໃຫ້ມີດິນເຈື່ອນ ແລະ ນໍ້າຖ້ວມຊຸ ເກີດຂຶ້ນໄດ້ຢູ່ ບາງທ້ອງຖິ່ນ.

ສະພາບອາກາດດັ່ງກ່າວເກີດຈາກຮ່ອງຄວາມກົດດັນອາກາດຕໍ່າ ຫຼື ຮ່ອງຝົນ ໄດ້ສືບຕໍ່ພາດຜ່ານເຂດພາກ ເໜືອຂອງປະເທດລາວ ສົມທົບກັບລົມມໍລະສຸມຕາເວັນຕົກສ່ຽງໃຕ້ ທີ່ມີ ກໍາລັງປານກາງປົກຄຸມ.ສະພາບອາກາດໃນແຕ່ລະພາກລະບຸໄວ້ດັ່ງລຸ່ມນີ້:

ພາກເໜືອດ້ານຕາເວັນອອກ ປະກອບມີ: ແຂວງຜົ້ງສາລີ, ຫົວພັນ ແລະ ຊຽງຂວາງ ຈະມີຝົນຕົກ ຟ້າຮ້ອງ ຟ້າເຫຼື້ອມໃນລະດັບຄ່ອຍຢູ່ເກືອບ ທົ່ວໄປ ແລະ ຕົກປານກາງ ຫາໜັກຢູ່ບາງທ້ອງຖິ່ນ ໂດຍສະເພາະຢູ່ແຂວງຫົວພັນ ແລະ ຊຽງຂວາງ.

ພາກເໜືອດ້ານຕາເວັນຕົກ ປະກອບມີ: ແຂວງຫຼວງນໍ້າທາ, ບໍ່ແກ້ວ, ອຸດົມໄຊ, ຫຼວງພະບາງ ແລະ ໄຊຍະບູລີ ຈະມີຝົນຕົກ ຟ້າຮ້ອງ ຟ້າເຫຼື້ອມ ໃນລະດັບຄ່ອຍຢູ່ເກືອບທົ່ວໄປ ແລະ ຕົກປານກາງ ຫາ ຕົກໜັກ ພ້ອມມີ ລົມພັດແຮງຢູ່ບາງທ້ອງຖິ່ນໂດຍສະເພາະຢູ່ແຂວງຫຼວງນໍ້າທາ ແລະ ບໍ່ແກ້ວ.

ນະຄອນຫຼວງວຽງຈັນຈະມີຝົນຕົກ ຟ້າຮ້ອງ ຟ້າເຫຼື້ອມໃນລະດັບ ຄ່ອຍຢູ່ທົ່ວໄປ ແລະ ຕົກປານກາງ ພ້ອມມີລົມພັດແຮງເປັນບາງໂອກາດ ຢູ່ບາງບໍລິເວນ.

ພາກກາງ ປະກອບມີ: ແຂວງວຽງຈັນ, ບໍລິຄໍາໄຊ, ຄໍາມ່ວນ ແລະ ສະຫວັນນະເຂດຈະມີຝົນຕົກ ຟ້າຮ້ອງ ຟ້າເຫຼື້ອມໃນລະດັບຄ່ອຍຢູ່ເກືອບທົ່ວໄປ ແລະ ຕົກ ປານກາງ ຫາ ຕົກໜັກ ພ້ອມມີລົມພັດແຮງຢູ່ບາງທ້ອງຖິ່ນໂດຍສະເພາະ ແຂວງ ວຽງຈັນ, ບໍລິຄໍາໄຊ ແລະ ຄໍາມ່ວນ.ແຂວງໄຊສົມບູນຈະມີຝົນຕົກໃນລະດັບປານກາງ ຫາ ຕົກໜັກ.

ພາກໃຕ້ ປະກອບມີ: ແຂວງສາລະວັນ, ເຊກອງ, ຈໍາປາສັກ ແລະ ອັດຕະປືຈະມີຝົນຕົກ ຟ້າຮ້ອງ ຟ້າເຫຼື້ອມໃນລະດັບຄ່ອຍຢູ່ເກືອບທົ່ວໄປ ແລະ ຕົກປານກາງ ພ້ອມມີລົມພັດແຮງຢູ່ບາງທ້ອງຖິ່ນ ໂດຍສະເພາະຢູ່ແຂວງສາລະວັນ ແລະ ຈໍາປາສັກ.ເຂດພູພຽງບໍລະເວນຈະມີຝົນຕົກ ຟ້າຮ້ອງ ຟ້າເຫຼື້ອມໃນລະດັບຄ່ອຍ ຫາ ປານກາງ.