ມູນຄ່າການນຳເຂົ້າ ແລະ ສົ່ງອອກ ປະຈຳເດືອນເມສາຂອງ ສປປ ລາວ ຂາດດຸນການຄ້າ 102 ລ້ານໂດລາ

0
65

ມູນຄ່າການນຳເຂົ້າ ແລະ ສົ່ງອອກ ປະຈຳເດືອນເມສາຂອງ ສປປ ລາວ ຂາດດຸນການຄ້າ 102 ລ້ານໂດລາ

ເວບໄຊ laotradeportal ລາຍງານວ່າ: ມູນຄ່າການນໍາເຂົ້າ ແລະ ສົ່ງອອກ ຂອງ ສປປ ລາວ ປະຈໍາເດືອນເມສາ ປີ 2022 ບັນລຸໄດ້ປະມານ 950 ລ້ານໂດລາສະຫະລັດ. ໃນນັ້ນ, ມູນຄ່າການສົ່ງອອກ ມີປະມານ 424 ລ້ານໂດລາສະຫະລັດ, ມູນຄ່າການນໍາເຂົ້າ ມີປະມານ 526 ລ້ານໂດລາສະຫະລັດ ແລະ ຂາດດຸນການຄ້າປະມານ 102 ລ້ານໂດລາສະຫາລັດ.

ສິນຄ້າສົ່ງອອກຫຼັກປະກອບມີ: ຄຳປະສົມ, ຄຳແທ່ງ, ເຈ້ຍ ແລະ ເຄື່ອງທີ່ເຮັດດ້ວຍເຈ້ຍ, ແຮ່ທອງ, ເຍື່ອໄມ້ ແລະ ເສດເຈ້ຍ, ຢາງພາລາ, ມັນຕົ້ນ, ແຮ່ເຫຼັກ, ໝາກກ້ວຍ, ເຄື່ອງນຸ່ງຫົ່ມ ແລະ ຝຸ່ນ (ປຸຍ). ໝວດສີນຄ້ານໍາເຂົ້າຫຼັກປະກອບມີ: ພາຫະນະທາງບົກ (ນອກຈາກລົດຈັກ,ລົດໄຖ), ນ້ຳມັນກາຊວນ, ອຸປະກອນກົນຈັກ (ນອກຈາກເຄື່ອງກົນຈັກພາຫະນະ), ເຍື່ອໄມ້ ແລະ ເສດເຈ້ຍ, ຊິ້ນສ່ວນອາໄຫຼ່ລົດ (ລວມທັງຢາງ, ແວ່ນ, ໂສ້…), ເຄື່ອງດື່ມ (ນໍ້າ, ນໍ້າອັດລົມ, ຊູກໍາລັງ…), ເຫຼັກ ແລະ ເຄື່ອງທີ່ເຮັດດ້ວຍເຫຼັກ, ເຫຼັກກ້າ, ເຄື່ອງໃຊ້ທີ່ເຮັດດ້ວຍພລາສະຕິກ, ນ້ຳມັນແອັດຊັງ, ແອັດຊັງພິເສດ, ເຈ້ຍ ແລະ ເຄື່ອງໃຊ້ທີ່ເຮັດດ້ວຍເຍື່ອເຈ້ຍ ແລະ ໄມ້ ແລະ ໄມ້ ແລະ ເຄື່ອງໃຊ້ທີ່ເຮັດດ້ວຍໄມ້.

5 ປະເທດທີ່ ສປປ ລາວ ສົ່ງອອກຫຼັກມີ: ສປ ຈີນ ມູນຄ່າ 137 ລ້ານໂດລາ, ສສ ຫວຽດນາມ 106 ລ້ານໂດລາ, ໄທ 65 ລ້ານໂດລາ, ອົດສະຕຣາລີ 32 ລ້ານໂດລາ ແລະ ສະວິດເຊີແລນ 14 ລ້ານໂດລາ. 5 ປະເທດທີ່ນໍາເຂົ້າຫຼັກມີ ໄທ ມູນຄ່າ 238 ລ້ານໂດລາ, ສປ ຈີນ 157 ລ້ານໂດລາ, ສສ ຫວຽດນາມ 47 ລ້ານໂດລາ, ສະຫະລັດອາເມລິກາ 18 ລ້ານໂດລາ ແລະ ຍີ່ປຸ່ນ 12 ລ້ານໂດລາ ເຊິ່ງມູນຄ່າການນໍາເຂົ້າ ແລະ ສົ່ງອອກ ປະຈໍາເດືອນເມສາ 2022 ນີ້ ແມ່ນຍັງບໍ່ກວມເອົາມູນຄ່າການສົ່ງອອກໄຟຟ້າ.