ການກັກຕຸນເງິນຕາຕ່າງປະເທດ ເປັນບັນຫາຫຼັກ ທີ່ກໍ່ໃຫ້ເກີດສະພາບ ການຂາດແຄນນໍ້າມັນຢູ່ປະເທດລາວ

0
72

ປັດຈຸບັນນີ້, ປະເທດລາວໄດ້ເກີດສະພາບຂາດແຄນນໍ້າມັນ ຊຶ່ງປະທານບໍລິສັດ ປີໂຕຣລ້ຽມເທຣດດິ້ງ ລາວ ມະຫາຊົນ ໄດ້ກ່າວກ່ຽວກັບບັນຫາດັ່ງກ່າວວ່າແມ່ນເກີດຈາກການຂາດແຄນເງິນຕາຕ່າງປະເທດຢູ່ພາຍໃນປະເທດໂດຍສະເພາະຕະກູນເງິນໂດລາ ແລະ ເງິນບາດຍ້ອນວ່າປະຊາຊົນລາວມີຄວາມແຕກຕຶ່ນ ຕ່າງພາກັນກັກຕຸນເງິນຕາຕ່າງປະເທດໄວ້.

ທ່ານ ຈັນທອນ ສິດທິໄຊ ປະທານ ບໍລິສັດ ປີໂຕຣລ້ຽມເທຣດດິ້ງ ລາວ ມະຫາຊົນ ໄດ້ຖະແຫຼງຂ່າວຕໍ່ສື່ມວນຊົນເມື່ອມໍ່ໆມານີ້ວ່າ: ໃນໄລຍະ 3 ເດືອນຕົ້ນປີ ປະເທດລາວເກີນດຸນການຄ້າ ຫຼື ມູນຄ່າການສົ່ງອອກສິນຄ້າຫຼາຍກວ່າສິນຄ້ານໍາເຂົ້າ ມີມູນຄ່າຫຼາຍກວ່າ 500 ລ້ານໂດລາ, ສະນັ້ນສະກຸນເງິນຕາຕ່າງປະເທດຢູ່ລາວມັນພຽງພໍໃນການຮັບໃຊ້ສັງຄົມ ແຕ່ ສະພາບການຈໍລະຈອນເງິນຢູ່ໃນລະບົບມີບັນຫາຍ້ອນປະຊາຊົນມີການກັກຕຸນເງິນຕາ ເຮັດໃຫ້ຜູ້ປະກອບການ ຫຼື ຫຼາຍປ້ຳ ຫຼື ຫຼາຍສະຖານີແລກເງິນຕາບໍ່ໄດ້ກໍເລີຍນຳເຂົ້ານໍ້າມັນບໍ່ໄດ້.

ທ່ານ ຈັນທອນໄດ້ກ່າວຕື່ມວ່າ: ເມື່ອເວົ້າວ່າປະເທດລາວຂາດແຄນນໍ້າມັນນັ້ນສ່ວນຕົວແລ້ວຍັງບໍ່ເຖິງຂາດແຄນ ຫຼື ຮອດຂັ້ນວິກິດ ແຕ່ເກີດຈາກຄວາມຕື່ນຂອງປະຊາຊົນໃນສັງຄົມທີ່ມີການຍາດແຍ່ງກັນໄປໃສ່ນໍ້າມັນໂດຍບໍໍ່ມີການແບ່ງປັນ ພາກັນເອົາກະຕຸກໄປໃສ່ ຫຼື ອາດເວົ້າໄດ້ວ່າບັນຫາຂາດແຄນນໍ້າມັນເກີດຈາກປະຊາຊົນນັ້ນເອງ.