ຫວຽດນາມກຽມຍົກເລີກ ກວດໂຄວິດນັກເດີນທາງຕ່າງປະເທດ ເລີ້ມ 15 ພຶດສະພາ

0
75

ວັນທີ 14 ພຶດສະພາ 2022, ສຳນັກຂ່າວຊິນຮົວລາຍງານວ່າ: ຫວຽດນາມ ກຽມຍົກເລີກຂໍ້ກຳນົດການກວດພະຍາດໂຄວິດສຳລັບນັກເດີນທາງຕ່າງປະເທດເຂົ້າປະເທດ ນັບແຕ່ວັນທີ 15 ພຶດສະພາເປັນຕົ້ນໄປ.

ເອກະສານທາງການຈາກທ່ານ ຟ້າມ ມິງ ຈິງ ນາຍົກລັດຖະມົນຕີຫວຽດນາມ ໃນວັນທີ 13 ພຶດສະພາ ລະບຸວ່າ: ການດຳເນີນງານດັ່ງກ່າວມີຂຶ້ນເນື່ອງຈາກຈຳນວນຜູ້ຕິດເຊື້ອໂຄວິດ, ຜູ້ປ່ວຍອາການຮຸນແຮງ ແລະ ຜູ້ເສຍຊີວິດຈາກເຊື້ອໂຄວິດໃນປະເທດຫລຸດລົງນັບແຕ່ວັນທີ 15 ມີນາປີນີ້.

ຫວຽດນາມໄດ້ຍົກເລີກຂໍ້ກຳນົດການກວດສຸຂະພາບໃນກຸ່ມນັກເດີນທາງລະຫວ່າງປະເທດຂາເຂົ້າໃນວັນທີ 27 ເມສາຜ່ານມາ ຫລັງຈາກຍົກເລີກຂໍ້ກຳນົດສະແດງໃບຮັບຮອງການສັກວັກຊີນປ້ອງກັນພະຍາດໂຄວິດ ແລະ ການກັກຕົວນັບແຕ່ວັນທີ 16 ມີນາ ເຊິ່ງເປັນເວລາບໍ່ດົນຫລັງຈາກຫວນກັບມາເປີດການທ່ອງທ່ຽວສຳລັບນັກເດີນທາງຕ່າງປະເທດອີກ.

ທັງນີ້, ຫວຽດນາມໄດ້ສັກວັກຊີນປ້ອງກັນພະຍາດໂຄວິດຫລາຍກວ່າ 216,5 ລ້ານໂດສແລ້ວ ເມື່ອນັບຮອດວັນທີ 13 ພຶດສະພາ ແລະ ມີປະຊາຊົນສັກວັກຊີນຢ່າງໜ້ອຍສອງໂດສເກືອບ 68,7 ລ້ານຄົນ.