ເມືອງງອຍ ແຂວງຫລວງພະບາງ ທຳລາຍອ າ ວຸ ດ ລ່ າເນື້ອ 1.400 ກວ່າກະບອກ ແລະ ສິ່ງຜິດກົດໝາຍອື່ນໆ

0
76

ເມືອງ ງອຍ ແຂວງ ຫລວງພະບາງ ທຳລາຍອາວຸດລ່າເນື້ອ 1.400 ກວ່າກະບອກ ແລະ ສິ່ງທີ່ຜິດກົດໝາຍອື່ນໆ

ອາທິດແລ້ວນີ້ນີ້ ເມືອງງອຍ ແຂວງຫຼວງພະບາງ ໄດ້ຈັດພິທີທໍາລາຍອາວຸດລ່າເນື້ອ ແລະ ສິ່ງຕ້ອງຫ້າມຜິດກົດໝາຍ ຢູ່ກອງບັນຊາການທະຫານເມືອງ ໂດຍມີທ່ານ ບຸນເມືອງ ໄຊຍະສິດ ເຈົ້າເມືອງ-ເມືອງງອຍ ພ້ອມດ້ວຍຄະນະ,ມີຫົວໜ້າ-ຮອງຫົວໜ້າຫ້ອງການ ເຈົ້າໜ້າທີ່ປກຊ-ປກສ ແລະອົງການປົກຄອງບ້ານກຸ່ມເທດສະບານ ເຂົ້າຮ່ວມ.

ທ່ານ ສຸກສົມຫວັງ ຄຸນມະນີ ຫົວໜ້າຫ້ອງວ່າການປົກຄອງເມືອງ ໄດ້ຜ່ານຂໍ້ຕົກລົງຂອງທ່ານເຈົ້າເມືອງ ວ່າດ້ວຍການອະນຸມັດຈັດພິທີ ທຳລາຍອາວຸດລ່າເນື້ອ ແລະ ສິ່ງທີ່ຕ້ອງຫ້າມຜິດກົດໝາຍ ຢູ່ພາຍໃນເມືອງ,ຈາກນັ້ນທ່ານ ປອ ສົມສະນິດ ແກ່ນມະນີ ຫົວໜ້າຄະນະຈັດຕັ້ງເມືອງ ກໍໄດ້ລາຍງານຫຍໍ້ໃນການຈັດຕັ້ງປະຕິບັດການຮື້ຖອນເກັບອາວຸດລ່າເນື້ອ ແລະສິ່ງຕ້ອງຫ້າມ ທີ່ຜິດກົດໝາຍ ຢູ່ບັນດາບ້ານພາຍໃນເມືອງງອຍ ຜ່ານການຕິດຕາມກວດກາ ແລະຢຸດອາວຸດ ພ້ອມກັບສິ່ງທີ່ຜິດກົດໝາຍໃນຄັ້ງນີ້ ປະກອບມີ: ອາວຸດລາເນື້ອ(ປືນແກັບ) 1.480 ກະບອກ, ເຄື່ອງມືຊັອດປາ 20 ເຄື່ອງ, ໝໍ້ໄຟ 5 ເຄື່ອງ, ຈັກສະຕີ່ນ 61 ເຄື່ອງ, ບາຈັກສະຕິ່ນ 4 ອັນ, ໂສ້ 1 ເສັ້ນ ແລະໝາກແຕກ 2 ໜ່ວຍ.

ສໍາລັບການຕິດຕາມກວດກາ ໂດຍການສົມທົບຂອງກໍາລັງປກຊ-ປກສ ແລະໃຫ້ບໍລິການປະຊາຊົນຢູ່ບັນດາກຸ່ມບ້ານ ແລະໃຫ້ການຮ່ວມມືຈາກອົງການປົກຄອງບ້ານພາຍໃນເມືອງ ເພື່ອເອົາໃຈໃສ່ໃນການແກ້ໄຂ ແລະສະກັດກັ້ນປະກົດການຫຍໍ້ທໍ້ໃນສັງຄົມ ໂດຍສະເພາະແມ່ນການຕິດຕາມກວດກາ ແລະຍຶດອາວຸດລ່າເນື້ອ,ອຸປະກອນຕັດໄມ້,ຈັກສະຕິ່ນ ແລະເຄື່ອງມືຊັອດປາ ຈາກຜູ້ລະເມີດຕໍ່ລະບຽບ

ກົດໝາຍ, ເພື່ອເປັນການປະຕິບັດຕາມແນວທາງນະໂຍບາຍຂອງພັກ-ລະບຽບກົດໝາຍຂອງລັດ ກໍ່ຄືຄຳສັ່ງວ່າດ້ວຍການກວດກາ ແລະເກັບກູ້ອາວຸດເສິກ-ອາວຸດລ່າເນື້ອ,ທາດແຕກ,ທາດລະເບີດ ທີ່ພົວພັນເຖິງຄວາມສະຫງົບ ແລະຄວາມເປັນລະບຽບຮຽບຮ້ອຍໃນສັງຄົມ ທັງເປັນການແກ້ໄຂບັນຫາທຳລາຍສັດນໍ້າ-ສັດປາ ແລະ ການຕັດໄມ້ທຳລາຍປ່າ.

ຈາກນັ້ນ ການນໍາຂອງເມືອງງອຍ ແລະພາກສ່ວນທີ່ກ່ຽວຂ້ອງໄດ້ຮ່ວມກັນທຳລາຍອາວຸດລ່າເນື້ອ ແລະ ສິ່ງຕ້ອງຫ້າມ ທີ່ຜິດກົດໝາຍ ທີ່ຍືດມາໄດ້ ຢ່າງເປັນທາງການ.

ທີ່ມາ: ຖວທ ເມືອງງອຍ