ບໍລິສັດ ລ້ານຊ້າງ ມິເນໂຣນສ໌ ລິມິເຕັດມອບອາກອນກຳໄລສົກປີ 2021 ມູນຄ່າ 13 ລ້ານກວ່າໂດລາ ໃຫ້ແກ່ລັດຖະບານລາວ

0
46

ວັນທີ 5 ພຶດສະພາ 2022, ທີ່ຫ້ອງປະຊຸມ ກົມສ່ວນສາອາກອນ, ບໍລິສັດ ລ້ານຊ້າງ ມິເນໂຣນສ໌ ລິມິເຕັດ (ລຊມລ) ຊຶ່ງຕາງໜ້າໂດຍ ຜູ້ອຳນວຍການໃຫຍ່ ທ່ານ ສະໝານ ອະເນກາ ໄດ້ມອບອາກອນກຳໄລຈຳນວນ US$13.348.764,91 ລ້ານ ຈາກການຜະລິດຄຳ ແລະ ທອງໃນສົກປີ 2021 ເຊິ່ງ ລວມເປັນລາຍຮັບທັງໝົດທີ່ໄດ້ມອບໃຫ້ແກ່ລັດຖະບານລາວ ໃນສົກປີ 2021 ກວ່າ US$40,84 ລ້ານ (ໃນນັ້ນລວມມີ ອາກອນກຳໄລ, ຄ່າຊັບພະຍາກອນແຮ່ທາດ, ເງິນປັນຜົນ, ແລະ ພັນທະອື່ນໆ).

ທ່ານ ບຸນປະເສີດ ສີກຸນລະບຸດ, ຫົວໜ້າກົມສ່ວຍສາອາກອນ, ກະຊວງການເງິນ (ຂວາ) ໄດ້ໃຫ້ກຽດຮັບ ອາກອນກຳໄລດັ່ງກ່າວ ທີ່ມອບໂດຍ ທ່ານ ສະໝານ ອະເນກາ, ຜູ້ອຳນວຍການໃຫຍ່ ລຊມລ (ຊ້າຍ).

ຄະນະທີ່ເຂົ້າຮ່ວມໃນພິທີມອບ-ຮັບໃນຄັ້ງນີ້ມີ ຫົວໜ້າພະແນກຄຸ້ມຄອງລາຍຮັບອາກອນ ທ່ານ ວ່າງເຢຍ ໄຊນາລໍ່, ຫົວໜ້າພະແນກບໍລິຫານຄວາມສ່ຽງ ແລະ ກວດກາ ທ່ານ ລັດສະໝີ ທອງບົວສີ ພ້ອມຄະນະ, ຫົວໜ້າສາຍງານພົວພັນພາຍນອກຂອງ ລຊມລ ທ່ານນາງ ດາວມະນີ ຈັນພະແກ້ວ ແລະ ຫົວໜ້າສາຍງານບັນຊີລາຍຈ່າຍ ແລະ ເງິນເດືອນ ທ່ານນາງ ສຸກນິລັນ ອູ່ຈະເລີນ.

ທ່ານ ສະໝານ ອະເນກາ, ຜູ້ອຳນວຍການໃຫຍ່ ລຊມລ ໄດ້ກ່າວວ່າ: “ບໍລິສັດ ລຊມລ ໃນຖານະທີ່ເປັນຄູ່ຮ່ວມງານທີ່ຍາວນານ ທັງເປັນຜູ້ເສຍອາກອນລາຍໃຫຍ່ ໃຫ້ແກ່ ສປປ ລາວ, ຄະນະຂອງພວກເຮົາສຸດທີ່ມີຄວາມພາກພູມໃຈທີ່ໄດ້ປະກອບສ່ວນສຳຄັນນີ້ ໃນຂະນະທີ່ເສດຖະກິດລາວພວມຟື້ນຟູ ຈາກຜົນກະທົບທີ່ຮ້າຍແຮງຂອງໂຄວິດ-19.

ໂຄງການຄຳ-ທອງ ເຊໂປນ ຍັງຈະສືບຕໍ່ຂະຫຍາຍໂຕ. ໃນຖານະທີ່ເປັນວິສາຫະກິດຂຸດຄົ້ນບໍ່ແຮ່-ໜຶ່ງດຽວຢູ່ໃນ ສປປ ລາວ ທີ່ໄດ້ຮັບການຢັ້ງຢືນກຽດຕິສັກໃນລະດັບ A (+) ຕະຫຼອດມາ ຈາກກະຊວງພະລັງງານ ແລະ ບໍ່ແຮ່, ໂຄງການຄຳ-ທອງ ເຊໂປນ ກຳລັງດໍາເນີນການສ້າງ ອຸບໂມງສຳຫຼວດບໍ່ແຮ່ໃຕ້ດິນ ໃບແບບສີມືອາຊີບທີ່ທັນສະໄໝແຫ່ງທຳອິດ ໃນສປປ ລາວ.

ພ້ອມດຽວກັນນີ້, ບໍລິສັດ ລຊມລ ກໍ່ຍັງສືບຕໍ່ ສົ່ງເສີມທຸລະກິດທ້ອງຖິ່ນພາຍໃນປະເທດເຊັ່ນ: ລັດວິສາຫະກິດໄຟຟ້າລາວ, ລັດວິສາຫະກິດນ້ຳມັນເຊື້ອໄຟລາວ, ບໍລິສັດສະຫວັນ ໂລຈີສຕິກຈ໌ ແລະ ແຫຼ່ງທຸລະກິດ-ບໍລິການພາຍໃນປະເທດອື່ນໆ ເຊິ່ງໄດ້ສົ່ງຜົນໃຫ້ມີກະແສເງິນສົດໝູນວຽນຢ່າງຕໍ່ເນື່ອງຢູ່ພາຍໃນປະເທດ ທີ່ໄດ້ຈາກກິດຈະການຂອງ ບໍ່ຄຳ-ທອງເຊໂປນ”.

ຕັ້ງແຕ່ເລີ່ມການດຳເນີນງານໃນປີ 2003, ລຊມລ ໄດ້ປະກອບສ່ວນຫຼາຍກວ່າ US$1,6 ຕື້ເປັນລາຍຮັບໂດຍກົງໃຫ້ແກ່ລັດຖະບານລາວ ລວມທັງອາກອນກຳໄລ ຫຼາຍກວ່າ US$827 ລ້ານ.