ມາແລ້ວ ນັກຮຽນເກັ່ງຂອງປະເທດ ຍິນດີນໍາເດີ້ ມໍ 4 ແລະ ມໍ 7 ປະຈໍາສົກຮຽນ 2021-2022

    0
    97

    ວັນທີ 10 ພຶດສະພາ 2022 ທີ່ຕຶກໄອຊີທີ ກະຊວງສຶກສາທິການ ແລະ ກິລາ ໄດ້ມີພິທີສະຫຼຸບຜົນການສອບເສັງແຂ່ງຂັນນັກຮຽນເກັ່ງລະດັບຊາດຊັ້ນມັດທະຍົມສຶກສາ ມໍ4 ແລະ ມໍ7 ປະຈຳສົກຮຽນ 2021-2022 ໃຫ້ກຽດເຂົ້າຮ່ວມມີທ່ານ ນາງ ປອ ສີສຸກ ວົງວິຈິດ ຮອງລັດຖະມົນຕີກະຊວງສຶກສາທິການ ແລະ ກິລາ, ມີຫົວໜ້າກົມ-ຮອງກົມສາມັນສຶກສາ, ກົມແຜນການ, ສະຖາບັນ, ສູນ ແລະ ພາກສ່ວນທີ່ກ່ຽວຂ້ອງ ຕະຫຼອດຮອດຫົວໜ້າພະແນກສຶກສາທິການ ແລະ ກິລານະຄອນຫຼວງວຽງຈັນ ແລະ 17 ແຂວງທົ່ວປະເທດ ຜູ້ອຳນວຍການໂຮງຮຽນ ແລະ ນ້ອງນັກຮຽນເກັ່ງລະດັບຊາດເຂົ້າຮ່ວມທັງເຊິ່ງໜ້າ ແລະ ອອນລາຍ.

    ການສອບເສັງແຂ່ງຂັນນັກຮຽນເກັ່ງລະດັບຊາດ ຊັ້ນມັດທະຍົມສຶກສາເປັນກິດຈະກຳທີ່ສຳຄັນ ແລະ ເປັນບູລິມະສິດຂອງກະຊວງສຶກສາທິການ ແລະ ກິລາເພື່ອເປັນການສົ່ງເສີມການຮຽນ-ການສອນ ແລະມອບທຶນການສຶກສາໃຫ້ນ້ອງນັກຮຽນເກັ່ງອັນດັບທີ1-3 ສົ່ງເສີມຄັດເລືອກນັກຮຽນເກັ່ງຕົວແທນລະດັບຊາດເພື່ອໄປແຂ່ງຂັນໃນລະດັບພາກພື້ນເຊິ່ງກົມສາມັນສຶກສາໄດ້ປະຕິບັດມາຢ່າງຕໍ່ເນື່ອງຍົກເວັ້ນສົກຮຽນ 2019-2020 ແລະ 2020-2021

    ແມ່ນໄດ້ໂຈະກ່ອນເນື່ອງຈາກສະພາບການແຜ່ລະບາດຂອງພະຍາດໂຄວິດ 19 ຈົນມາເຖິງສົກຮຽນ 2021-2022 ຈຶ່ງໄດ້ສືບຕໍ່ຈັດຕັ້ງການສອບເສັງແຂ່ງຂັນນັກຮຽນເກັ່ງລະດັບຊາດອີກຄັ້ງ ໃນວັນທີ 28 ເມສາ 2022 ແລະ ເປັນຄັ້ງທຳອິດທີ່ໄດ້ຈັດການແຂ່ງຂັນແບບອອນລາຍພ້ອມກັນທົ່ວປະເທດຢູ່ແຕ່ລະແຂວງ ແລະ ນະຄອນຫຼວງວຽງຈັນ ເຊິ່ງເອກະພາບກັນທາງດ້ານເວລາ ແລະ ຫົວບົດສອບເສັງ ໂດຍພາຍໃຕ້ການຊີ້ນຳ ແລະ ຕິດຕາມຢ່າງໄກ້ຊິດຂອງຄະນະຮັບຜິດຊອບຈາກກະຊວງ.


    ສຳລັບການສອບເສັງແຂ່ງຂັນນັກຮຽນເກັ່ງລະດັບຊາດຊັ້ນມັດທະຍົມສຶກສາສົກຮຽນນີ້ມີນັກຮຽນເກັ່ງທີ່ເປັນຕົວແທນຂອງບັນດາແຂວງ ແລະ ນະຄອນຫຼວງເຂົ້າຮ່ວມທັງໝົດ 144 ຄົນ ຍິງ 68 ຄົນເຊິ່ງແຕ່ລະຄົນແມ່ນໄດ້ຜ່ານການຄັດເລືອກໃນແຕ່ລະຂັ້ນມາແລ້ວ ໂດຍແຕ່ລະຊັ້ນ ມ4 ແລະ ມ7 ສອບເສັງໃນ 4 ວິຊາຄື: ພາສາລາວ-ວັນນະຄະດີ, ຄະນິດສາດ, ຟີຊິກສາດ ແລະ ເຄມີສາດ ວິຊາລະ 1ຄົນ.
    ສ່ວນຜົນຂອງການສອບເສັງແຂ່ງຂັນນັກຮຽນເກັ່ງປີນີ້ ຊັ້ນມ4 ອັນດັບທີ 1 ວິຊາພາສາລາວ-ວັນນະຄະດີ ໄດ້ແກ່ ນາງ ຕາວັນ ວົງວິໄລ ຈາກ ມສ ປາດຖະໜາ ນະຄອນຫຼວງວຽງຈັນ,

    ອັນດັບທີ1 ວິຊາຄະນິດສາດໄດ້ແກ່ ທ້າວ ເພັດນະຄອນ ພົນທະຈັກ ມສ ປາດຖະໜາ ນະຄອນຫຼວງວຽງຈັນເຊັ່ນດຽວກັນ, ອັນດັບທີ 1 ວິຊາຟີຊິກສາດໄດ້ແກ່ ທ້າວອຸດົມຄຳ ບຸນວິໄລ ຈາກ ມສ ພອນສະຫວັນຊົນເຜົ່ານະຄອນຫຼວງວຽງຈັນ ແລະ ອັນດັບທີ1 ວິຊາເຄມີສາດໄດ້ແກ່ ນາງ ຜະກາອາລີ ສິດທິຍະວົງ ຈາກ ມສ ສັນຕິພາບແຂວງບໍແກ້ວ ສຳລັບຊັ້ນມ7 ອັນດັບທີ 1 ວິຊາພາສາລາວ-ວັນນະຄະດີ ໄດ້ແກ່ທ້າວ ທະວີຊັບ ມະນີວົງ ມສ ເມືອງໄຊ ແຂວງອຸດົມໄຊ, ອັນດັບທີ1 ວິຊາຄະນິດສາດ ໄດ້ແກ່ທ້າວ ເຊັງຈືເຮີ ຈາກ ມສ ຊຳໃຕ້ ແຂວງຫົວພັນ ອັັນດັບທີ 1 ວິຊາຟີຊິກສາດ ໄດ້ແກ່ທ້າວ ບຸນຖະໜອມ ປະທຸມພາ ຈາກ ມສ ໂພນໄຊ ນະຄອນປາກເຊ ແຂວງຈຳປາສັກ ແລະ ອັນດັບທີ 1 ວິຊາເຄມີສາດ ໄດ້ແກ່ ທ້າວທົ່ງທໍ່ ໄຊກົວ ຈາກ ມສ ພອນສະຫວັນຊົນເຜົ່າ ນະຄອນຫຼວງວຽງຈັນ.


    ທ່ານ ນາງ ປອ ສີສຸກ ວົງວິຈິດ ກໍ່ໄດ້ກ່າວສະແດງຄວາມຍ້ອງຍໍຊົມເຊີຍ ບັນດາຄະນະນຳທຸກຂັ້ນ, ຄະນະກຳມະການ ແລະ ຄະນະຮັບຜິດຊອບວຽກງານດັ່ງກ່າວທີ່ໄດ້ຕັດສິນໃຈ ແລະປະຕິບັດໜ້າທີ່ດ້ວຍຄວາມຮັບຜິດຊອບສູງ ຕະຫຼອດຮອດນັກຮຽນເກັ່ງທຸກຄົນທີ່ມີຄວາມຕັ້ງໃຈຄົ້ນຄວ້າຮ່ຳຮຽນ ປະຕິບັດການສອບເສັງຢ່າງສຸດຄວາມສາມາດ ຈົນເຮັດໃຫ້ການສອບເສັງແຂ່ງຂັນນັກຮຽນເກັ່ງຄັ້ງນີ້ປະສົບຜົນສຳເລັດ ມີຄວາມໂປ່ງໄສ ແລະ ຍຸດຕິທຳ ເປັນຕົວຊີ້ວັດຄວາມຮູ້ຂອງນັກຮຽນເກັ່ງ ແລະ ຄວາມສາມາດໃນການສິດສອນຂອງຄູໄດ້ຢ່າງແທ້ຈິງ ນອກນັ້ນທ່ານຍັງກ່າວອີກວ່າ: ຈາກຜົນຂອງການສອບເສັງປີນີ້ເຫັນວ່າ ຊັ້ນມ4 ສອບເສັງໄດ້ຄະແນນຫຼຸດລົງ ສ່ວນ ມ7 ແມ່ນໄດ້ຄະແນນສູງຂຶ້ນຖ້າທຽບໃສ່ສົກຮຽນຜ່ານມາ ແລະ ພິເສດປີນີີ້ມີນັກຮຽນເກັ່ງລະດັບຊາດອັນດັບທີ 1-3 ກະຈາຍຢູ່ໃນຫຼາຍແຂວງທົ່ວປະເທດ.
    ສອບເສັງນັກຮຽນເກັ່ງ2022

    LEAVE A REPLY

    Please enter your comment!
    Please enter your name here